Rọ Aro Kele Ẹrọwọ Rai
1. Evaọ oka nọ o rọ Akpe 19 muhọ, obe vẹ ma te jọ Uwuhrẹ Ebaibol Ukoko muhọ ewuhrẹ?
1 Evaọ oka nọ o rọ Akpe 19, 2015 muhọ, ma ti mu obe Rọ Aro Kele Ẹrọwọ Rai họ ewuhrẹ evaọ Uwuhrẹ Ebaibol Ukoko. A gbiku ezae avọ eyae nọ i bu te ikpegbene nọ i wo ẹrọwọ evaọ Ebaibol na fihọ obe nana. A kere obe nana evaọ oghẹrẹ nọ ma rẹ rọ jọ iroro mai ruẹ ahwo na wọhọ enọ e ginẹ rria no nọ a gọ Jihova avọ ẹrọwọ ghelọ edawọ. Obe na o tẹ jẹ ta kpahe eware nọ ma wuhrẹ no oriruo rai ze gbe oghẹrẹ nọ ma sai ro fi ai họ iruo.—Hib. 6:12.
2. Ta kpahe eware jọ nọ e rrọ obe Rọ Aro Kele Ẹrọwọ Rai na.
2 Eware nọ E Rrọ Obe Na: Obe na u wo emapo gbe oke nọ eware e rọ via nọ u re fiobọhọ kẹ omai riẹ etoke gbe oria nọ ahwo na a rria. U te no ere no, uzou kpobi u wo uzoẹme na, “Roro Kpahe Enọ Nana . . . ,” nọ u ti fiobọhọ kẹ omai roro kpahe epanọ ma sai ro fi eware nọ ma wuhrẹ no uzuazọ ahwo na ze họ iruo. A fi iwoho nọ a nabe ruẹrẹ họ wowoma ziezi họ iẹe nọ e rẹ lẹliẹ iku na vẹ.
3. Eme ma rẹ sai ru re ma wo erere no ewuhrẹ obe nana ze?
3 Epanọ Whọ Sai ro Wo Erere Noi Ze: Ileta Utu Ẹruorote na nọ o rrọ emuhọ obe na o tuduhọ omai awọ nọ: “Rehọ iẹe nọ whọ rrọ etẹe nọ eware na e be via na, inọ whọ be ruẹ eware nọ a jẹ ruẹ je bi yo edo nọ a je yo. Roro kpahe oware nọ ahwo na a ru gbe oware nọ whọ hai ti ru o hae jọnọ whẹ eware na e via kẹ.” Ghele na, orọnikọ ma rẹ nwani roro kpahe ae vrẹ oma ha, rekọ ma re roro kpahe oware nọ Ebaibol na o ta kpahe ahwo na je fi omamai họ ẹta rai. Re ma sai ru onana, ma rẹ raha oke roro didi. (Neh. 8:8) Otẹrọnọ ewuhrẹ oka na o te jọ udevie uzou jọ muhọ, ọnọ o bi ru ewuhrẹ na ọ rẹ rehọ emaharo 30 rite 60 ta kpahe eware jọ nọ a wuhrẹ evaọ oka n’ukpo. A sae nọ onọ ọvo hayo ivẹ ro ru ọkiẹkpemu uwuhrẹ na otẹrọnọ uzoẹme na, “Roro Kpahe Enọ Nana . . .” u gbe kugbe uwuhrẹ oka yena ha.
4. Fikieme u ro fo re ma wuhrẹ obe Rọ Aro Kele Ẹrọwọ Rai na?
4 Ma be rria akpọ nọ o be gwọlọ oghẹrẹ kpobi nọ o re ro whrehe ẹrọwọ mai kẹdẹ kẹdẹ. Obe nana gbe izoẹme itienana nọ e be romavia evaọ Uwou-Eroro Na, yọ okẹ nọ u no obọ Jihova ze re ma sai kru ẹrọwọ mai. (Jem. 1:17) Joma se onana gboja re ma hai kpohọ Uwuhrẹ Ebaibol Ukoko na kẹse kẹse jẹ daoma hae kẹ iyo nọ ma te bi wuhrẹ obe nana kugbe!