Epanọ A re ro Ru Obe-Uwuhrẹ Ebaibol avọ Onaa
1. Didi owha-iruo iwhowho-uvie a wo nọ a te bi wuhrẹ obe kugbe ahwo?
1 Ohwo ọvo ọ sae gọ Jihova ha ajokpanọ ọyomariẹ o “si rie.” (Jọn 6:44) Ghele na, owhowho-uvie o re ru ẹkabọ riẹ re o fiobọhọ kẹ ohwo nọ o bi wuhrẹ na si kẹle Ọsẹ obọ odhiwu riẹ. (Jem. 4:8) Onana o gwọlọ oma oruẹrẹkpahe. Re ọmọ-uwuhrẹ ra o wo otoriẹ eware nọ who bi wuhrẹ iẹe je wo ẹnyaharo, orọnikọ wha te se idhe-eme na jẹ za enọ na no yọ u re no ho.
2. Eware esa vẹ o gwọlọ nọ ma re fiobọhọ kẹ ọmọ-uwuhrẹ Ebaibol mai ru?
2 Re owhowho-uvie ọ sai ru obe-uwuhrẹ avọ onaa, o roja re o fiobọhọ kẹ ọmọ-uwuhrẹ na (1) wo otoriẹ eware nọ ọ jọ Ebaibol na wuhrẹ, (2) rọwo eware nọ ọ jọ Ebaibol na wuhrẹ, (3) fi eware nọ ọ jọ Ebaibol na wuhrẹ họ iruo. (Jọn 3:16; 17:3; Jem. 2:26) Re who fiobọhọ kẹ ọmọ-uwuhrẹ Ebaibol ru eware nana unọjọ utọjọ, orọnọ oware asohẹrioke he. Ghele na, idhere esa nana ọvuọvo i re fiobọhọ kẹ ọmọ-uwuhrẹ na wo emamọ usu kugbe Jihova, jẹ wọe roma mudhe kẹe.
3. Fikieme o rọ gwọlọ nọ a rẹ nọ ọmọ-uwuhrẹ na enọ nọ e rẹ lẹliẹe ta oware nọ o riẹe eva?
3 Eme Ọ Rrọ Udu Ọmọ-Uwuhrẹ Na?: Re whọ sae riẹ sọ ọmọ-uwuhrẹ Ebaibol ra o bi wo otoriẹ jẹ rọwo eware nọ who bi wuhrẹ iẹe na, whọ ta eme bu hrọ họ, ukpoye, nọe enọ nọ e rẹ lẹliẹe ta oware nọ o riẹe udu. (Jem. 1:19) Kọ o wo otoriẹ oware nọ Ebaibol na ọ ta kpahe uzoẹme nọ wha bi wuhrẹ na? Kọ ọ sae rọ eme obọriẹ ta oware nọ o bi wuhrẹ na? Ẹvẹ eware nọ o bi wuhrẹ na e riẹe oma? Kọ ọ rọwo nọ eware nọ Ebaibol na o bi wuhrẹ e sae kẹe erere? (1 Tẹs. 2:13) Kọ o vuhumu nọ o re ru inwene evaọ uzuazọ riẹ lele eware nọ o bi wuhrẹ na? (Kọl. 3:10) Re whọ sae riẹ iyo enọ nana, u fo nọ whọ rẹ nọe enọ nọ e rẹ lẹliẹe ta oware nọ o riẹe eva, kẹsena whọ vẹ gaviezọ ziezi.—Mat. 16:13-16.
4. Eme ma re ru otẹrọnọ ọmọ-uwuhrẹ mai ọ be rọwo hayo ru lele oware nọ ma bi wuhrẹ iẹe he?
4 O rẹ rehọ oke gaga re ohwo o te ti nwene uruemu nọ o reria e riẹ obọ no gbe eware nọ a wuhrẹ i rie n’otọ ze. (2 Kọr. 10:5) Eme ma re ru otẹrọnọ ọmọ-uwuhrẹ mai ọ be rọwo hayo ru lele oware nọ ma bi wuhrẹ iẹe he? O gwọlọ nọ ma re thihakọ re Ọghẹnẹ ọ rọ Ẹme riẹ gbe ẹzi riẹ fiobọhọ kẹe. (1 Kọr. 3:6, 7; Hib. 4:12) Otẹrọnọ o rrọ bẹbẹ kẹ ọmọ-uwuhrẹ na re ọ rọwo hayo ru lele oware jọ nọ who bi wuhrẹ iẹe, ukpenọ whọ rẹ gbae họ, o rẹ mai woma re wha kpohọ uzoẹme ofa. Nọ ma be rọ ithihakọ gbe uyoyou wuhrẹ iẹe Ebaibol na, ọ sai ru inwene nọ oke o be nyaharo na.