Uzou 14

‘Mẹ Reọvọ Uvie Kugbe Owhai’

1. Aso taure Jesu o te ti whu, didi ẹruore o fihọ obaro kẹ ikọ riẹ?

EVAỌ aso taure a te ti kpe Jesu ọ rọ ta kẹ ikọ riẹ nọ i wo ẹrọwọ nọ: “Evaọ uwou Ọsẹ mẹ eria i re buobu. Mẹ be nya e ruẹrẹ oria kẹ owhai, re oria nọ mẹ rọ wha rẹ te jọ etẹe re.” Ọ tẹ jẹ ta kẹ ae nọ: “Mẹ reọvọ kugbe owhai, wọhọ epanọ Ọsẹ mẹ ọ reọvọ uvie kugbe omẹ.” (Jọn 14:2, 3; Luk 22:29, NW ) Ẹvẹ ẹruore nọ o fihọ aro rai o gbunu te!

2. Bro ahwo a ti wo abọ kugbe Kristi evaọ Uvie obọ odhiwu riẹ?

² Dede, orọnikọ Jesu o bi dhesẹ nọ ikọ yena ọvo i ti su kugbe ei evaọ Uvie obọ odhiwu hu. A ru rie via uwhremuna nnọ 144,000 nọ a ta no otọakpọ na a ti wo uvẹ ulogbo oyena. (Evia. 5:9, 10; 14:1, 4) Kọ ejọ nẹnẹ na a be gwọlọ lei te obọ?

Ekokohọ Eriuku Uvie Na

3. Evaọ odibọgba riẹ, didi uvẹ Jesu o si iroro kpohọ?

³ Nọ Herọd Antipas ọ kare Jọn Ọhọahwo-ame na fihọ uwou-odi no, Jesu ọ tẹ ruabọhọ usiuwoma ota nọ o jẹ kpọ iroro vi ọ “uvie odhiwu” na. (Mat. 4:12, 17) Ọ jẹ ahwo riẹ nọ uvẹ o rọ kẹ ai nọ a rẹ sai rọ ruọ Uvie yena, yọ ilele riẹ a jẹ daoma tu haro kẹ osa oyena.—Mat. 5:3, 10, 20; 7:21; 11:12.

4. (a) Oke vẹ a rọ rehọ ẹzi ọfuafo na ro wholo ilele ọsosuọ Jesu? (b) Eme u dhesẹ nọ no umuo oke yena vrẹ a rẹriẹ ovao ku ekoko ereuku Uvie na?

⁴ Evaọ Pẹntikọst 33 C.E. a rọ ẹzi ọfuafo na ro wholo erọ ọsosuọ rai. (Iruẹru 2:1-4; 2 Kọr. 1:21, 22) A te ru ọruẹrẹfihotọ usiwo Ọghẹnẹ nọ o bi su kpohọ uzuazọ ebẹdẹ bẹdẹ evaọ obọ odhiwu via. Pita ọ rehọ “isiavẹ uvie odhiwu” na ro rovie eriariẹ enana via—orọ ọsosuọ rọ kẹ ahwo Ju, u te te ahwo Sameria, uwhremuna kọ ahwo erẹwho Egedhọ na. (Mat. 16:19) Egọmeti nọ o bi ti su ahwo evaọ ikpe 1,000 na a tẹ rẹriẹ ovao ku ei ziezi, yọ inwene ileta Ikereakere Ileleikristi Grik na kpobi e kake kpọ ovao rai rri ereuku Uvie na—“erezi na,” “ogbẹghale use obọ odhiwu na.”a

5. Kọ use kpohọ uzuazọ obọ odhiwu rai na u dhesẹ nọ a woma viọ idibo Ọghẹnẹ nọ e kake rria no vẹre?

⁵ Inọ a se rai kpohọ uzuazọ obọ odhiwu u dhesẹ nọ a nwani woma viọ idibo Ọghẹnẹ kpobi nọ i whu taure ẹdẹ Pẹntikọst 33 C.E. o te ti te he. (Mat. 11:11) Ukpoye, Jihova o muọ ahwo họ ẹsalọ no nọ e te jọ ibe isu kugbe Jesu Kristi. Ole ikpe udhusoi ẹko 19 nọ e vrẹ no, use ovuọvo o jariẹ, orọ obọ odhiwu. Oyena yọ aruoriwo gheghe nọ Ọghẹnẹ o ku kuọ umutho ahwo rọ kẹ ẹnyaharo ẹjiroro gbe areghẹ oyoyou obọ riẹ.—Ẹf. 2:8-10.

6. (a) Fikieme oke o jẹ te tha nọ use obọ odhiwu na o ti ro kuhọ? (b) Ono ọ rẹ te kpọ eware re eruẹaruẹ kpahọ “otu obuobu” na ọ ziọ orugba re, yọ eme o ghinẹ via no?

⁶ Nọ oke o be nyaharo na umutho ahwo 144,000 e rẹ te gba no. Oka okahọ urere Izrẹl ẹzi na wọhọ epanọ a jẹ rai rehọ o be te kẹle ino. (Evia. 7:1-8) Okioye, Jihova, ẹkwoma ẹzi riẹ ze jegbe otoriẹ Ẹme riẹ nọ o ru lọhọ kẹ ukoko riẹ nọ a rẹ ruẹ, ọ vẹ te kpọ eware re o je ru abọ ẹjiroro ọfa riẹ gba, wọhọ epanọ a dhesẹ evaọ Eviavia 7:9-17. “Otu obuobu” nọ i no erẹwho kpobi ze a ti koko ai họ, avọ ẹruore ogbunu ẹzọ no uye ulogbo na jegbe ẹria ebẹdẹ bẹdẹ evaọ ẹgbagba evaọ Aparadase otọakpọ. Nọ ma te roro kpahọ oware nọ o ghinẹ r’oma via no, o wọhọ nọ use obọ odhiwu na o gba no oware wọhọ ukpe 1935 C.E., okenọ ẹruore otọakpọ “otu obuobu” na a ro vuhu iei mu ziezi. No anwọ oke yena ze a rọ rehọ ima buobu enọ e be gọ Jihova nọ i wo ẹruore ẹria ebẹdẹ bẹdẹ evaọ otọakpọ obonẹ rọ ze kugbe idu ekakao enọ i kiọkọ nọ e rọ ẹko obọ odhiwu na.

7. Kọ o lọhọ re ejọ nọ e rọ nẹnẹ na dede a wo use obọ odhiwu, kọ fikieme whọ jẹ kẹ uyo ere?

⁷ Kọ onana u dhesẹ nọ Ọghẹnẹ o gbebi se ohwo ọvuọvo kẹ uzuazọ obọ odhiwu ha? Bẹsenọ a rẹ k’oka urere na họ no, o rẹ sae via nọ ejọ nọ i wo ẹruore ọyena a sae kare ẹrọwọ, kẹsena a vẹ salọ amọfa ro nwene oria rai. Rekọ a tẹ ta nọ a roro iei, onana o rẹ kake via ha.

Emọ Ẹzi—Ẹvẹ A rọ Riẹ?

8. Didi oruvẹ Pọl ọ kẹ ro dhesẹ oghẹrẹ nọ enọ ẹzi ọfuafo oyẹ a sae rọ ghinẹ riẹ?

⁸ Ẹzi Ọghẹnẹ ọ rẹ kẹ imuẹro ọjẹrehọ wọhọ emọ ẹzi rọ kẹ Ileleikristi nọ e họ-ame no nọ i wo use obọ odhiwu na te obọ no. Pọl ukọ na o dhesẹ onana nọ o kere se “erezi” na evaọ obọ Rom, je dhesẹ eyero Ileleikristi uzẹme kpobi evaọ oke oyena. Ọ ta nọ: “Keme utho ahwo kpobi nọ Ẹzi Ọghẹnẹ o re suo, ae họ emọ Ọghẹnẹ. Keme wha mi ẹzi igbo nọ owha rẹ rọ dhẹ ozọ họ; rekọ wha mi ẹzi nọ o ru owhai emọ, onọ ma je bo nọ, ‘Abba! Ọsẹ!’ Ukpuzou oma Ẹzi na ọvo ọrọ izi mai isẹri ese kẹ nọ mai arọ emọ Ọghẹnẹ. Ma tẹ rọ emọ, koyehọ ereuku; ereuku Ọghẹnẹ, ereuku kugbe Kristi; thakpinọ ma lele irie gbẹ ruẹ uye re ma gbe lele ie wo oruaro re.”—Rom 1:7; 8:14-17.

9. Ẹvẹ ‘ẹzi na ọvo omariẹ o ro sisẹri’ kugbe izi enọ e ghinẹ rọ emọ Ọghẹnẹ?

⁹ Efihiruo ivẹ ọrọ ubiẹme “ẹzi” na a jọ etenẹ si iroro mai kpohọ: “Ẹzi na ọvo” gbe “izi mai.” Orọ ọsosuọ na yọ ogaga iruo Ọghẹnẹ nọ a rẹ ruẹ hẹ. Orẹ jọ evaọ emọ ẹzi riẹ, kẹ imuẹro nọ a jẹ rai rehọ wọhọ emọ uyẹ Ọghẹnẹ. Ẹzi ọyena o re je se isẹi ẹkwoma Ẹme Ọghẹnẹ nọ a rọ ogaga riẹ kere, Ebaibol na, nọ o wọhọ ileta obọ riẹ se emọ ẹzi riẹ. (1 Pit. 1:10-12) Okenọ enọ ẹzi ọfuafo o yẹ na a te se oware nọ Ikereakere na e ta kẹ enọ e rọ emọ ẹzi Ọghẹnẹ, a vẹ kẹ uyo ziezi nọ: ‘Oyena u kpoma họ omẹ.’ Koyehọ ogaga iruo Ọghẹnẹ evaọ idhere sasa o bi se isẹi kugbe ẹzi rai, ẹgba nọ ọ be kpọ iroro gbe udu rai, inọ ae yọ emọ Ọghẹnẹ. Rọwo kugbe oware nọ ẹzi Ọghẹnẹ o dhesẹ, a fi iroro gbe udu rai họ ẹruore ẹjọ ibe ereuku kugbe Kristi, yọ a jẹ ewha-iruo enọ e rọ emọ ẹzi Ọghẹnẹ rehọ.—Fil. 3:13, 14.

10. (a) Didi ekwakwa e rẹ nwani dhesẹ nnọ ohwo ọ rọ Oleleikristi nọ a wholo ho? (b) Didi eriwo “igodẹ efa” na a wo kpahọ oria rai evaọ ẹjiroro Ọghẹnẹ?

¹⁰ Kọ oyena o rọ uzẹme k’owhẹ? Otẹrọ ere, yọ who wo uvẹ ulogbo. Dede na, o rẹ jọ thọthọ rọ kẹ ohwo re o roro nọ fikinọ ohwo o wo ovuhumuo kẹ eware ididi ẹzi hayo o wo ọwhọ evaọ iruo odibọgba na hayo fikinọ o wo uvi uyoyou kẹ inievo riẹ koyehọ ọ nwane rọ Oleleikristi nọ a rehọ ẹzi ro wholo no ho. “Igodẹ efa” buobu a wo eghẹrẹ iruemu eyena. Eware nọ a be jọ Ikereakere na se kpahe ibe ereuku Kristi i bi duobọ te udu rai re, rekọ a bi siokpuru viri oware nọ Ọghẹnẹ ọ seba kẹ ai ha ha. (Wawo Ikelakele 16:1-40.) A vuhu ẹjiroro ọsosuọ Ọghẹnẹ kpahọ otọakpọ na yọ a bi ruiruo avọ ovuhumuo kpohọ abọ o wo kugbei.

E te Ọnọ Ọ rẹ Re

11. Amono a rẹ nya kpohọ eha ekareghẹhọ uwhu Jesu kukpe kukpe, kọ fikieme?

¹¹ Kukpe kukpe, evaọ Nisan 14, nọ ọre o te kiediwi no, ilele Jesu Kristi nọ a wholo evaọ abọ otọakpọ na soso a re ru eha ekareghẹhọ uwhu riẹ, rọ rọwo kugbe ohrẹ nọ ọ kẹ ikọ riẹ. (Luk 22:19, 20) “Igodẹ efa” na a rẹ nya re, wọhọ enọ i ti wo abọ kugbe ẹre gbe ẹda ebrẹdi gbe udi na ha, rekọ wọhọ iriughe nọ i bi dhesẹ adhẹẹ.

12. Ẹvẹ Ileleikristi ọsosuọ jọ evaọ Kọrint a gbe je ro dhesẹ uvi ovuhumuo kẹ Emu Owọwọ Olori na ha?

¹² Onana o rọ nọ eha ofofe egagọ gheghe he rekọ o vọ avọ otofa nọ u wo ẹgba. Ro se Ileleikristi ikpe udhusoi ọsosuọ nọ e jọ Kọrint, Grisi, ejọ nọ i dhesẹ uvi ovuhumuo kẹ eha na ha, Pọl ukọ na o te kere ohrẹ ọgaga, ta nọ: “Ohwo o gbe te re ọ tẹ re ebrẹdi ọnana jẹ da egho Ọnowo na ha, yọ ọ re-abe jẹ raha oma gbe azẹ Ọnowo na.” Eme o soriẹ nọ a gbe ro ‘te’ kẹ ẹre he? A jẹ ruẹrẹ udu gbe iroro rai fihọ ziezi hi. Oma-ohẹriẹ o jọ udevie ukoko na. Ofariẹ, ejọ rẹ re okpore jẹ da vrẹ oma taure oke ewuhrẹ o te ti te. A te je ru Emu Owọwọ Olori na evevere. A jọ otọ eyero nọ a rẹ rọ riẹ oghẹrẹ nọ ebrẹdi gbe udi na u wo otofa te he.—1 Kọr. 11:17-34.

13. Eme họ otofa ebrẹdi gbe udi nọ a rẹ wọ evaọ oke Ekareghẹhọ na?

¹³ Eme họ otofa yena? Oyena o rọ oma rẹrẹ ẹfake ta nọ a be rehọ edhere igbunu ro nwene ebrẹdi gbe udi na ha. A gbẹ be wariẹ Kristi ro dhidhe vievie he eva keha keha Ekareghẹhọ. Ikereakere na i dhesẹ nọ “[Kristi] ọ rehọ oma riẹ kẹ ẹsiẹvo no rọ wha izieraha ibuobu.” (Hib. 9:28, ẹjẹlẹ ibieme na omai; 10:10; Rom 6:9) Ukulu ebrẹdi nọ o kare ẹvi gbe udi owawae na e faki dhesẹ ugboma idhe Jesu gbe azẹ riẹ nọ o hwẹ. Rekọ ẹvẹ eware nana e ghare te! A rehọ ugboma ogbagba Jesu kẹ re akpọ ahwo na ọ sai wo uvẹ ẹria ebẹdẹ bẹdẹ. (Jọn 6:51) Yọ azẹ riẹ nọ o hwẹ o ru ẹjiroro ivẹ gba—ahwo nọ i wo ẹrọwọ fihọ iẹ o re ru ai fo no izieraha, jegbe ọvọ ọkpokpọ na nọ ọrọ udevie Ọghẹnẹ jegbe ukoko Izrẹl ẹzi riẹ nọ o re ro mu iruo họ, nọ Ileleikristi nọ a rehọ ẹzi wholo na i ru gba. (1 Jọn 1:7; 1 Kọr. 11:25; Gal. 6:14-16) Eruẹrẹfihotọ eghaghae enana i ru rie lọhọ nọ a ro whowho “uthuru okakao” na kiẹrẹe evaọ aro Ọghẹnẹ, nọ a rọ ghinẹ rehọ ẹgbagba ohwo ro ru ai ọghọ. (Luk 12:32) A ru onana re ẹzi ọfuafo ọ sai yẹ ai wọhọ emọ ẹzi Ọghẹnẹ, jegbe re a wo abọ kugbe Kristi evaọ Uvie obọ odhiwu riẹ. Nọ a be re ebrẹdi jẹ da udi Ekareghẹhọ kukpe kukpe na, jẹ be rehọ ere se isẹi kpahọ ẹruore odhiwu rai, ovuhumuo “ọvọ ọkpokpọ” rai nọ Kristi o guọvunu riẹ na a vẹ wariẹ ru ei kpokpọ je diwi viere.—Hib. 8:6-12.

‘Ma re Lele Owhai’

14. (a) Fikieme “igodẹ efa” na a gbẹ rọ re ebrẹdi Ekareghẹhọ na jẹ da udi na ha, rekọ eme a be hẹrẹ avọ evawere? (b) Ẹvẹ a riwi usu rai kugbe ikiọkotọ ereuku Uvie na?

¹⁴ “Igodẹ efa” na a wo otoriẹ kpahe oghẹrẹ nọ Jihova o bi ro yeri kugbe e riẹ nọ a wholo na, yọ a kuomagbe ai no, be ta nọ: “[Ma re] lele owhai, keme ma yo nọ Ọghẹnẹ avọ owhai a gbẹrọ.” (Zek. 8:20-23) Orọnikọ a re kuomagbe ọvo ho rekọ a wo abọ kugbe ewhowho usiuwoma Uvie na evaọ otọakpọ na soso wariẹ. Dede, a rehọ “igodẹ efa” na kugbe “ọvọ ọkpokpọ” Izrẹl na ha hayo kọ a ku ai kugbe ‘ọvọ . . . uvie’ nọ Jesu o ru kugbe enọ ọ sanọ re a ghale uzuazọ odhiwu kugbe ei, yọ fikioye, o gbẹ nwani fo re a re ebrẹdi jẹ da udi Ekareghẹhọ na ha. (Luk 22:20, 29) Rekọ epanọ “ọvọ ọkpokpọ” na o bi ru ẹjiroro riẹ gba na, bi koko erọ abọ urere “uthuru okakao” kpohọ Uvie odhiwu na, “igodẹ efa” na a vuhumu nọ onana u dhesẹ nnọ eghale nọ i ti te ai obọ evaọ otọakpọ ẹkwoma Uvie yena e be kẹle ino. A riwi rie wọhọ uvẹ ulogbo evaọ “edẹ urere” na re a gọ avọ okugbe kugbe okiọkotọ omarokpotọ ereuku Uvie yena.

[Footnotes]

Eme Ọkiẹkpemu

● Fikieme abọ buobu Ikereakere Ileleikristi Grik na o jẹ kpọ ovao kpohọ ẹruore obọ odhiwu na?

● Ẹvẹ enọ a yẹ no wọhọ emọ Ọghẹnẹ a rẹ rọ riẹ oyena? Eme ebrẹdi gbe udi Ekareghẹhọ nọ a be re jẹ da na i dhesẹ?

● Ẹvẹ “igodẹ efa” na a bi ro dhesẹ nọ a ghine kuomagbe “uthuru okakao” na?