Kọ Whọ Kareghẹhọ?

Kọ whọ romatotọ se Uwou-Eroro nọ a siobọno enukpe nana? Dai rri sọ whọ sae kẹ iyo enọ nọ e rrọ obotọ na:

Eme u dhesẹ re ma nwene iroro mai? (Rom 12:2)

Orọnikọ thakpinọ ma bi ru emamọ eware ẹsikpobi ọvo ho. Rekọ ma re muẹrohọ oghẹrẹ nọ obeva mai ọ rrọ. Ma ve si ekpehre iroro kpobi no udu mai, je nwene uruemu mai re o were Jihova ziezi.—w23.01, ẹwẹ. 8-9.

Eme u fo nọ ma rẹ whaha nọ ma tẹ be gaviezọ kẹ usi eware nọ e rrọ akpọ via, kọ eme u fo nọ ma re ru?

Ma rẹ daoma riẹ epanọ eware nọ e be via u ro dhesẹ nọ eruẹaruẹ Ebaibol i bi rugba. Rekọ joma ta nọ oware nana nọ o via na, ẹsejọhọ eruẹaruẹ nana eye i bi rugba na ha. Ogbẹrọ ere he, kọ ọvuọ oriẹ ọ te ta evaọ ukoko na. U fo nọ oria nọ ukoko Jihova o ta te, ma rẹ ta ba. (1 Kọr. 1:10)—w23.02, ẹwẹ. 16.

Ẹvẹ ame-ọhọ Jesu o ro wo ohẹriẹ no orọ ilele riẹ?

U du gwọlọ nọ Jesu ọ rẹ rọ omariẹ mudhe kẹ Jihova ha keme orẹwho nọ o no ze yọ ahwo nọ a roma mudhe no vẹre inọ Ọghẹnẹ ọvo a rẹ gọ. Yọ orọnikọ ọ họ-ame ro dhesẹ nọ o kurẹriẹ no ho, keme ọ jọ gbagba, ọ raha uzi ọvo ho.—w23.03, ẹwẹ. 5.

Eme ma re ru re amọfa a sae kẹ uyo evaọ ewuhrẹ?

Ma tẹ be kẹ iyo ekpẹkpẹe o rẹ whae ze nọ uvẹ o rẹ rọ jariẹ nọ a re ro se amọfa. Ma re kele eware buobu hu, re amọfa a sae ruẹ ojọ ta.—w23.04, ẹwẹ. 23.

Eme họ “Edhere Ọrẹri” nọ a fodẹ evaọ obe Aizaya 35:8 na?

Evaọ oke ọsosuọ, edhere na họ oghẹrẹ nọ ahwo Ju a ro no Babilọn kpobọ ẹwho rai. Rekọ anwọ oke jọ ze na, edhere na họ emamọ eware nọ ahwo a ru evaọ ikpe buobu taure 1919 o te ti te re ahwo a sae gọ Ọghẹnẹ. Ojọ rai họ, Ebaibol nọ a fa fihọ evẹrẹ efa, a te je printi rai buobu. Ahwo Ọghẹnẹ a gbẹ be nya “Edhere Ọrẹri” na keme a be gọ Jihova ziezi, yọ Uvie Ọghẹnẹ o tẹ ze no a ti wo eghale buobu.—w23.05, ẹwẹ. 15-19.

Eme a rehọ eyae ivẹ jọ dhesẹ evaọ obe Itẹ izou 9, kọ eme ma wuhrẹ noi ze?

A jọ obe Itẹ na ta kpahe “aye ogheghẹ” jọ nọ o bi zizie ahwo kpobọ uwou riẹ. Kpakiyọ uwou riẹ u re zue ohwo ruọ obọ “Uki.” A tẹ jẹ ta kpahe aye ọfa nọ a re se “uvi areghẹ” nọ o bi zizie ahwo. Yọ enọ e nyabru ei a rẹ nya “edhere otoriẹ” nọ a ti jo wo uzuazọ ebẹdẹ bẹdẹ. (Itẹ 9:1, 6, 13, 18)—w23.06, ẹwẹ. 22-24.

Eme u dhesẹ nọ Ọghẹnẹ o wo omaurokpotọ, yọ o re si eware kekeke he okenọ ọ vuẹ Lọt nọ jọ ọ dhẹ no Sọdọm no?

Nọ Jihova ọ vuẹ Lọt nọ jọ ọ dhẹ no Sọdọm kpohọ obonọ igbehru e rrọ, Lọt ọ tẹ lẹe inọ jọ ọ kẹe uvẹ re ọ dhẹ kpohọ ẹwho nọ a re se Zoa. Ọghẹnẹ ọ tẹ rọwo.—w23.07, ẹwẹ. 21.

Eme aye o re ru otẹrọnọ ọzae riẹ o re rri ifoto-ẹbẹba?

Jọ ọ riẹ nọ orọnọ ọye ọ soriẹ hẹ. Jọ ọ hai ru eware nọ e rẹ lẹliẹe si kẹle Ọghẹnẹ. Oware utioye jọ nọ ọ rẹ sai ru họ, o re roro didi kpahe iku eyae nọ i wo ẹbẹbẹ nọ Jihova o fiobọhọ kẹ evaọ Ebaibol na. Ọ sai je fiobọhọ kẹ ọzae riẹ re ọ hae kẹnoma kẹ eria nọ ọ sae jọ ruẹ eware itieye na.—w23.08, ẹwẹ. 14-17.

Ma tẹ riẹ oware nọ o lẹliẹ ohwo ta ẹme jọ kpahe omai Isẹri Jihova hayo eware nọ ma re wuhrẹ, ẹvẹ o sae rọ lẹliẹ omai kpahe ẹme wolẹ?

Eme itieye nọ ahwo a rẹ ta na o rẹ lẹliẹ omai riẹ oware nọ a bi roro gbe eware nọ e be kẹ ae uye. O vẹ so ẹe ze nọ ma rẹ rọ ta ẹme kẹ ohwo na wolẹ.—w23.09, ẹwẹ. 17.

Eme ma wuhrẹ no oghẹrẹ nọ Ọghẹnẹ ọ rọ kẹ Meri ẹgba ze?

Nọ a vuẹe no inọ ọye o ti yẹ Mesaya na, eme nọ amọfa a ta kẹe e kẹ riẹ ẹgba. Gebriẹl avọ Ẹlizabẹt a dhunu te eme jọ evaọ Ikereakere na nọ e kẹ riẹ udu nọ ọ sai ro ru oware nọ Ọghẹnẹ ọ gwọlọ. Inievo ukoko na a sai fiobọhọ kẹ omai jẹ tuduhọ omai awọ re.—w23.10, ẹwẹ. 15.

Ẹvẹ Jihova o re ro yo olẹ mai?

Jihova ọ ta nọ o ti yo olẹ kpobi nọ ma lẹ sei nọ o rọwokugbe oreva riẹ. (Jeri. 29:12) Rekọ imava a tẹ make yare iẹe oware ovona, orọnọ oware ovona ọ rẹ nwani ru kẹ ai hi. Yọ ma riẹ nọ ọ gbẹ maki ru oware nọ ma yare riẹ dẹẹ hẹ, ọ rẹ rehọ oghẹrẹ ofa fiobọhọ kẹ omai.—w23.11, ẹwẹ. 21-22.

Dede nọ a jọ obe Ahwo Rom 5:2 ta ẹme kpahe ẹruore, fikieme a rọ wariẹ ta kpahe iẹe evaọ owọ avọ 4?

Nọ a tẹ ta usi uwoma kẹ ohwo inọ oke o be tha nọ otọakpọ na u ti zihe ruọ aparadase, ohwo na o re wo ẹruore inọ eware i ti woma ẹdẹjọ. Rekọ nọ ebẹbẹ i te tei, nọ o je bi thihakọ jẹ be ruẹ oghẹrẹ nọ Ọghẹnẹ o bi ro fiobọhọ kẹe, ọ vẹ te ruẹ nọ eva riẹ e be were Ọghẹnẹ. U ve ti mu ei ẹro ziezi inọ ọ te ginẹ jọ usu ahwo nọ a te jọ akpọ ọkpokpọ Ọghẹnẹ na.—w23.12, ẹwẹ. 12-13.