Me Wo Isiuru Kpahe Ọmọzae Hayo Ọmọtẹ Ibe Mẹ—Kọ Onana U Dhesẹ nọ Me Wo Uruemu Ezae nọ I re Lele Ezae Wezẹ?

Vievie.

Uzẹme na họ: Ẹsibuobu, isiuru kpahe ọmọzae hayo ọmọtẹ ibe ohwo i re lehie he.

Ere ọmọtẹ jọ nọ ọ rrọ ikpe 16 nọ a re se Lisette o vuhumu, ọnọ o wo isiuru kpahe ọmọtẹ ibe riẹ evaọ oke jọ. Ọ ta nọ: “Oke nọ ma je wuhrẹ kpahe epanọ ugboma ohwo o rrọ evaọ isukulu, a wuhrẹ omai nọ, nọ ohwo ọ tẹ kpako te ikpe ikpegbọ no, isiuru owezẹ i re kpotọ kpehru. U mu omẹ ẹro nọ otẹrọnọ izoge a riẹ kpahe oghẹrẹ nọ ugboma rai na o rrọ, a te riẹ nọ isiuru nọ ohwo o re wo kpahe ọmọzae hayo ọmọtẹ ibe rai i re lehie he yọ onana u dhesẹ nọ ohwo na o wo uruemu ezae nọ i re lele ezae wezẹ hẹ.”

Kọ ẹvẹ otẹrọnọ isiuru nọ who wo kpahe ọmọzae hayo ọmọtẹ ibe ra e be rọwo no owhẹ udu hu? Kọ Ọghẹnẹ ọ rrọ eva gaga nọ ọ rọ ta nọ makọ ohwo nọ o wo isiuru kpahe ọmọzae hayo ọmọtẹ ibe riẹ ọ rẹ whaha uruemu ezae nọ i re lele ezae wezẹ?

Otẹrọnọ Ee who yo kẹ onọ urere na, riẹ nọ iroro itieye na e rọwo kugbe iroro ethọthọ nọ ahwo a wo inọ ohwo o re ru lele oghẹrẹ isiuru owezẹ kpobi nọ o wo. Ebaibol na o bru ọghọ họ ahwo-akpọ oma nọ ọ rọ ta vevẹ inọ orọnikọ ekpehre isiuru owezẹ kpobi nọ ohwo o wo o re ru lele he.​—Ahwo Kọlọsi 3:5.

Areghẹ ọ rrọ ohrẹ Ebaibol nana. Uzi Ebaibol ovona o rrọ rọkẹ ahwo nọ a wo isiuru kpahe ọmọzae hayo ọmọtẹ ibe rai, gbe isiuru owezẹ nọ e rẹ jọ udevie emetẹ avọ emezae inọ a “si oma rai no egbegbe” koyehọ ọfariẹ-ogbe. (1 Ahwo Kọrint 6:18) Uzẹme na họ, emetẹ gbe emezae buobu nọ i wo isiuru owezẹ nọ e gwọlọ ru lele izi Ebaibol a bi siomano ọfariẹ-ogbe dede nọ edawọ i bi te ai. Otu nọ i wo isiuru owezẹ kpahe emezae hayo emetẹ ibe rai a rẹ sai ru epọvo na re otẹrọnọ a gwọlọ ru Ọghẹnẹ eva were.​—Iziewariẹ 30:19.