Heather Broccard-Bell/iStock via Getty Images
KỌ ẸMA A MA RIẸ?
Ekpe Ofe nọ A re Se Diabolical Ironclad Beetle
Ofẹ ẹkpẹlobọ ovatha-ọre America a rẹ jọ ruẹ ofe nana nọ a re se diabolical ironclad beetle (Phloeodes diabolicus). Ahwo nọ a rẹ kiẹ kpahe eware a ta nọ oware nọ o make rọ akwa idu ọgbagbizii (39,000) soso gbẹdẹ vi ofe nana ọ tẹ ruọ ehru riẹ, u re ru ei oware ovo ho. A tubẹ ta nọ omoto ọ tẹ dhẹ ehru ofe nana vrẹ dede, o re whu hu. Ẹvẹ eware nọ e gbẹdẹ tere e sae rọ jọ ehru ofe nana ọ vẹ gbẹ zọ ghele?
Whọ rẹ jọ abotọ ofe nana ruẹ igbuhru evaọ oria nọ ekpe obehru na avọ ọrọ obotọ na e jọ whẹgbe. Ugbuhru na jọ ọ rrọ gaga, ọ rẹ kake nẹ rueva ha, onọ u re ru nọ ofe na ọ gbẹ rọ kake pẹhẹ hẹ. U wo ugbuhru ọfa nọ ọ nwane ga te ọrọ ọsosuọ na ha, nọ ọ rẹ lẹliẹ ekpe na dina nẹ rueva omojọ. U te je wo ugbuhru avọ esa nọ ọ rrọ lọlọhọ, nọ ọ rẹ lẹliẹ ekpe na nẹ rueva ziezi. Ugbuhru avọ esa nana oye u re ru nọ ofe nana ọ sae rọ keke oma họ ohọrọ ure hayo dhere imighogho nọ e rrọ itho nọ e rrọ kekeke gaga.
U te no ere no, uko nọ o rrọ uke riẹ na u wo akọ nọ e jẹhọ ohwohwo. Onana u re ru nọ ekpe riẹ na ọ rẹ rọ dina nẹ ro ọvo nọ oware ogbẹgbẹdẹ o tẹ nẹe. Eware nana nọ e jẹhọ ohwohwo na e wọhọ eware nọ a rọ hwa ehru ohwohwo, a tẹ gọmo rai kugbe. Nọ oware jọ ọ tẹ nẹ ekpe ofe na, egọmo na ọ vẹ dina va re o siọ ofe na ba ẹpẹhẹ. Kẹsena eria na nọ e va na e vẹ ta ruẹrẹhọ.
Ekpe uke riẹ na o wo akọ nọ e jẹhọ ohwohwo
Oka ọwawae na o bi dhesẹ igbuhru evaọ oria nọ ekpe obehru ofe nana avọ ekpe obotọ na e jọ whẹgbe. Oka ọviẹviẹ na o bi dhesẹ eware nọ e jẹhọ ohwohwo evaọ uko nọ o rrọ udevie uke na
Ahwo nọ a rẹ kiẹ kpahe eware a ta nọ a sai rri ofe nana ro ru eware nọ u fo nọ a rẹ bọ gaga re e seba ẹraha. Eware wọhọ imoto, akwa nọ a rẹ bọ fihọ ethẹ, gbe iwou.
Ẹvẹ who roro? Kọ ekpe ofe nọ a re se diabolical ironclad beetle na o mu romavia? Manikọ ẹma a ma riẹ?