Ọghẹnẹ Ọ be Daezọ Ra

Ebaibol na o dhesẹ nọ Jihova Ọghẹnẹa nọ ọ ma omai na, ọ riẹ eware nọ e be kẹ omai uye vi omọfa kpobi. Ọ gwọlọ nọ o re fiobọhọ kẹ omai nọ ma te wo ẹbẹbẹ. Wọhọ oriruo, ẹme nọ Ebaibol na ọ ta evaọ eria ikere ivẹ nana e rẹ sasa ohwo oma:

“Jihova ọ kẹle enọ e rrọ ọkora; o re siwi enọ e rrọ uweri.”—OLEZI 34:18.

“Mẹ Jihova Ọghẹnẹ ra, me bi kru obọze ra kekeke, ọnọ ọ be ta kẹ owhẹ nọ, ‘Jọ ozọ u mu owhẹ hẹ. Me ti fiobọhọ kẹ owhẹ.’”—AIZAYA 41:13.

Oghẹrẹ vẹ Jihova o re ro fiobọhọ kẹ omai thihakọ ẹbẹbẹ ẹyao iroro? Wọhọ epanọ whọ te ruẹ evaọ izoeme nọ e rrọ aro na, whọ te ruẹ idhere sa-sa nọ Jihova o ro dhesẹ no inọ ọ be ginẹ daezọ mai.