Iyẹrẹ Iruo Usiuwoma Ota

Dede nọ idibo Jihova a wo uvẹ tere he, no amara Aria rite Akpegbọvo ibuobu rai a ru uvẹ nọ a ro kpohọ ekwotọ nọ iwhowho-uvie a rẹ jọ ta usiuwoma tere he. Oniọvo-ọmọtẹ jọ nọ ọ rehọ oke ilivi riẹ kpohọ oria utioye nyae ta usiuwoma ọ ta nọ: “Evaọ ilivi nọ mẹ be hae nya anwẹdẹ na, ọnana họ ọnọ ọ mai woma kpaobọ. A rẹ ruẹ obọ irere nọ me wo ho.” Inievo nọ i kpohọ eria itieye na a rẹ nyaku ahwo buobu nọ e ginẹ gwọlọ riẹ uzẹme na nọ e gwọlọ ru oreva Ọghẹnẹ. Emamọ iyẹrẹ jọ ena:

• Iwhowho-uvie 25 jọ nọ e rrọ ubrotọ Ogun a kpohọ ekwotọ nọ iwhowho-uvie a rẹ jọ ta usiuwoma tere he evaọ ubrotọ Kogi. A ta nọ: “Ma ru Ewuhrẹ Ovuẹ Ogbotu evaọ iwhre jọ nọ a re se Ejuku. Ahwo nọ a jọ ewuhrẹ na a bu te 98. Nọ a kẹ ovuẹ na no, a te ru owhowhovia nọ ahwo nọ a gwọlọ nọ a wuhrẹ obe kugbe ai a nya lahwe. Ahwo 28 soso a tẹ nya lahwe jẹ hẹrẹ bẹsenọ a ro kere edẹ rai, adrẹse rai, gbe inọmba ifonu rai fihotọ.”

• Emamọ iyẹrẹ ọfa nọ u dhesẹ epanọ ẹme Ebaibol o re ro fiobọhọ kẹ ohwo ọna: Nọ iwhowho-uvie ivẹ jọ i je wuhrẹ obe kugbe ọmọzae jọ evaọ otafe, a tẹ ruẹ eyae ivẹ jọ nọ e be họre fiki ugho. Ọjọ evaọ usu eyae ivẹ na o dihọ. Ahwo nọ a jọ etẹe a kru rai bẹ. Aye nọ o dihọ na o te muofu vrẹ, rekọ nọ o je zihe ze re a ruabọhọ ohọre na, iwhowho-uvie na a tẹ nya bru rie. A fiobọhọ kẹe vuhumu nọ ohọre na o rẹ sae wha ẹbẹbẹ sei gbe ọmọ nọ ọ riẹe eva na. A tẹ jẹ jọ Ebaibol dhesẹ kẹe epanọ uzuazọ ọmọ nọ ọ gbẹ rrọ obeva ọ ghare kẹ Jihova te. (Ọny. 21:22-25) Aye nọ o dihọ na ọ tẹ ta nọ ọ rẹ tubẹ kpairoro vrẹ osa nọ aye ọdekọ na ọ re riẹ na ukpenọ o re ru Jihova eva dha. Aye na ọ tẹ rọwo nọ inievo na a wuhrẹ Ebaibol kugbei.

Evaọ ukpe iruo 2013, inievo 3,415 nọ e jọ itu 244 i kpohọ ekwotọ nọ iwhowho-uvie e be jọ ta usiuwoma tere he. Kọ whọ gbẹ daoma kpohọ oria utioye na evaọ ukpe iruo n’otha na?—Ol. 110:3.