Epanọ Ma Sai ro Wo Onaa Ziezi Evaọ Usiuwoma Ota​—Rọ Obe Daji Uyoyou Ọghẹnẹ Ru Uwuhrẹ Te Ahwo Udu

OWARE NỌ U RO WUZOU: U fo re ahwo a wuhrẹ kpahe idhere Jihova re a jẹ nya lele ai re Ọghẹnẹ ọ sae jẹ egagọ rai rehọ. (Aiz 2:​3, 4) Obe “Uyoyou Ọghẹnẹ” nọ o rrọ obe avivẹ nọ ma bi ro wuhrẹ ahwo na u re fiobọhọ kẹ emọ-uwuhrẹ Ebaibol riẹ epanọ a sai ro fi izi Ebaibol họ iruo kẹdẹ kẹdẹ evaọ uzuazọ rai. (Hib 5:14) Nọ ma te bi wuhrẹ ai, ma rẹ daoma ru uwuhrẹ na te ai udu re a sae rọ emamọ eva ru inwene.​—Rom 6:17.

EPANỌ A RE RO RU EI:

• Ruẹrẹ oma kpahe ziezi, re who je wo ẹgwọlọ ọmọ-uwuhrẹ ra họ iroro. Nọe enọ nọ e rẹ lẹliẹe ta oware nọ o rrọ iẹe eva kpahe oware nọ wha bi wuhrẹ na.​—Itẹ 20:5; be 259

• Rehọ ekpẹti kpobi nọ e rrọ obe na fiobọhọ kẹ ọmọ-uwuhrẹ ra ruẹ epanọ u wuzou te re o fi izi Ebaibol họ iruo

• Fiobọhọ kẹ ọmọ-uwuhrẹ ra re ọ hae rọ obruoziẹ-iroro riẹ jiroro kẹ omobọ riẹ, rekọ whọ ta onọ o re ru kẹe he.​—Gal 6:5

• Rọ areghẹ riẹ sọ ọmọ-uwuhrẹ ra ọ gwọlọ obufihọ re ọ sai fi izi Ebaibol jọ họ iruo. Rọ ẹwo fiobọhọ kẹe re uyoyou nọ o wo kẹ Jihova o wọe ru inwene.​—Itẹ 27:11; Jọ 14:31