Kọ Whọ Kareghẹhọ?

Kọ whọ romatotọ se Uwou-Eroro nọ a siobọno enukpe nana? Dai rri sọ whọ sae kẹ iyo enọ nọ e rrọ obotọ na:

Emamọ oriruo vẹ Jihova o fihotọ kẹ omai evaọ oghẹrẹ nọ ma re rri eyae na?

Epọvo na Jihova o re rri omai na kpobi. O re rri ezae na inọ a woma vi eyae na ha. Ọghẹnẹ ọ rẹ gaviezọ kẹ eyae na nọ a tẹ be vuẹe oware nọ o be kẹ ae uye. O fievahọ ae inọ a ti ru iruo riẹ ziezi.—w24.01, ẹwẹ. 15-16.

Ẹvẹ ma sai ro ru lele ẹme nọ ọ rrọ Ahwo Ẹfisọs 5:7 na, onọ o ta nọ: “Wha kuomagbe ae he”?

Pọl ukọ na ọ jọ etẹe vẹvẹ omai unu nọ ma kẹnoma kẹ ohwo kpobi nọ o re ru nọ ma gbẹ sai koko izi Ọghẹnẹ hẹ. Ẹme na o kiekpahe ahwo nọ ma be hae jọ kugbe ovao dhe ovao gbe enọ ma bi lele ta ẹme evaọ itanẹte.—w24.03, ẹwẹ. 22-23.

Oghẹrẹ iku vẹ ma rẹ gaviezọ kẹ hẹ?

U fo nọ ma rẹ yọroma gaga kẹ iku nọ ma riẹ sọ uzẹme sọ ọrue he o tẹ make rọnọ ogbẹnyusu mai nọ ma fievahọ ọ vuẹ omai. Ma rẹ jẹ yọroma kẹ iwou nọ ahwo nọ ma riẹ hẹ a re mu vi se omai gbe ahwo nọ a kie no ukoko na no nọ a be wọso uzẹme na nọ a re ru wọhọ emamọ ahwo.—w24.04, ẹwẹ. 12.

Eme ma riẹ, kọ eme ma riẹ hẹ kpahe epanọ Jihova o ti ro bruoziẹ Solomọn ovie na, ahwo nọ a whu evaọ Sọdọm avọ Gomora, gbe ahwo nọ Owhe oke Noa o kpe?

Ma riẹ hẹ sọ Jihova ọ te kpare ae ze. Rekọ ma riẹ nọ Jihova ọ riẹ eware kpobi, yọ o wo ohrọ-oriọ gaga.—w24.05, ẹwẹ. 3-4.

Fikinọ Ọghẹnẹ họ “Utho na,” eme ma riẹ kpahe iẹe? (Izie. 32:4)

U ru omai riẹ nọ Jihova họ adhẹzọ mai. Yọ ọ rrọ Ọghẹnẹ nọ ma rẹ rẹroso keme o re ru eyaa riẹ kpobi gba. O re nwene gbe he, yọ oware kpobi nọ ọ gwọlọ ru, o re ru ei.—w24.06, ẹwẹ. 26-28.

Eme o re fiobọhọ kẹ owhẹ nọ who te kpohọ ukoko ọfa?

Rẹroso Jihova inọ o ti fiobọhọ kẹ owhẹ keme o fiobọhọ kẹ idibo riẹ jọ no evaọ oke nọ o vrẹ. Whọ rọ ukoko nọ whọ nya na kele onọ who no ze he. Daoma kuomagbe inievo na ru eware evaọ ukoko na, jẹ daoma wo egbẹnyusu ekpokpọ evaọ etẹe.—w24.07, ẹwẹ. 26-28.

Eme ma wuhrẹ no etadhesẹ esa nọ e rrọ Matiu uzou avọ 25 na ze?

Ọtadhesẹ igodẹ gbe ewe na o wuhrẹ omai nọ ma gọ Jihova no eva ze jẹ talamu ei. Ọtadhesẹ emetẹ-kọkọ iwareghẹ gbe igheghẹ na o wuhrẹ omai nọ ma ruẹrẹ oma kpahe ziezi jẹ jaja aro vi. Yọ ọtadhesẹ etalẹnte na o wuhrẹ omai epanọ u woma te re ma kru obọ ga ziezi evaọ iruo nọ Ọghẹnẹ ọ kẹ omai.—w24.09, ẹwẹ. 20-24.

Ẹvẹ ọmọgwa nọ ọ jọ aro etẹmpol nọ Solomọn ọ bọ na o kpehru te?

Who te se obe 2 Iruẹru-Ivie 3:4 evaọ ikulu-ebe Ebaibol anwae jọ, a jarae ta nọ ọmọgwa na o kpehru te “ikiubiti udhozeza (120),” koyehọ irula udhoree gbe ikpegbisoi (175). Rekọ ikulu-ebe Ebaibol efa nọ a fievahọ gaga e ta nọ o kpehru te “ikiubiti udhe” koyehọ irula ọgba. O wọhọ nọ ikiubiti udhe o kpehru te keme igbẹhẹ etẹmpol na e nwani wo okpa gaga ha.—w24.10, ẹwẹ. 31.

Eme họ otọ ẹme na inọ idibo iruiruo a rẹ jọ “ezae nọ i wo aye ọvo”? (1 Tim. 3:12)

Ẹme yena o dhesẹ nọ odibo oruiruo o re wo aye ọvo yọ o re gbe-ọfariẹ vievie he. Ere ọvo ho, ọ rẹ jẹ daoma re ọ gbẹ kẹle eyae efa ga hrọ họ.—w24.11, ẹwẹ. 19.

Fikieme ma rọ ta nọ ẹme nọ ọ rrọ obe Jọn 6:53 na, u dhesẹ oware nọ a re ru evaọ Emu Owọwọ Olori na ha?

Obe Jọn 6:53 o ta nọ o roja re a re uwo-oma Jesu jẹ da azẹ riẹ. Ukpe 32 C.E. Jesu ọ rọ ta ẹme yena evaọ obọ Galili. Yọ ahwo Ju nọ a ri fi ẹrọwọ họ iẹe he ọ ta ẹme na kẹ. Rekọ Emu Owọwọ Olori na yọ oware nọ Jesu o muhọ kugbe ikọ riẹ nọ ukpe ọvo o vrẹ no evaọ obọ Jerusalẹm. Ahwo nọ Jesu ọ ta ẹme kẹ nọ a je ru Emu Owọwọ na yọ ahwo nọ a ti lele iei su evaọ obọ odhiwu.—w24.12, ẹwẹ. 10-11.