Ẹkpẹti Onọ

◼ Eme ma re ru otẹrọnọ ma gwọlọ nọ a rehọ eware mai jọ hayo omarai kpobi kẹ ukoko Jihova nọ ma te whu no?

Ohwo o te whu no, ọ rẹ riẹ oware nọ o be via kẹ eyero riẹ hẹ. (Ọtausi. 9:5, 6) Fikiere ibuobu a re kere oghẹrẹ nọ a gwọlọ nọ a re ru eware rai fihọ obe nọ a gbẹ rrọ uzuazọ na. (2 Iv. 20:1) Obe nana nọ a rẹ whobọhọ na u re je dhesẹ ohwo nọ ọnọ o whu no na ọ salọ nọ ọ rẹ ghale eware na. Evaọ erẹwho buobu, ohwo o gbe kere obe utiona kpahotọ họ, egọmeti ọ rẹ ghale eware ohwo na. Fikiere, otẹrọnọ ma gwọlọ nọ a rehọ eware mai kpobi hayo ejọ rọ kẹ ukoko Jihova, u wuzou re ma kere oghẹrẹ nọ ma gwọlọ nọ o rẹ jọ kpobi fihọ obe jẹ whobọhọ iẹe, o tẹ jẹ gwọlọ nọ ma romatotọ salọ ohwo nọ ọ te ghale uku na.

Re a ghale uku yọ okolo iruo ho. Eware na i te bu, o rẹ rehọ oke, jẹ gwọlọ orimuo gaga re a sai koko ai họ jẹ ghale ae. Fiba onana, egọmeti erẹwho buobu a wo izi nọ o gwọlọ nọ a rẹ nya lele nọ a tẹ be ghale uku. Orọnikọ ohwo kpobi nọ ọ rrọ ukoko na ọ rẹ sae jọ emamọ ọghaluku hu. U fo re ma salọ ohwo nọ ma riẹ nọ ọ sai ti ru iruo nana, ọnọ ma fi eva họ inọ o ti ru ẹgwọlọ mai.—Rri uzoẹme na “The Wisdom and Benefits of Estate Planning,” evaọ Awake! ọ December 8, 1998.

A tẹ Salọ Owhẹ kẹ Ukuoghale: Ohwo jọ ọ tẹ salọ owhẹ kẹ ukuoghale riẹ, kake nọ omara sọ whọ sai ti gine ru onana, jẹ lẹ kpahe iẹe. (Luk 14:28-32) Nọ ohwo na o te whu no, whọ rẹ vuẹ ahwo nọ a kere edẹ rai fihọ otọ nọ a te ghale eware na kẹ na. Kẹsena nọ a jẹ kẹ owhẹ uvẹ nọ whọ rẹ rọ ghale uku na no, whọ vẹ ghale uku na lele uzi ẹkwotọ na gbe okerefihotọ ọnọ o whu na. Ọnọ ọ be ghale uku na ọ rẹ ghale uku na epanọ u je rie he, te eware na i bu hayo e kawo. Oware kpobi nọ a siobọno kẹ egbẹgwae uzi nọ ukoko na u bi ro ruiruo i re zihe ruọ eware ukoko Jihova.—Luk 16:10; 21:1-4.