Ọmọ-Eruẹ Oro Na

OH, OH! Eme ahwo na a bi ru enẹna? A be lẹ se ọmọ eruẹ! Fikieme a je bi ru onana?

Okenọ Mosis ọ ria ehru ugbehru na oke krẹkri no, ahwo na a tẹ ta nọ: ‘Ma riẹ oware nọ ovia kẹ Mosis hi. Fikiere wha jo ma ru ọghẹnẹ re osuomai no otọ onana no.’

‘Ere owoma,’ ere Erọn oniọvo-ọmọzae Mosis ọ tae. ‘Wa si emero oro ezọ rai no, re wha rehae se omẹ.’ Nọ ahwo na a ru ere, Erọn ọ tẹ ghrae kugbe ọ tẹ rehae ma ọmọ-eruẹ oro. Ahwo na a tẹ ta nọ: ‘Ọnana họ Ọghẹnẹ mai, ọnọ osu omai no Ijipti ze!’ Koyehọ Ahwo-Izrẹl a te ru eha ilogbo, a tẹ gọ ọmọ-eruẹ oro na.

Okenọ Jihova ọ ruẹ onana, eva e tẹ dhae gaga. Fikiere ọ tẹ ta kẹ Mosis nọ: ‘Nwotọ vẹrẹ. Ahwo abi ru uruemu uyoma. Izi mẹ e thọ rai ẹro no, a te bi kigwẹ kẹ ọmọ-eruẹ.’

Mosis o te nwotọ no ugbehru na ze kpatakpata. Okenọ o bi kẹle, onana họ onọ ọ ruẹ. Ahwo na a be so ile jebigbe eha wariẹ ọmọ-eruẹ oro nahọ! Eva e tẹ dha Mosis thesiwa, ọ tẹ rehọ itho ekpakpala ivẹ nọ izi erọ na gbolo fiotọ e tẹ bẹre ekekẹ buobu. Koyehọ ọ tẹ rehọ ọmọ-eruẹ oro na ọ tẹ ghra riẹ totọ. Ọ jẹ lọe zihe ruọ ovu.

Ahwo na a ru oware nọ uyoma gaga. Fikiere Mosis ọ tẹ ta kẹ ezae jọ re a tọlọ egbọdọ rai. ‘Ahwo yoma nọ agọ ọmọ-eruẹ oro na a re whu hrọ,’ ere Mosis ọ tae. Fikiere ezae na a tẹ tehe ahwo 3,000 kpe! Kọ onana ugbe dhesẹ nọ ufore ma sẹro oma re ma gọ Jihova ọvo, siọ eghẹnẹ erue efa ba?