Ọghẹnẹ Ọ Dawo Ẹrọwọ Abraham

WHỌ sae ruẹ oware nọ Abraham ọ be jọ etenẹ ruẹ na? O kru aghae, yọ o wọhọ nọ o bi ti kpe ọmọ riẹ. Fikieme o je ru oware utioye? Orọ ọsosuọ, ma ruẹ epanọ Abraham avọ Sera a ro wo ọmọzae rai.

Kareghẹhọ, Ọghẹnẹ ọ ya kae nọ a re ti wo ọmọzae. Rekọ o wọhọ nọ oyena o sae jọ họ keme Abraham avọ Sera a kpako gaga no. Dede, Abraham o wo ẹrọwọ nọ Ọghẹnẹ ọ sai ru oware nọ o rẹ bẹbẹ. Kọ eme ọ via?

Nọ Ọghẹnẹ ọ ya eya riẹ no, ukpe soso o vrẹ. Kẹsena, nọ Abraham ọ jọ ikpe 100 yọ Sera ọ rọ ikpe 90, a te wo ọmọzae ọboba nọ a re se Aiziki. Ọghẹnẹ o koko eya riẹ!

Rekọ nọ Aiziki ọ kpako omojọ no, Jihova ọ tẹ dawo ẹrọwọ Abraham. O te se: ‘Abraham!’ Abraham o te yo nọ: ‘Mẹ rọ etenẹ!’ Kẹsena Ọghẹnẹ ọ tẹ ta nọ: ‘Rehọ ọmọzae ra, ọmọzae ọvuọvo ra na, Aiziki, re who kpohọ obọ ugbehru nọ me ti dhesẹ k’owhẹ. Jọ etẹe kpe ọmọzae ra re whọ rehiẹe dhe idhe.’

Ẹvẹ eme eyena e kẹ Abraham ọkora te, keme Abraham o you ọmọzae riẹ gaga. Yọ, kareghẹhọ, Ọghẹnẹ ọ ya nọ emọ Abraham e te ria otọ Kenan. Rekọ ẹvẹ oyena o sae rọ via otẹrọnọ Aiziki o whu no? Abraham ọ riẹ otọ onana ha, dede yọ o yo ẹme Ọghẹnẹ ghele.

Nọ o te obọ ugbehru na, Abraham ọ tẹ gba Aiziki fihọ agbada-idhe nọ o vi. Koyehọ ọ tọlọ aghae re o ti kpe ọmọzae riẹ. Rekọ nwane eva oke oyena ẹnjẹle Ọghẹnẹ o te se: ‘Abraham, Abraham!’ Abraham o te yo: ‘Mẹ rọ etenẹ!’

‛Whọ nwa ọmọ na oma hayo rue’i oware ovuovo ho,’ ere Ọghẹnẹ ọ ta. ‘Enẹna mẹ riẹ nọ who wo ẹrọwọ kpahe omẹ, keme who si ọmọzae ra, tobọ ọvuọvo ra na, no omẹ hẹ.’

Didi ẹrọwọ ologbo Abraham o wo kpahe Ọghẹnẹ! Ọ rọwo nọ oware ovuovo o rẹ bẹ Jihova eruo ho, gbe nnọ Jihova ọ tubẹ sae kpare Aiziki no uwhu tha. Rekọ orọnikọ ghinọ oreva Ọghẹnẹ nnọ Abraham o kpe Aiziki hi. Fikiere Ọghẹnẹ o te ru nọ ogodẹ jọ ọ rọ yagha odi jọ nọ ọ kẹle etẹe, ọ tẹ ta kẹ Abraham nọ ọ rehọ ọye dhidhe, se ọmọzae riẹ ba.