Iyẹrẹ Iruo Usiuwoma Ota

No amara July rite November 2010, iwhowho-uvie 922 nọ e rrọ ikoko 88 evaọ Nigeria a kpohọ ekwotọ nọ a ghale kẹ uvumọ ukoko ho nọ a rẹ jọ ta usiuwoma tere he. A to ebe-iwuhrẹ Ebaibol 3,352 họ evaọ ekwotọ nọ a kpohọ na. Ọzae jọ nọ ọ rehọ obe ọ Ebaibol Wuhrẹ na ọ salọ uzou avọ 7 inọ a ro mu ei họ ewuhrẹ keme ọsẹ gbe omoni ọkpekpe riẹ jọ a whu evaọ August 2010. O sikẹ inọ a re wuhrẹ uzou na reno ẹsiẹsiẹ keme ovuẹ na o kẹ riẹ omosasọ gbe uvi ẹruore. Oke ofa u te no nọ ma re ro kpohọ ẹkwotọ nọ a ghale kẹ uvumọ ukoko ho nọ a rẹ jọ ta usiuwoma tere he re ma sae sasa ahwo otiọye oma. Kọ whọ sai w’obọ evaọ iruo nana nọ i wuzou gaga na?