Uzou 18
U fo re Ma Wuhrẹ Omarọkẹ Ọghẹnẹ Evaọ Obọ Uwou
1. (a) Nọ a te wuhrẹ kpahọ ijaje Jihova kẹ orọo no, didi inwene ahwo jọ buobu a ru no? (b) Rekọ didi oware ofa a jọ uzuazọ uviuwou Oleleikristi gwọlọ?
EVAỌ udevie izẹme ejaja nọ ma kaki wuhrẹ evaọ emuhọ ewuhrẹ Ebaibol mai họ enọ i wo abọ kugbe orọo gbe uzuazọ uviuwou. Ma vuhu Jihova mu no wọhọ Ọnọ Ọ To orọo họ ọ tẹ jẹ ruẹ nọ o fi ehrẹ iviuwou nọ emai woma họ evaọ Ebaibol na. Fikiọ ọkpọvio ọyena, uwoma gaga nọ ahwo buobu a rọ nya siọ uzuazọ egbegbe ẹnwae-obro ba a te no ere kere obe orọo rai. Rekọ eware efa e riẹ kpahọ uzuazọ uviuwou Oleleikristi vi oyena. U kugbe uruemu mai re kpahọ ẹria ebẹdẹbẹdẹ okugbe orọo na, erugba owha-iruo mai evaọ uviuwou na, jegbe oghẹrẹ nọ ma re yeri kugbe uviuwou amọfa.—Ẹf. 5:33–6:4.
2. (a) Kọ ahwo kpobi a bi fi eware nọ a riẹ no Ebaibol na ze họ iruo evaọ obọ uwou? (b) Ẹvẹ Jesu gbe Pọl a dhesẹ epanọ oyena uruo u wuzou te?
2 Ima ahwo buobu a riẹ oware nọ Ebaibol na e ta kpahe eme nana. Rekọ nọ a tẹ rehọ ovao dhe ebẹbẹ nana evaọ iwou rai, a re koko ai hi. Kọ ẹvẹ rọ kpahọ omai? Uzẹme, ọvuọvo mai ọ gwọlọ jọ wọhọ enọ Jesu o bru kpe he fikinọ a jẹ ujaje Ọghẹnẹ kufiẹ nọ o gwọlọ nọ emọ e rehọ adhẹẹ kẹ esẹ gbe ini rai ẹkwoma eroro inọ ẹfaki dhesẹ nọ a be g’Ọghẹnẹ u te. (Mat. 15:4-9) Ma gwọlọ jọ ahwo nọ i wo oma Ọghẹnẹ ọ gọ rekọ enọ i re dhesẹ onana evaọ “uviuwou rai” ha ha. Ukpoye, ma rẹ gwọlọ ghine dhesẹ uvi omarọkẹ Ọghẹnẹ ọ gọ, onọ o rọ “erere ologbo.”—1 Tim. 5:4; 6:6; 2 Tim. 3:5.
Ẹvẹ Orọo na O rẹ Rria Kri Te?
3. (a) Eme ọ be via kẹ erọo buobu, rekọ eme o rẹ jọ ọtamuo mai? (b) Rehọ Ebaibol ra kẹ iyo enọ nọ e rọ obọ ehru na kpahọ ẹria kri orọo.
3 Kugbe oghẹrẹ nọ u bi dhe ẹviavia ẹsikpobi, ọwhẹgbe orọo u bi zihe ruọ oware nọ orọ deghedeghe. Imava nọ e rọ orọo kugbe no evaọ ikpe 20, 30, hayo 40 a be jẹ iroro nọ a gwọlọ muọ “uzuazọ okpokpọ” họ kugbe omọfa. Ofariẹ, o gbẹ rọ oware ugbunu hu re a yo nọ ezae gbe eyae nọ e rọo obọ e fa orọo no nọ a rria kugbe evaọ emera kakao ọvo. Makọ eware nọ amọfa a bi ru kpobi, wọhọ enọ e be gọ Jihova ma re wo ẹgwọlọ nọ ma re ro ru Ọghẹnẹ eva were. Eme Ẹme riẹ ọ ta kpahe onana?
Nọ ọzae avọ aye a tẹ ruọ orọo no, oghẹrẹvẹ o gwọlọ nọ a rẹ rria kugbe kri te? (Rom 7:2, 3; Mak 10:6-9)
Eme ọvo họ ehri orọo-ofa nọ u fo evaọ aro Ọghẹnẹ? (Mat. 19:3-9; 5:31, 32)
Oghẹrẹvẹ Jihova o ri orọo-ofa ga te, onọ Ẹme riẹ o kẹ udu riẹ hẹ? (Mal. 2:13-16)
Kọ Ebaibol na e k’udu ọ ẹhẹriẹ wọhọ edhere nọ a re ro ku ebẹbẹ orọo họ? (1 Kọr. 7:10-13)
4. Makọ okpokpoho ọgbọ na, fikieme erọo jọ e jẹ be tọ?
4 Fikieme erọo jọ e jẹ rria krẹkri, efa—makọ evaọ udevie enọ ise oma rai Ileleikristi dede—e be rọ fa no? Ohẹrẹ bẹsenọ imava na e rẹ kpako ziezi yọ ugogo oware nọ o rẹ lẹliẹ orọo tọ. Re a ruẹ ohwo orọo nọ o wo oghẹrẹ isiuru evo na jegbe ọnọ whọ rẹ sae jiroro kugbe ziezi u wuzou re. Rekọ maero kọ ọnọ o wo uvi omarọkẹ Ọghẹnẹ. Ohwo o te ghine you Jihova, u te je mu ei ẹro nọ idhere Riẹ i woma, koyehọ uvi oware nọ a re ro ku ebẹbẹ nọ e r’oma via no họ o riẹ no ye. (Ol. 119:97, 104; Itẹ 22:19) Orọo ohwo otiọye na o gbẹ jọ deghedeghe fikiọ iroro na nọ, u gbe woma ha, a rẹ sae hẹriẹ hayo fa no ho. Ọ rẹ rehọ iruthọ ọrivẹ-orọo riẹ na foma siọ ẹkẹ ewha-iruo riẹ ba ha. Ukpoye, o re wuhrẹ re ọ rẹriẹ ovao ku ebẹbẹ uzuazọ jẹ gwọlọ obọdẹ ifue.
5. (a) Ẹvẹ u ro kpomahọ omarokpotọ kẹ Jihova? (b) Nọ a tẹ make rẹriẹ ovao ku ọbẹwẹ ologbo, didi irere e rẹ sai no ijaje Jihova nọ a re kru gaga tha?
5 Ma riẹ ziezi kpahọ eha-ise Ẹdhọ na inọ ma tẹ be ruẹ uye omobọ mai ma re ti gbabọ kẹ idhere Jihova ma ve je ku ei họ nọ o rẹ mai woma re ma jẹ iroro oware nọ uwoma je yoma k’oma mai. Rekọ ahwo nọ e be rehọ omakpotọ kẹ Jihova a rọ ere he. (Job 2:4, 5; Itẹ 27:11) Isẹri Jihova buobu nọ e ruẹ ẹlahiẹ no obọ ọrivẹ-orọo rai nọ ọ rọwo ho ze a ri siobọ no ọvọ orọo rai hi. (Mat. 5:37) Ejọ, nọ ikpe buobu e te vrẹ no, a wo oghọghọ nọ ọrivẹ-orọo rai na o ti kuomagbe ai be gọ Jihova. (1 Kọr. 7:16; 1 Pit. 3:1, 2) Rọ kẹ efa, enọ erivẹ-orọo rai i dhesẹ oka enwene he hayo enọ erivẹ-orọo rai i gbabọ kẹ fiki nọ a kru ẹrọwọ rai gaga—enana omarai a riẹ nọ a wo eghale gaga no fikinọ a bi lele ijaje Jihova. Evaọ edhere vẹ? Eyero rai i wuhrẹ i rai re a gbe si kẹle Jihova kpekpekpe. A wuhrẹ no re a dhesẹ ekwakwa Ọghẹnẹ makọ evaọ otọ ikpokpoma. Ae yọ ahwo nọ izuazọ rai o kẹ imuẹro ogaga omarọkẹ Ọghẹnẹ.—Ol. 55:22; Jem. 1:2-4; 2 Pit. 1:5, 6.
Duohwo Duọ Ọvuọ Ẹkabọ Riẹ nọ O re Ru
6. Re a ruẹse wo obokparọ orọo, didi ọruẹrẹfihotọ a rẹ kẹ adhẹẹ hrọ?
6 Evaọ uzẹme, o vrẹ ẹria kugbe ọvo re a ruẹse ghine wo obokparọ evaọ orọo. Ẹgwọlọ nọ u wuzou họ adhẹẹ evaọ abọ ohwohwo nọ ọ rọ uviuwou na rọ kẹ ọruẹrẹfihotọ uzou-uwo Jihova. Onana u re fiba ẹkpatiẹ gbe ẹria ufuoma evaọ uviuwou na.—1 Kọr. 11:3; Tait. 2:4, 5; Itẹ 1:8, 9; 31:10, 28.
7. Ẹvẹ a re ro dhesẹ uzou-uwo evaọ uviuwou?
7 Ẹvẹ a re dhesẹ uzou-uwo oyena? Evaọ uruemu nọ u re tho ekwakwa Jesu Kristi. Jesu ọ jọ gaga evaọ e kru idhere Jihova; o you ẹrẹreokie o te mukpahe umuomu. (Hib. 1:8, 9) O you ukoko riẹ didi, ọ rehọ ọkpọvio nọ u fo rọ kẹ jẹ sẹro riẹ re. O wo omovia hayo ababọ ororokẹ hẹ, rekọ, ukpoye, ọ jọ “wowolẹ jegbọ eva i ro kpotọ,” yọ enọ e nyaze otọ uzou-uwo riẹ a ‘ruẹ udhedhẹ kẹ izi rai.’ (Mat. 11:28, 29; Ẹf. 5:25-33) Nọ ọzae gbe ọsẹ ọ tẹ be rehọ oghẹrẹ uruemu utioye na yere kugbe ekru riẹ, u re vevẹ nọ ọ be rehọ omakpotọ kẹ Kristi, ọnọ o dhesẹ oriruo ọgbagba ọ omarọkẹ Ọghẹnẹ. Ini Ileleikristi a re dhesẹ ekwakwa evo eyena re nọ a te bi yeri kugbe emọ rai.
8. (a) Evaọ iviuwou jọ, fikieme o jẹ jọ wọhọ nọ idhere Oleleikristi ọ be wha uvi iyẹrẹ nọ a rẹro riẹ tha ha? (b) Eme ma re ru nọ ma tẹ rẹriẹ ovao ku eyero otiọye na?
8 Dede na, fikiọ sebaẹgba ohwo, ebẹbẹ e rẹ sae rọ oma via. Uzou-uveghe kẹ ọkpọvio no obọ amọfa ze o rẹ sae da ruọ ejọ azẹ no taure ọjọ evaọ uviuwou na o te muọ ijaje Ebaibol na họ ekoko. Ayare ẹwo gbe uruemu uyoyou o rẹ sae nwane wha emamọ iyẹrẹ ze he. Ma riẹ nọ Ebaibol na e ta nọ ma siọ “ofu, gbe evadha, gbe enuodo, gbe eme iyoma eta” no obọ. (Ẹf. 4:31) Rekọ otẹrọnọ ahwo jọ a be daezọ oware ovo ho, eme a re ru? Whaọ, eme Jesu o ru nọ ọ jọ otọ ọyawọ otiọye na? Ọ rọ aro kele enọ e jẹ rehọ obọ soudu laeka ha. Ukpoye, ọ rehọ oma riẹ kẹ Ọsẹ riẹ, rehọ ẹro so ẹe. (1 Pit. 2:22, 23) Epavo na re, otẹrọnọ edawọ e rehọ oma via evaọ uviuwou na, ma rẹ kẹ imuẹro omarọkẹ Ọghẹnẹ otẹrọnọ ma rẹriẹ ovao bru Jihova, be lẹ kẹ obufihọ riẹ, ikpenọ ma rọ aro kele idhere akpọ na.—Itẹ 3:5-7.
9. Viukpọ iruthọ-gwọlọ, didi idhere ezae Ileleikristi buobu a wuhrẹ bi fihọ iruo?
9 Inwene e rẹ kake nyaze vẹrẹ vẹrẹ hẹ, rekọ ohrẹ Ebaibol na i re ghine ruiruo. Ezae jọ buobu nọ i je gu inoma yoyoma kpahọ iruthọ eyae rai a ruẹ nọ enwene ọ roma via nọ ae omarai a ti wo ovuhumuo ziezi kpahọ oghẹrẹ nọ Kristi o je ro yeri kugbe ukoko riẹ. Ahwo nọ e gba ae i ru ukoko oyena via ha. Ghele Jesu o you ukoko na, kẹe uvi oriruo, tubẹ rehọ uzuazọ riẹ kẹ fiki riẹ, je fi Ikereakere na họ iruo ro fiobọhọ kẹe ru inwene re omariẹ kpobi o sae were iẹe. (Ẹf. 5:25-27; 1 Pit. 2:21) Oriruo riẹ o t’udu họ ezae Ileleikristi buobu awọ re a dhesẹ uvi oriruo gbe obufihọ uyoyou nọ u re su kpohọ enwene. Idhere itieye na e rẹ wha emamọ iyẹrẹ tha viọ iruthọ-gwọlọ hayo ẹme-ọta ọwhaha.
10. (a) Evaọ idhere vẹ ọzae gbe ọsẹ—makọ ọnọ ọ be ta nọ Oleleikristi ọ rọ—o re ro ru uzuazọ gaga kẹ amọfa evaọ uviuwou riẹ? (b) Eme a rẹ sai ru re eyero na u woma viere?
10 Evaọ uzẹme, o sae jọ nọ oruthọ ọzae gbe ọsẹ na ọ be wha ẹbẹbẹ ziọ uviuwou na. Kọ otẹrọnọ ọ be kaki muẹro h’otọ kẹ ẹgwọlọ iroro uviuwou riẹ hẹ hayo ọ be ghinẹ karo ẹkwoma ẹruẹrẹ ẹjiroro Ebaibol uviuwou na gbe iruẹru efa ha? Iviuwou jọ e ruẹ emamọ iyẹrẹ no nọ a rọ uzẹme gbe edhere adhẹẹ t’ẹme kpahe ẹbẹbẹ na. (Itẹ 15:22; 16:23; 31:26) Rekọ iyẹrẹ na e gbẹ nwani te epanọ a rẹro ho, omomọvo ọ rẹ sae fiba ewoma eyero uviuwou na ẹkwoma edhesẹ via ibi ẹzi na jegbe edhesẹ ẹruọdawẹ uyoyou gbe ororokẹ kẹ amọfa nọ e rọ uviuwou na. Ẹnyaharo ọ te tha, orọnọ ẹkwoma ẹhẹrẹ ohwo ọdekọ nọ o re ru oware he, rekọ ẹkwoma eruo ẹkẹ abọ mai ziezi, jẹ rehọ ere dhesẹ nọ ma bi ghine wuhrẹ omarọkẹ Ọghẹnẹ evaọ obọ uwou.—Kọl. 3:18-20, 23, 24.
Oria nọ A Jọ Ruẹ Iyo
11, 12. (a) Didi eruẹrẹfihotọ Jihova o ru ro fiobọhọ k’omai evaọ ebẹbẹ uzuazọ uviuwou? (b) Re ma ruẹse wo erere vọvọ, eme u fo nọ ma re ru?
11 Eria buobu evọ riẹ nọ ahwo a rẹ nya bru kẹ ehrẹ kpahọ eware nọ e rẹ jọ uviuwou rai via. Rekọ ma riẹ nọ Ẹme Ọghẹnẹ o wo ehrẹ nọ e mai woma kpobi, yọ ma vọ avọ uyere nnọ ẹkwoma ukoko riẹ nọ a rẹ ruẹ ze o bi fiobọhọ k’omai fi ei họ iruo. Kọ who bi wo erere vọvọ no obufihọ ọyena tha?—Ol. 119:129, 130; Mae. 4:2.
12 Kuomagbe ekpohọ iwuhrẹ ukoko na, who wo oke nọ who fihọ kẹ uwuhrẹ Ebaibol uviuwou? Iviuwou nọ i bi ru onana kẹse kẹse evaọ kẹkpoka kẹkpoka a kuomagbe no evaọ egagọ rai. Uzuazọ uviuwou rai u wo irere buobu no nọ a be jiroro kpahọ efihiruo Ẹme Ọghẹnẹ evaọ iruẹru obọ rai.—Wawo Iziewariẹ 11:18-21.
13. (a) Ma te wo enọ kpahọ eme orọo hayo uviuwou, diẹse ma rẹ sae jọ ruẹ obufihọ nọ a gwọlọ ẹsikpobi? (b) Eme ẹjiroro nọ ma be jẹ kpobi u re dhesẹ?
13 Ẹsejọ enọ kpahọ eme orọo hayo uviuwou nọ i kpomahọ owhẹ e riẹ. Wọhọ oriruo, ẹvẹ kpahọ unu emọ nọ a re yẹ? Ẹwharọ o woma kẹ Ileleikristi? Eva ekparọ u woma fikinọ o wọhọ nọ ọmọ nọ a ti yẹ na a ti yẹi avọ ẹyao? Umuo o riẹ evaọ oghẹrẹ usu owezẹ nọ u kiehọ evaọ udevie ọzae avọ aye? Otẹrọnọ uzoge nọ ọrọ udhudhu ọmaha riẹ o bi dhesẹ uvi isiuru kẹ eware ẹzi hi, ẹvẹ o re kuomagbe uviuwou na evaọ egagọ te? Ababọ avro, who wo ẹme jọ nọ whọ rẹ sae kpahe fihọ eme enana ọvuọvo. Rekọ, kọ whọ rẹ sae kẹ iyo no ẹkwoma ijaje Ebaibol na ze? A rehọ enọ enana ọvuọvo rọ jẹ iroro no evaọ The Watchtower. Wuhrẹ epanọ whọ rẹ sae rọ rehọ oria okiẹ-eme gwọlọ eme itieye na. Otẹrọnọ who gbe wo ebe anwae nọ okiẹ-eme o riẹ obọ họ họ, jọ oria nọ a re fi ebe họ evaọ Ọgwa Uvie na gwọlọ. Who rẹro i E, hayo Ijo kẹ enọ kpobi hi. Ẹsejọ whọ rẹ jẹ iroro na hrọ—rọ kẹ omara hayo wọhọ enọ e rọo no. Rekọ wuhrẹ iroro ejẹ nọ i re dhesẹ uyoyou ra kẹ Jihova jegbe enọ wha gbẹ rọ uviuwou na. Jẹ iroro nọ e rẹ kẹ imuẹro nọ whọ ghinẹ gwọlọ ru Ọghẹnẹ eva were. Who te ru ere, o rẹ jọ vevẹ kẹ Jihova gbe amọfa nọ e riẹ owhẹ nnọ who bi ghine wuhrẹ omarọkẹ Ọghẹnẹ orọnọ evaọ otafe ọvo ho rekọ te evaọ uwou ra.—Ẹf. 5:10; Rom 14:19.
Eme Ọkiẹkpemu
● Ẹvẹ omarokpotọ kẹ Jihova u ro kugbe evaifihọ ọvọ orọo ohwo?
● Eme u re fiobọhọ k’omai ru oware nọ o rẹ were Ọghẹnẹ eva, okenọ ma tẹ rọ otọ ọyawọ no ebẹbẹ iviuwou ze?
● Otẹrọnọ ejọ evaọ uviuwou na a ru thọ dede, eme ma rẹ sai ru re ma kpọ eyero na họ?