Enọ Ahwo nọ A s’Ebe

Amono họ elakpa etẹmpol ahwo Ju? Didi iruo a je ru?

Ahwo orua Livae nọ a jọ izerẹ hẹ a jẹ hai ru iruo efa sa-sa, ejọ rai e jọ elakpa hayo iporisi. Oletu etẹmpol na ọye o wuzou rai. Ohwo Ju jọ nọ o re kere ebe, nọ a re se Philo ọ ta kpahe iruo elakpa nana inọ: “Ahwo [Livae] nana jọ a jẹ hai dikihẹ unuẹthẹ ru iruo irou-unuẹthẹ, ejọ e rẹ jọ obeva [etẹmpol na], evaọ obaro aruẹri na re a whaha ahwo nọ u fo nọ a rẹ rọ ithihi rai te etẹe he, o tẹ make rọnọ o jẹ te thọ ohwo na obọ hayo o je ti keke aro fihọ ru ei. Elakpa jọ a rẹ nya etẹmpol na wariẹ evaọ ọvuọ oke riẹ nọ a fihọ kẹ ae taso tuvo, re a rou oria na.”

Ogbẹgwae Sanhẹdrin a rẹ rehọ elakpa na ru iruo oke kpobi nọ a gwọlọ e rai. Utu elakpa ahwo Ju na ọvo egọmeti Rom ọ kuvẹ nọ a rẹ wha ekwakwa ẹmo.

Ọzae jọ nọ ọ rẹ kiẹ eme Ebaibol riwi nọ a re se Joachim Jeremias ọ ta nọ: “Eme nọ Jesu ọ ta evaọ okenọ a rọ nyaze ti mu ei inọ kẹdẹ kẹdẹ ọ jẹ hae keria Etẹmpol na wuhrẹ ahwo yọ a mu rie he na (Mat. 26:55), u ru omai riẹ nọ ahwo nana a gbẹ jọ elakpa Etẹmpol na ha, Jesu ọ hae te ta ẹme otiọye he.” U mu ọzae nana ẹro re inọ elakpa etẹmpol na a vi nyai mu Jesu evaọ oke ọsosuọ. (Jọn 7:32, 45, 46) Uwhremu na, elakpa na avọ oletu rai a vi nyai mu ilele Jesu ziọ aro ogbẹgwae Sanhẹdrin, yọ o wọhọ nọ ahwo nana ọvona a si Pọl ukọ na no etẹmpol na ruọ otafe.​—Iruẹru 4:1-3; 5:17-27; 21:27-30.