Epanọ Ma Sai ro Wo Onaa Ziezi Evaọ Usiuwoma Ota—Fiobọhọ kẹ Emọ-Uwuhrẹ Ebaibol Ra Riẹ Epanọ A re Ru Uwuhrẹ Omobọ Rai
Oware nọ U ro Wuzou: Re ọmọ-uwuhrẹ ọ sai wo ẹnyaharo, o gwọlọ nọ ọ rẹ riẹ eware ididi Ebaibol na orọnọ eware elọlọhọ ọvo ho. (Hib. 5:12–6:1) Re ohwo o wuhrẹ oware, o gwọlọ omodawọ. Ohwo na ọ rẹ rọ eware ekpokpọ nọ o wuhrẹ wawo eware nọ ọ riẹ no vẹre, jẹ riẹ oghẹrẹ nọ o re ro fi ai họ iruo. (Itẹ 2:1-6) Nọ ọmọ-uwuhrẹ ọ tẹ riẹ epanọ a re ru ekiakiẹ, ọ rẹ sae rehọ ebe ukoko na kẹ iyo enọ nọ a nọ riẹ. Ọ tẹ be daoma fi eware nọ o wuhrẹ họ iruo, u re fiobọhọ kẹe fi ebẹbẹ nọ ọ te rẹriẹ ovao dhe kparobọ.—Luk 6:47, 48.
Dao Onana Evaọ Amara Na:
Nọ who te wuhrẹ uzoẹme osese hayo uzou jọ soso re no, ta kẹ ọmọ-uwuhrẹ ra re ọ rọ umutho eme jọ ta oware nọ o wuhrẹ noi ze. Otẹrọnọ who wo ọmọ-uwuhrẹ Ebaibol ho, daoma rọ umutho eme jọ ta oware nọ who se evaọ Ebaibol hayo edhe-ẹme jọ evaọ Uwou-Eroro Na re whọ rọ ere wuhrẹ epanọ whọ rẹ rọ kareghẹhọ eware nọ who se.