UZUAZỌ OLELEIKRISTI
Esẹgbini—Wha Fiobọhọ kẹ Emọ Rai Ru Eware nọ Jihova O bi Wuhrẹ Ai
Obọdẹ edhere jọ nọ esẹgbini a sai ro fiobọhọ kẹ emọ rai ru eware nọ Jihova o bi wuhrẹ ai họ, nọ a tẹ be daoma ruẹ nọ emọ rai a wo erere no iwuhrẹ ukoko ze. Eware nọ emaha a ruẹ, enọ a yo, gbe eware nọ a rọ unu rai ta nọ a tẹ be kẹ uyo evaọ obọ ewuhrẹ, e sai fiobọhọ kẹ ae wuhrẹ kpahe Jihova je si kẹle iẹe ziezi. (Izi 31:12, 13) Otẹrọnọ who wo emọ, ẹvẹ whọ sai ro fiobọhọ kẹ emọ ra wo erere ziezi no iwuhrẹ ukoko ze?
Daoma hai kpohọ ewuhrẹ evaọ obọ Ọgwa Uvie.—Ol 22:22
Hai lele inievo na ta ẹme evaọ obọ Ọgwa Uvie taure ewuhrẹ o te ti muhọ hayo nọ ewuhrẹ o te kuhọ no.—Hib 10:25
Ruẹ nọ ohwo kpobi evaọ uviuwou ra o wo obe nọ a bi ro ru ewuhrẹ na, te orọ ifonu, etablẹte, hayo onọ a printi
Lele ọmọ ra ruẹrẹ uyo jọ kpahe evaọ obọ uwou nọ ọ rẹ sae rọ eme obọriẹ kẹ evaọ obọ ewuhrẹ.—Mt 21:15, 16
Hae ta kpahe epanọ iwuhrẹ nọ ma rẹ nya gbe eware nọ ma bi wuhrẹ evaọ obọ Ọgwa Uvie i woma te
Tuduhọ emọ ra awọ re a hai kuomagbe inievo na ru Ọgwa Uvie fo, a vẹ jẹ hai lele inievo ukoko na nọ e kpako no ta ẹme
Re whọ sai fiobọhọ kẹ emọ ra si kẹle Jihova yọ okolo iruo ho, yọ ẹsejọ whọ sai tube roro nọ iruo na e rro vi owhẹ oma. Rekọ jọ ozọ u mu owhẹ hẹ, Jihova o ti fiobọhọ kẹ owhẹ.—Aiz 40:29.
WHA RRI IVIDIO NA ESẸGBINI, WHA RẸROSO JIHOVA, Ọ TE KẸ OWHAI ẸGBA, KẸSENA WHA VẸ KIYO ENỌ NANA:
Eme ọ jẹ via kẹ Zack avọ Leah fikinọ oma o jẹ hae rrọ ae no ẹsikpobi?
Fikieme o rọ gwọlọ nọ esẹgbini a rẹ hae lẹ se Jihova re ọ kẹ ae ẹgba?
_Eme gbe eme Zack avọ Leah a ru nọ u dhesẹ nọ a rẹroso Jihova re o fiobọhọ kẹ ae?