Ẹnyaruọ Uwou Nọ Akare

OKENỌ Pita avọ Jọn a no uki nọ ori Jesu ọjọ no, Meri ọvo o te kiọkọ etẹe. O te muhọ ẹviẹ. Kẹsena o te ruwẹ bi rri evaọ uki na, wọhọ epanọ ma ruẹ evaọ ifoto urere na. Etẹe ọ jẹ ruẹ enjẹle ivẹ! A tẹ nọe nnọ: ‘Eme whọ jẹ be viẹ?’

Meri o te yo nọ: ‘A wọ Olori mẹ vre no, yọ mẹ riẹ obo nọ a fi rie họ họ.’ Kẹsena Meri o te ku oma rẹriẹ ọ tẹ ruẹ ọzae jọ. Ọ tẹ nọe nnọ: ‘Ono whọ be gwọlọ?’

Meri o te roro ọzae na họ ọruẹrẹ-ọgbọ, yọ otiẹse jọ ọye ọ wọ ori Jesu rehọ na. Oye jabọ ọ rọ ta nọ: ‘Otẹrọnọ whọ wọ riẹ rehọ, dhesẹ obo nọ who fi rie họ k’omẹ.’ Rekọ, ọzae ọnana họ Jesu. Ọ rehọ oma nọ Meri o vuhu hu. Rekọ okenọ ọ rehọ odẹ riẹ sei, Meri ọ tẹ riẹ nọ Jesu ọna. Ọ tẹ dhẹ nyae vuẹ ilele na nnọ: ‘Mẹ ruẹ Olori na no!’

Uwhremuna evaọ ẹdẹ ọyena, okenọ ilele ivẹ riẹ a jẹ nya kpobọ iwhre Emeọs, ọzae jọ o te kuoma gbae. Yọ ilele na a bi weri gaga fikinọ a kpe Jesu no. Rekọ epanọ a be rọ nya na ọzae na ọ tẹ fa otọ eware buobu no Ebaibol ze nọ i ru rae oma sasa. Ukuhọ riẹ nọ a doma ji re a re emu, ilele na i te vuhu nọ ọzae ọnana Jesu. Koyehọ Jesu ọ tẹ rayẹ, ilele ivẹ enana a tẹ nya vẹrẹ zihe kpobọ Jerusalem re a vuẹ ikọ na kpahiẹe.

Okenọ oyena o be nya haro, Jesu ọ tẹ rọ oma via kẹ Pita re. Okenọ enọ ikiọkọ a yo onana eva etẹ werae gaga. Kọ ẹsiẹe ilele ivẹ enana a kpobọ Jerusalem a tẹ ruẹ ikọ na. A tẹ ta kae epanọ Jesu ọrọ via kae re evaọ obọ edhere. Kọ okenọ a gbẹ rọ onana ẹta kpahe na, whọ riẹ oware ugbunu nọ ovia?

Rri ifoto na. Jesu ọ tẹ jọ etẹ r’oma via kae evaọ uwou na, dede nọ a ma ke kare ẹthẹ na. Ẹvẹ oma owere ilele na te! Kọ ẹdẹ ọyena ọ gbẹ jọ ọrọ oghọghọ ulogbo? Kọ whọ sai kele unuẹse nọ Jesu ọ via kẹ ilele riẹ no enẹna? Isiasoi who kele?

Okenọ Jesu ọ r’oma via na yọ Tọmas ukọ na ọ jọ kugbai hi. Fikiere ilele na etẹ ta kẹe nọ: ‘Ma ruẹ Olori na!’ Rekọ Tọmas ọ tẹ ta nọ ọye ọvo ọ rẹ ruẹ Jesu tao re ọ tẹ rọwo. Whaọ, nọ edẹ eree eze vrẹ no ilele na a tẹ wariẹ kokohọ evaọ uwou nọ akare, yọ Tọmas ọ rọ kugbai ọkpọna. Idudhe na, Jesu ọ tẹ jọ etẹ via kae evaọ uwou na. Enẹna Tọmas ọ tẹ rọwo.