Idhere Esa nọ Ma Sae rọ Rẹroso Jihova

Devidi o fi Goliat kparobọ fikinọ ọ rẹroso Jihova. (1Sa 17:45) O rẹ were Jihova re o dhesẹ ogaga riẹ fiki idibo riẹ. (2Ir 16:9) Oghẹrẹ vẹ ma sae rọ rẹroso Jihova re o fiobọhọ kẹ omai viukpenọ ma rẹ rẹroso omobọ mai? Joma ta kpahe idhere esa jọ:

• Hae lẹ kẹse kẹse. Orọnikọ okenọ who te ru oware jọ thọ no ọvo whọ rẹ rọ lẹ re Jihova ọ rọvrẹ owhẹ hẹ, rekọ hae lẹ re ọ kẹ owhẹ ẹgba nọ whọ tẹ rẹriẹ ovao dhe odawọ. (Mt 6:12, 13) Orọnikọ okẹnọ whọ tẹ jiroro no ọvo whọ rẹ rọ lẹ re Jihova ọ ghale iroro nọ whọ jẹ na ha, rekọ lẹ sei re ọ kpọ owhẹ jẹ kẹ owhẹ areghẹ taure whọ tẹ te jiroro jọ.—Jem 1:5

• Wo omaa nọ who re ro se Ebaibol na kẹse kẹse. Hai se Ebaibol na kẹdẹ kẹdẹ. (Ol 1:2) Roro didi kpahe iriruo ahwo nọ a fodẹ evaọ Ebaibol na, je fi eware nọ who wuhrẹ mi ai họ iruo. (Jem 1:23-25) Hae ruẹrẹ oma kpahe kẹ usi uwoma ota, ukpenọ whọ rẹ rẹroso eware nọ whọ riẹ no vẹre. Re whọ sai wo erere no iwuhrẹ ukoko ze, hae ruẹrẹ oma kpahe kẹ iwuhrẹ na

• Hai ru lele oware nọ ukoko Jihova o ta. Daoma riẹ kpahe inwene ekpokpọ nọ ukoko na u bi ru, re who ru lele ae ababọ oke oraha. (Ik 9:17) Yoẹme kẹ ekpako na nọ a tẹ kẹ owhẹ ohrẹ hayo ọkpọvio jọ.—Hib 13:17

WHA RRI IVIDIO NA OWARE OVO O RẸ LẸLIẸ OZỌ UKPOKPOMA MU OMAI HI, KẸSENA WHA VẸ KIYO ENỌ NANA:

• Eware jọ vẹ e jẹ lẹliẹ ozọ mu inievo mai na?

• Eme o fiobọhọ kẹ ae nọ ozọ u gbe je ro mu ai hi?