Uzou 27
Epanọ A ro Wo Obufihọ Ẹkwoma Olẹ
1. Didi obufihọ ma gwọlọ mi Ọghẹnẹ, kọ ẹvẹ mare ro woi?
RE ASIOMA no iruẹru imuomu akpọ nana, Ileleikristi a ghinẹ gwọlọ obufihọ nọ a rewo fiki olẹ. Jesu ọ tanọ: “Ọsẹ obọ odhiwu na, [ọte] rehọ emamọ ẹzi kẹ enọ eyare riẹ.” (Luk 11:13) Ma gwọlọ emamọ ẹzi Ọghẹnẹ, hayo ẹgba iruo, wọhọ epanọ ma gwọlọ Ẹme riẹ owuhrẹ jegbe omaukugbe ukoko riẹ. Rekọ re mate wo emamọ ẹzi, kọ marẹ yariẹe.
2. (a) Eme họ olẹ? (b) Didi oghoghẹrẹ elẹ erọ? (c) Fikieme olẹ ojẹ rẹ ruaro?
2 Olẹ yọ ẹme adhẹwẹ ọ takẹ Ọghẹnẹ. Osae jọ edhere ọ ọyarọ, wọhọ okenọ arẹ yare Ọghẹnẹ eware. Rekọ olẹ orẹ sae jọ uyere hayo ujiro orọkẹ Ọghẹnẹ re. (1 Irueru-Ivie 29:10-13) Re mate lele Ọsẹ odhiwu mai wo emamọ okugbe, kọ marẹ tẹme kẹe kẹse kẹse eva olẹ. (Ahwo Rom 12:12; Ahwo Ẹfẹsọs 6:18) Ẹgba iruo riẹ, ọnọ mare wo fiki epanọ ma yariẹ, ọ rẹ sai kromai ga ru oreva riẹ ghelọ ikpokpoma hayo edawọ kpobi nọ Ẹdhọ hayo akpọ riẹ ọ rẹ sae wha bru omai tha.—1 Ahwo Kọrint 10:13; Ahwo Ẹfẹsọs 3:20.
3. (a) Didi ẹgba mare wo no obọ Ọghẹnẹ tha? (b) Emamọ edhere ọvuọvo ọvẹ ma rẹ sae rọ sẹro usu mai kugbe Ọghẹnẹ?
3 Whọ rẹ sai wo emamọ ohọre, re who te siobọ no uruemu jọ hayo iruẹru nọ erẹ were Ọghẹnẹ hẹ. Otẹrọ ere, gwọlọ obufihọ Jihova. Nya bru ei evaọ olẹ. Pọl ukọ na oru ere, o te kere nọ: “Evaọ eware kpobi me je wo ẹgba, fiki ọnọ ọkomẹ ogaga.” (Ahwo Filipai 4:13; Olezi 55:22; 121:1, 2) Aye jọ nọ osiobọ no uruemu igberẹ-ibro ọ tanọ: “Ọye ọvo họ ọnọ o wo ogaga nọ o re fiobọhọ kowhẹ nya no uruemu oyena. Fikiere ufore who wo usu obọ ra kugbe Jihova, yọ edhere ọvuọvo nọ whọ rẹ rọ sẹro usu obọ ra na họ olẹ olẹ.”
4. Ẹvẹ ohwo ọ rẹ rehọ wo ogaga sioma no uruemu ewawọ na?
4 Yọ ohwo ọ rẹ sae tanọ: ‘Mẹ lẹ kẹ obufiho Ọghẹnẹ ẹse buobu no, rekọ yọ mẹ be sai siobọno eyoma ha.’ Ahwo nọ a be wọ ewawọ ae ata onana. Nọ anọ ohwo otiọye nọ: “Okiovẹ whọ rẹ lẹ?” O te yonọ: “Evaọ owọwọ re mete kpobọ ehwa, gbe evaọ ohiohiẹ nọ mẹ te kparoma, rekọ okenọ oma olọhọ omẹ no, me ve vovo, mẹ vẹ takẹ Jihova nọ me weri kẹ oware nọ me ru na.” Ogbẹnyusu riẹ ọ tẹ tanọ: “Okenọ whọ rẹ jọ gwọlọ obufihọ Ọghẹnẹ họ, okenọ ewawọ imu owhẹ urru họ esio, ogbẹrọnọ ere? Okioye whọ rẹ jọ lẹ se Jihova re okru owhẹ omaga.” Okenọ ohwo na o ru ere, o te wo obufihọ nọ ọ rọ se ewawọ ba.
5. (a) Re atẹ gọ Ọghẹnẹ ziezi, eme o gwọlọ? (b) Eme dhesẹ nọ ẹsikpobi uyeoruẹ orọ evaọ oma usino iruo uzioraha?
5 Orọnikọ onana udhesẹ nọ olẹ ro se Ọghẹnẹ, avọ ewuhrẹ Ẹme riẹ gbe omaukugbe ukoko riẹ nọ arẹ ruẹ, oye u re ruei lọhọ kowhẹ ru oware nọ uwoma ha. Ogbẹ gwọlọ oma odawọ; ẹhẹ, ohọre ogaga, onọ uyeoruẹ orẹ sae jọ re. (1 Ahwo Kọrint 9:27) Uruemu uyoma orẹ sae wha isiuru oware uyoma tha. Fikiere uyeoruẹ orẹ via no eva riẹ zẹ, okenọ ohwo osioma no uruemu ọ uzioraha. Kọ uno owhẹ eva ze nọ whọ ruẹ uye re, whọ sai ru onọ uwoma?—1 Pita 2:20, 21.
ELẸ NỌ ỌGHẸNẸ OREYO
6. (a) Fikieme ẹlẹ ọ jẹ ga kẹ ibuobu? (b) Eme mare wo, re a te yo elẹ mai?
6 Ẹlẹ ọga kẹ ahwo buobu. “Ẹlẹ se ọ nọ mẹ rẹ ruerẹ hẹ ọ be k’omẹ uye,” ere uvovo aye jọ ọtavia. Nọ ohwo ọvuọvo ọre ruẹ Ọghẹnẹ hẹ na, ufonọ mare wo orọwọ tao, re matẹ lẹ Ọghẹnẹ o vete yo. Ufore ma rọwo nọ Jihova ọ ghinẹ rọ, jegbe nọ ọ rẹ sai ru oware nọ ma yare. (Ahwo Hibru 11:6) Mate wo oghẹrẹ orọwọ utioye, matẹ jẹ rehọ emamọ ubiudu tẹme kẹ Ọghẹnẹ, marẹ sai wo imuẹro nọ o reti fiobọhọ k’omai. (Mak 9:23) Ere Koniliọs oletu ẹmo ahwo Rom, dede nọ ọjọ ukoko Ọghẹnẹ eva okioye na ha, nọ ọ rehọ emamọ eva lẹ gwọlọ ọkpọvio, Ọghẹnẹ o yo olẹ riẹ.—Iruẹru 10:30-33.
7. (a) Didi oghẹrẹ elẹ erẹ were Ọghẹnẹ? (b) Didi oghẹrẹ elẹ Ọghẹnẹ ọ rẹ gaviezọ kẹ hẹ?
7 Eme nọ erọ ahwo jọ eva erẹbẹ ae ẹta. Rekọ, onana orẹ whahae ẹme ọta kẹ Ọghẹnẹ eva olẹ hẹ. Orẹ sai mu omai ẹro nọ ọ riẹ ẹgwọlọ mai, ọ tẹ jẹ riẹ oware nọ mabe te ta. (Matiu 6:8) Dai roriei: Didi ẹme ọ ọmọfofa ọ rẹ mae were owhẹ—te emamọ uyere obọ riẹ, te eme iwoma nọ owho jọ ọ takẹ nọ ọta? Ere emamọ eme unevaze mai, erẹ were Ọsẹ mai nọ ọ rọ obọ odhiwu. (Jemis 4:6; Luk 18:9-14) A gwọlọ eme oghẹrẹsa hayo evẹrẹ egagọ họ. Ọ rẹ tubẹ gaviezọ kẹ otunọ ọ rẹ rehọ ẹvẹrẹ oghẹrẹsa hayo urru oghrẹghrẹ lẹ re usi amofa urru hu, hayo enọ i redhe eware evona ẹwẹwariẹ evaọ edhere ọviẹhọ.—Matiu 6:5, 7.
8. (a) Eme odhesẹ nọ Ọghẹnẹ ọ rẹ sai yo elẹ nọ alẹ fihọ eva? (b) Ebaibol i dhesẹ nọ mare fiomahọ oghẹrẹ jọ hayo oria jọ lẹ?
8 Makọ okenọ whọ lẹ fihọ eva, Ọghẹnẹ ore yo. Okenọ Nehemaya oruere, Ọghẹnẹ oru iruo fihọ uvi ayare riẹ, yọ ere ojọ kẹ Hana re. (Nehemaya 2:4-8; 1 Samuẹl 1:11-13, 19, 20) Yọ orọnikọ epanọ ohwo ofiomahọ be lẹ omaero ho. Whọrẹ sae lẹ evaọ oghẹrẹ nọ whọrọ kpobi, evaọ oke kpobi, jegbe oria kpobi. Rekọ, Ebaibol idhesẹ nọ oma orehọ kpotọ, wọhọ uzou ugokpọtọ hayo ighilawọ eluẹ totọ, ikiehọ. (1 Ivie 8:54; Nehemaya 8:6; Daniẹl 6:10; Mak 11:25; Jọn 11:41) Jesu o te je dhesẹ nọ u re woma re oke elẹ omobọ ra ojọ evaọ oria udidi, nọ ahwo arẹ ruẹ hẹ.—Matiu 6:6.
9. (a) Ono marẹ lẹ elẹ mai kpobi se, kọ fikieme? (b) Re Ọghẹnẹ ọ tẹ rehọ elẹ mai, odẹ ono marẹ rehọ lẹ ae?
9 Olẹ yọ abọjọ egagọ mai. Fiki onana majẹ lẹ elẹ mai se Ọmemama mai ọvo, Jihova Ọghẹnẹ, nọ i gbe kpobọ omọfa ọvuọvo ho. (Matiu 4:10) Ebaibol i te je dhesẹ nọ Ileleikristi arẹ tẹme kẹ Ọghẹnẹ fiki Jesu, ọnọ osiobọ no uzuazọ riẹ, re a si izieraha mai no. Onana udhesẹ nọ marẹ lẹ elẹ mai eva odẹ Jesu.—Jọn 14:6, 25; 16:23; Ahwo Ẹfẹsọs 5:20; 1 Jọn 2:1, 2.
10. (a) Elẹ ono erẹ were Ọghẹnẹ hẹ? (b) Uvi ẹgwọlọ ọvẹ marẹ nya te, re Ọghẹnẹ o te yo elẹ mai?
10 Rekọ, elẹ na kpobi erẹ were Jihova? Ebaibol etanọ: “Ọnọ ore si ozọ riẹ no, ẹmeoyo kẹ uzi—olẹ riẹ yọ oware onyenye.” (Itẹ 28:9; 15:29; Aizaya 1:15) Fikiere otẹrọnọ ma gwọlọ nọ Ọghẹnẹ oyo elẹ mai, ẹgwọlọ nọ omaero, nọ maje ru oreva riẹ họ izi riẹ nọ mare yoẹme kẹ. Ogbẹrọ erehe Ọghẹnẹ ọ rẹ gaviezọ komai hi, wọhọ epanọ emamọ ohwo ọ rẹ gaviezọ họ kẹ iruẹru iredio nọ oriwifihọ igberẹ-ibro. Ebaibol etanọ: “Koware koware nọ ma yare, marẹ jọ obọ riẹ woi, keme ma bi koko ijaje riẹ, jebi ru eware nọ ikiehọ evaọ aro riẹ.”—1 Jọn 3:22.
11. Eme u dhesẹ re ma ru lele epanọ ma lẹ?
11 Onana udhesẹ nọ ma re ru lelẹ epanọ ma lẹ na. Re ojọ oriruo, orẹjọ thọthọ kẹ ohwo, re ọyare obufihọ Ọghẹnẹ kpere osiobọno utaba hayo ige, re ọ jẹ zoma kpobọ otafe nyae dẹ eware enana. Hayo ọ rẹ sae yare Jihova nọ ofiobọhọ kẹe siobọno igberẹ-ibro nore, ọjẹ zoma se ebe, je riwi isinima gbe etehe-ughe nọ abe jọ dhesẹ igberẹ-ibro ho. Hayo otẹrọnọ edhifio ohwo ọjẹ yẹlẹ, ọ gbẹ sae lẹ kẹ Ọghẹnẹ nọ ofiobọhọ kẹe siobọ nai no re, ọ jẹ zoma kpohọ eria oghrẹ-odhẹ omodawọ hayo eria efa itieye nọ aje bi fiedhọ họ. Re Ọghẹnẹ o te yo elẹ mai, ufo nọ marẹ rehọ uruemu dhesẹ kẹe nọ, ma ghinẹ rọwo oware nọ ma tae.
12. (a) Eware evẹ jọ mare kugbe elẹ mai lẹ? (b) Re elẹ mai etẹ were Ọghẹnẹ, eme marẹ riẹ?
12 Kọ, emehọ eware obọmai nọ marẹ ta kugbe kẹ Jihova evaọ elẹ mai? Uzẹme nọ, koware koware nọ o rẹ raha usu mai avọ Ọghẹnẹ họ oware nọ ufo ẹlẹ kpahọ, te omokpokpọ mai, jegbe emọ eyọrọ. (2 Ivie 20:1-3; Ibruoziẹ 13:8) Jọn ukọ na okere nọ: “Oware kpobi nọ ma yare kiehọ oreva riẹ, ore yo k’omai.” (Jọn 5:14) Fikiere oware nọ omaero họ ayare mai ọ rẹ rọwo kugbe oreva Ọghẹnẹ. Onana udhesẹ nọ ufore ma kake wuhrẹ epanọ oreva riẹ orọ. (Itẹ 3:5, 6) Kẹsena otẹrọnọ okenọ ma te lẹ, ma te rorote oreva Ọghẹnẹ gbe ẹjiroro riẹ, siọ isiuru obọ mai nọ erẹ jọ omai oja ba, Jihova ọ rẹ rehọ elẹ mai. Ufore ma yere Jihova kẹdẹ kẹdẹ fiki eware iwoma nọ ọ k’omai.—Jọn 6:11, 23; Iruẹru 14:16, 17.
13. (a) Ẹvẹ Jesu o ro dhesẹ eme nọ erẹ kake j’omai oja evaọ olẹ mai? (b) Emehọ eware eruaro avivẹ nọ ma rẹ lẹ kpahe?
13 Jesu ọkẹ ilele riẹ oriruo olẹ, nọ o ro dhesẹ oghẹrẹ olẹ nọ Ọghẹnẹ ọ rẹ rehọ kẹ ae. (Matiu 6:9-13) Olẹ onana udhesẹ nọ odẹ Ọghẹnẹ, uvie riẹ gbe oreva riẹ uruo evaọ otọakpọ eye ekaro. Ofa ma rẹ sae yare ẹgwọlọ obọ mai, wọhọ emu okpẹdẹ mai, erọvrẹ izieraha, gbe esino ẹdawọ avọ obọ oyoma na, Setan Ẹdhọ na.
ELẸ OBUFIHỌ KẸ AMỌFA
14. Ẹvẹ Ebaibol i dhesẹ ẹruọ nọ ọrọ evaọ ẹlẹ kẹ amọfa?
14 Jesu ọ rehọ oriruo riẹ dhesẹ ẹruọ nọ ọrọ evaọ ẹlẹ, kẹ amọfa. (Luk 22:32; 23:34; Jọn 17:20) Pọl ukọ na ọ riẹ aghare ọrọ elẹ itieye ọ tẹ jẹ takẹ amọfa rẹ alẹ kẹe kẹse kẹse. (1 Ahwo Tẹsalonika 5:25; 2 Ahwo Tẹsalonika 3:1; Ahwo Rom 15:30) Okenọ ọjọ uwou-odi o te kere nọ: “Me bi rẹro nọ a re ti siobọno omẹ fikiọ elẹ rai.” (Filimọn 22; Ahwo Ẹfẹsọs 6:18-20) Fiki epanọ ugbe kri taore a tete siobọno Pọl no uwou-odi ze he, u te dhesẹ erere elẹ nọ alẹ kẹe.
15. Didi oghẹrẹ ọ ayare, ma rẹ yare kẹ ahwo nọ ma you?
15 Pọl ọlẹ elẹ nọ ifiobọhọ kẹ amọfa re. “Ẹsikpobi ma be lẹ kẹ owhai, re Ọghẹnẹ mai oru owhai te kẹ use riẹ,” ere okere. (2 Ahwo Tẹsalonika 1:11) O te ruei vẹ kẹ ukoko ofa: “Ma lẹ se Ọghẹnẹ re wha se oware ovuovo ba eruthọ . . . rekọ re wha he ru oware nọ ukiehọ.” (2 Ahwo Kọrint 13:7) Uzẹme nọ uwoma re alele oriruo Pọl, re ma yare uvi ayare kẹ enọ ma you. Ghinọ, “ayare ohwo okiẹrẹe [olẹ unevaze], otẹ rọ iruo, u wo ẹgba ologbo.”—Jemis 5:13-16.
16. (a) Re ma wo obufihọ no ma gwọlọ, oke ovẹ marẹ lẹ? (b) Fikieme olẹ ojẹ rọ oghale ulogbo?
16 Okenọ odibo jọ ore ru uwuhrẹ Ebaibol, kọrẹ hẹ nọ: “Whọ rẹ lẹ evaọ okiofa, kugbe oke ọ uwuhrẹ Ebaibol e kẹkpoka kẹkpoka ra?” Re ma wo obufihọ nọ ma gwọlọ, ma rẹ tẹme kẹ Ọghẹnẹ ẹsikpobi evaọ olẹ. (1 Ahwo Tẹsalonika 5:17; Luk 18:1-8) Wuhrẹ epanọ arẹ rehọ omakpotọ tẹme kẹe, wọhọ epanọ whore rukẹ ogbẹnyusu nọ who you je fieva họ. Uzẹme, kinọ epanọ oghale na ugbunu te, onọ ajẹ sae lẹ olẹ se Osu ọruaro akpọ na soso, ọ nọ ọrọ Oyolẹ na, whọ tẹ jẹ riẹ nọ o bihe yo kowhẹ!—Olezi 65:2.
[Uwoho nọ o rrọ ẹwẹ-obe avọ 227]
Ẹvẹ ohwo ore ruẹ, ọtẹrọ evaọ ẹdawọ—ẹlẹ kẹ obufihọ minikọ ekie?
[Uwoho nọ o rrọ ẹwẹ-obe avọ 229]
Whọ tẹ lẹ kẹ obufihọ no, whọ vẹ zoma dhomahọ iruemu nọ i re su kpobọ iruthọ?
[Uwoho nọ o rrọ ẹwẹ-obe avọ 230]
Whẹ ọvo ọ rẹ lẹ minikọ kugbe amọfa ọvo?