Ọghẹnẹ Ọyaeya Aparadase

ONANA họ ifoto aparadase, o sae jọ nọ oghẹrẹ utiona Ọghẹnẹ odhesẹ kẹ Aizaya ọruẹaro riẹ. Aizaya ọ jọ nọ Jona ọ nwane vrẹ no.

Aparadase otọ riẹ họ “ọgbọ” hayo “ogege.” Kọ okareghẹhọ owhẹ oware jọ nọ ma ruẹ vrẹ no evaọ obe onana? O tho ogege owowoma na onọ Ọghẹnẹ o ru kẹ Adamu avọ Ivi, o gbe thoi? Rekọ akpọ na kpobi ọ sae te ghinẹ jọ aparadase?

Jihova ọ ta kẹ Aizaya ọruẹaro riẹ re okere kpahe aparadase ọkpokpọ nọ ọ be tha kẹ ahwo Ọghẹnẹ. Ọ ta nnọ: ‘Erao-ijihẹ avọ imigodẹ a te ria kugbe evaọ udhedhẹ. Emọ iruẹ gbe emọ ikpohrokpo a te re kugbe, emaha efofa erẹ te sẹro rae. Ọmọfofa dede ọ rẹ te nwa oma ha ọ tẹ ma ke zaharo kẹle araomuomu nọ o wo obi.’

‘Onana orẹ sae via ha,’ ere ibuobu erẹ ta. ‘Oke kpobi uye orọ rọ akpọ na, yọ oke kpobi orẹ jọ.’ Rekọ dai rorie: Didi oghẹrẹ oria Ọghẹnẹ ọ rọ kẹ Adamu avọ Ivi?

Ọghẹnẹ o fi Adamu avọ Ivi họ evaọ aparadase. Fiki epanọ a ghọ ẹme Ọghẹnẹ eyo jabọ nọ a je ku oria owoma rai kufiẹ, a tẹ who je whu. Ọghẹnẹ ọ tẹ y’eya nọ eware nọ Adamu avọ Ivi a kufiẹ na ọ rẹ te rehae kẹ ahwo nọ a you rie.

Evaọ aparadase ọkpokpọ nọ ọ be tha na oware ovuovo nọ o rẹ nwa oma hayo raha ọraha orẹ te jọhọ. Udhedhẹ ogbagba o rẹ te jọ. Ahwo kpobi a rẹ te jọ omokpokpọ jẹ ghọghọ. O rẹ te jọ wọhọ epanọ Ọghẹnẹ ọ gwọle riẹ nọ ojọ evaọ emuhọ. U te vienẹ ma re ti wuhrẹ edhere nọ Ọghẹnẹ ọ te rọ rehọ onana tha.