A Kẹ Iyo Enọ Epastọ Jọ

Eliso yọ omọvo Isẹri Jihova. Ẹdẹ jọ nọ ọ jẹ rọ Ebaibol na wuhrẹ aye jọ, epastọ jọ avọ aye riẹ a tẹ kpahe aye na. Eliso o yo kpahe ọzae-avọ-aye nana inọ ọmọzae ọvo nọ a yẹ o whu kẹle na.

Nọ Eliso ọ ta kẹ ae nọ o kẹ riẹ uye gaga inọ ọmọzae ọvo nọ a yẹ o whu, epastọ na avọ aye riẹ a te muhọ ẹviẹ gaga. Kẹsena epastọ na ọ tẹ ta avọ ofu nọ: “Mẹ riẹ oware nọ Ọghẹnẹ ọ rọ kuvẹ kẹ odawọ nana ha! Fikieme Ọghẹnẹ ọ rọ rehọ ọmọzae ọvo nọ me wo mi omẹ? Anwọ ikpe 28 ena nọ mẹ be rọ gọ Ọghẹnẹ, je bi ru eware iwoma. Who rri oghẹrẹ nọ Ọghẹnẹ ọ rọ hwosa kẹ omẹ! Fikieme Ọghẹnẹ o ro kpe ọmọzae mẹ?”

Eliso o te dhesẹ vevẹ kẹ ọzae-avọ-aye na inọ orọnikọ Ọghẹnẹ ọ rehọ ọmọ rai hi. Ọ tẹ jẹ ta kpahe eware wọhọ ẹtanigbo na, ẹkparomatha na, gbe oware nọ Ọghẹnẹ ọ rọ kuvẹ re eware iyoma e via. Epastọ na avọ aye riẹ a tẹ ta kẹ Eliso nọ ọ kẹ iyo enọ nọ a be hae lẹ se Ọghẹnẹ kpahe anwẹdẹ no.

Evaọ oka nọ u lele i rie, epastọ na avọ aye riẹ a tẹ wariẹ zihe ze je kuomagbe aye na evaọ oke nọ Eliso o je wuhrẹ iẹe Ebaibol na. Eliso o je wuhrẹ aye na uzoẹme na “Uvi Ẹruore kẹ Iyoyou Ra nọ I Whu No,” evaọ obe na Eme Ebaibol na O Gine Wuhrẹ? Ọzae-avọ-aye na a kpahe fihọ ziezi evaọ uwuhrẹ na.

Uwhremu na, ọzae-avọ-aye na a te kpohọ okokohọ obọdẹ Isẹri Jihova jọ nọ a ru evaọ ẹwho Tbilisi, nọ o rrọ orẹwho Georgia. A muẹrohọ uyoyou gbe okugbe nọ o rrọ udevie Isẹri Jihova evaọ okokohọ na yọ onana u duobọte ai udu. Eware nana a be daoma wuhrẹ ahwo ichọche rai anwẹdẹ, rekọ ahwo ichọche rai a be sai dhesẹ iruemu nana ha.