Uzou 30
Oware Nọ Whore Ruẹ Hrọ re Whọ Ria Bẹdẹ Bẹdẹ
1. (a) Idhere ivẹ e vẹ irovie fihọ kowhẹ? (b) Ẹvẹ whọrẹ rọ sa edhere nọ okiehọ?
JIHOVA ỌGHẸNẸ ọ kowhẹ oware ugbunu jọ—uzuazọ ebẹdẹ bẹdẹ evaọ eware eyero okiẹrẹe ọkpokpọ riẹ. (2 Pita 3:13) Rekọ ẹria okioye na, ọ rehọ ẹroso oreva Ọghẹnẹ nọ, whore ruẹ enẹna. Akpọ omuomu ọnana, ọ kẹle ẹnyavrẹ no, gbe enọ erọ abọjọ riẹ kpobi, “rekọ ọnọ o ru oreva Ọghẹnẹ ọ rẹ jọ bẹdẹ bẹdẹ.” (1 Jọn 2:17) Fikiere whọrẹ sa ọ jọ evaọ idhere ivẹ na. Ọ jọ o re su kpohọ uwhu, ọ dekọ kọ uzuazọ ebẹdẹ bẹdẹ. (Iziewariẹ 30:19, 20) Ọ vẹ whọ te sa?
2. (a) Otẹrọnọ who wo uvi orọwọ, eme o re mu owhẹ ẹro? (b) Ẹvẹ evaifihọ Ọghẹnẹ wọhọ epanọ ọmọ o re fievahọ ọsẹ oyoyou i je fiobọhọ kowhẹ gọe?
2 Ẹvẹ who ro dhesẹ nọ uzuazọ whọrẹ sa? Orọsosuọ kpobi, whore fi orọwọ họ Jihova, jegbe eya riẹ. Umu owhẹ ẹro gba nọ, Ọghẹnẹ ọ rọ, “jegbe nọ ọrẹ hwa osa kẹ enọ eromakpotọ gwọliẹe”? (Ahwo Hibru 11:6) Ufore who fi evahọ Ọghẹnẹ epanọ ọmọzae hayo ọmọtẹ orefi evahọ ọsẹ oyoyou avọ ohrọ oriọ. (Olezi 103:13, 14; Itẹ 3:11, 12) Whote wo orọwọ utioye, who gbe wo idhọvẹ hẹ, inọ ithibro riẹ iwareghẹ hayo idhere riẹ ikiehọ, otẹ make rọ okenọ whọre riẹ otọ eware gbagba ha.
3. (a) Eme ọfa ofo, kugbe orọwọ? (b) Didi iruo a gwọlọ re aro dhesẹ nọ whọ be sa uzuazọ?
3 Rekọ, orọwọ ọvo a gwọlọ họ. Iruo erẹ jọ re, nọ a ro dhesẹ epanọ iroro ra eghinẹ rọ kpahọ Jihova. (Jemis 2:20, 26) Whọ sai ru eware jọ ro dhesẹ nọ, who weri kẹ oware uwoma nọ who kie seba, eva oke nọ ukpemu? O wọ owhẹ oma ku evarẹriẹ, hayo lẹliẹ owhẹ nwene edhere uzuazọ ra, re ọ rọwo kugbe oreva Jihova? Who ku rẹriẹ no, oye họ, whọ se edhere ọthọthọ nọ who bi lele anwọ ẹdẹ no, whote mu eware nọ Ọghẹnẹ ọ gwọlọ họ eruo no? (Iruẹru 3:19, 17:30) Iruo itieye na i re dhesẹ nọ whọ be sa uzuazọ.
OMORỌKẸ GBE AMEỌHỌ
4. (a) Eme ọ rẹ wọ owhẹ ru oreva Ọghẹnẹ? (b) Whọ tẹ sa nonọ whọ gwọlọ gọ Ọghẹnẹ, didi oware ufo eruo?
4 Eme ọ rẹ wọ owhẹ sa uzuazọ, evaọ oreva Ọghẹnẹ uruo? Ovuhumuo o re rue. Dai rorie: Jihova o rurie lọhọ kowhẹ, re ẹyao kpobi, uyeoruẹ, makọ uwhu dede uno owhẹ uzou! Fiki okẹ oghaghae Ọmọ riẹ o ro rovie edhere kowhẹ bi kpohọ uzuazọ ebẹdẹ bẹdẹ evaọ aparadase otọakpọ. (1 Ahwo Kọrint 6:19, 20; 7:23; Jọn 3:16) Okenọ uyoyou Jihova otẹ zoma wọ owhẹ yoyei re, kẹvẹ who re ruẹ? (1 Jọn 4:9, 10; 5:2, 3) Kọ whọrẹ nya bru Ọghẹnẹ eva odẹ Jesu, jẹ ta kẹe eva olẹ nọ, whọ gwọlọ jọ odibo riẹ, jẹ gwọlọ nọ whọ rẹ jọ ọ riẹ. Eva edhere ọnana whọ jẹ rehọ omara kẹ Ọghẹnẹ. Ọnana yọ ẹme idhere kẹ omobọra. Omọfa ọvuọvo o re rue’i kowhẹ hẹ.
5. (a) Whọ tẹ rehọ omara kẹ Ọghẹnẹ no, eme orẹro nọ who re ruẹ? (b) Didi obufihọ orọ k’owhẹ whọ tẹ ria te omorọkẹ ra?
5 Whọ tẹ rehọ omara kẹ Ọghẹnẹ no, o re rẹro nọ whọ rẹ ria tei. Fikiere dhesẹ nọ, whẹ yọ ohwo nọ ọ tano o ru, evaọ ẹdadamu kẹ ẹsa ọnana hayo omorọkẹ ri te epanọ whọ rẹ ria krite. (Olezi 50:14) Otẹrọnọ who bikẹle ukoko Ọghẹnẹ nọ a rẹ ruẹ, Ileleikristi i be ra a sai fiobọhọ kowhẹ, enọ e te ghọghọ ta emamọ udu họ owhẹ awọ, gbe obufihọ.—1 Ahwo Tẹsalonika 5:11.
6. (a) Whọ tẹ rehọ uzuazọ ra kẹ Ọghẹnẹ no, kọ didi owojẹ ufo? (b) Emehọ otọ ameọhọ?
6 Rekọ whore ru viọ ẹlẹlẹ takẹ Jihova nọ, whọ gwọlọ jọ ohwo riẹ. Ufore who dhesẹ kẹ amọfa nọ whọ rehọ omarakẹ iruo Ọghẹnẹ ọgọ no. Ẹvẹ who re ro ru onana? Ẹkwoma ọ ameọhọ evaọ ame. Ameọhọ otiọye na họ odhesẹvia ogbotu nnọ, ohwo ọ rehọ uzuazọ riẹ kẹ Jihova no, kọ ọ be rehọ omariẹ ze kẹ, oreva Riẹ uruo.
7. (a) Didi oriruo Jesu ọ kẹ Ileleikristi? (b) Fikieme ameọhọ nọ Jesu ọ ta na ọ gbẹrọ kẹ emeboba ha?
7 Evaọ oriruo Jesu Kristi, a je dhesẹ nọ ameọhọ yọ ẹgwọlọ ologbo. Orọnikọ ẹta gheghe ọvo, Jesu ọ takẹ Ọsẹ riẹ nọ, ọ nyaze ti ru oreva Riẹ hẹ. (Ahwo Hibru 10:7) Nọ o je ru re o ti mu iruo riẹ họ wọhọ ọvuovuẹ uvie Ọghẹnẹ, Jesu ọ tẹ rehọ omariẹ kẹ Jihova, ọ tẹ hame evaọ ame. (Matiu 3:13-17) Nọ Jesu ọ kẹ oriruo no na, enọ erehọ omarai kẹ Jihova nẹnẹ, re a ru oreva riẹ, a rẹ họame. (1 Pita 2:21; 3:21) Eva uzẹme Jesu o je kẹ ilele riẹ nọ, a ru ilele evaọ ahwo erẹwho na kpobi, a vẹ jẹ họ ilele ekpokpọ enana ame. Onana orọ ameọhọ emeboba ha. Rekọ nọ ameọhọ ahwo nọ arọwo, nọ aroro iroro rai muno inọ, a rẹ gọ Jihova.—Matiu 28:19; Iruẹru 8:12.
8. Whọ tẹ gwọlọ họ ame, amono whọ rẹ jọ riẹ evaọ ukoko na, kọ fikieme?
8 Otẹrọnọ, who roro iroro ra munọ, whọ rẹ gọ Jihova, jẹ gwọlọ hame, keme who re ruẹ? Kọ who re ruẹ re, ọsẹro ukoko Isẹri Jihova no whọrọ na, ọ riẹ kpahọ ẹgwọlọ ra na. Ọye, omariẹ kugbe ekpako efa eva ukoko na, a te ghọghọ lele owhẹ wariẹ riwi eware nọ ifo kowhẹ ẹriẹ, re whọ sae gọ Ọghẹnẹ evaọ edhere nọ okiehọ. Kẹsena, a vẹ tẹ sai dhe, idhe ameọhọ kowhẹ.
OREVA ỌGHẸNẸ KOWHẸ NẸNẸ
9. Eme Noa o ru re ẹvo ọ tẹze, nọ ọ rọ oreva Ọghẹnẹ k’owhẹ nọ who re ruẹ enẹna?
9 Re ẹvo ọ tẹze, Jihova ọ rehọ Noa, “ọvuẹovuẹ ẹrẹreokie,” kẹ unuovẹvẹ ọ ọrahafiẹ nọ ọ be tha, o te dhesẹ oria adhẹzọ ovuọvo na, okọ na. (Matiu 24:37-39; 2 Pita 2:5; Ahwo Hibru 11:7) Oreva Ọghẹnẹ họ, whọ jọ enẹna ru iruo evuavuẹ, itieye na. Jesu ọ ta kpahe oke mai nọ: “A rẹ te vuẹ ovuẹ usiuwoma uvie na kẹ akpọ na kpobi, re ojọ isẹi kẹ erẹwho akpọ na kpobi; kẹsena urere ute zi te.” (Matiu 24:14) Ufore amọfa a riẹ eware nọ who wuhrẹ kpahọ ẹjiroro Ọghẹnẹ otẹrọnọ a rẹ zọ evaọ urere eyero ọnana re a ria bẹdẹ bẹdẹ. (Jọn 17:3) Kọ udu ra, o gbẹ wọ owhẹ re, who wabọ evaọ eriariẹ enana nọ, erẹ kẹ-uzuazọ ẹghale kugbe amọfa?
10. (a) Didi oriruo Jesu uyoyou ahwo orẹ wọ omai lele? (b) Edhere ọ vẹ a te mae ro ru iruo evuavuẹ na?
10 Lele oriruo Kristi. Ọ hẹrẹ nọ ahwo anya bru ei ze he, rekọ ọ jẹ nya gwọlọ enọ erẹ kezọ kẹ ovuẹ Uvie na. O te je wuhrẹ ilele riẹ—ai kpobi—re a ru epọvona. (Matiu 28:19; Iruẹru 4:13; Ahwo Rom 10:10-15) Epanọ, alele uwuhrẹ gbe oriruo Kristi Ileleikristi ọsosuọ a tẹjẹ nya bru ahwo evaọ iwou rai. A jẹ nya “no uwou ruọ uwou” avọ ovuẹ Uvie na. (Luk 10:1-6; Iruẹru 20:20) Onana ogbẹrọ edhere ologbo nọ, emamọ Ileleikristi a bi ro ru iruo rai nẹnẹ na.
11. (a) Re a vuẹ kpahọ uvie Ọghẹnẹ, fikieme o jẹ gwọlọ aruọwha, rekọ fikieme ugbe fo re ma dhozọ họ? (b) Ẹvẹ Jihova o re rri iruo nọ ma ru?
11 Ogwọlọ aruọwha, re a te ru iruo enana. Umuẹro nọ Ẹdhọ avọ akpọ riẹ, a te dao re adowhẹ ji, epanọ a jẹ dao re ada ilele Kristi ọsosuọ ji, re a se evuavuẹ na ba. (Iruẹru 4:17-21; 5:27-29, 40-42) Rekọ whọ dhozọ họ. Keme wọhọ epanọ Jihova ọthọ Ileleikristi ọsosuọ je kru ai oma ga na, ere ọvona o ti ru kowhẹ nẹnẹ. (2 Timoti 4:17) Fikiere kru ẹro ga! Dhesẹ nọ who ghine you Jihova gbe erivẹ ra, ẹkwoma eruo gaga evaọ iruo evuavuẹ gbe ewuhrẹ nọ i re siwi uzuazọ. (1 Ahwo Kọrint 9:16; 1 Timoti 4:16) Iruo ra e te thọrọ Jihova ẹro ho, rekọ ọ te hwosa kowhẹ ruaro.—Ahwo Hibru 6:10-12; Taitọs 1:2.
12. Eme marẹ sai wuhrẹ no oriruo aye Lọt tha?
12 Eyero anwae ọnana o wo emamọ oware oghaghare ovuovo nọ ọ rẹ rọ tha ha, fikiere who roro nọ who bi vru hu, re who kiuke kuei. Jesu ọ tanọ. “Kareghẹhọ aye Lọt.” (Luk 17:32) Okenọ ọye avọ ekru riẹ a dhẹ no Sọdọm no, ọ tẹ rehọ edhere isiuru eware nọ anya seba no. Ọghẹnẹ ọ tẹ ruẹ oria nọ ubiudu riẹ orọ, o te zihe ruọ ukolu uwhei. (Emuhọ 19:26) Whọ jọ wọhọ aye Lọt ho! Fi, ibiaro ra họ oware nọ orọ obaro “uvi uzuazọ na” evaọ eyero okiẹrẹe ọkpokpọ Ọghẹnẹ.—1 Timoti 6:19.
SA UZUAZỌ EBẸDẸ BẸDẸ EVAỌ APARADASE OTỌAKPỌ NA
13. Ẹvẹ Jesu o dhesẹ ẹsa nọ mai kpobi a rẹ sa?
13 Uzẹme nọ, ẹsa ivẹ ọvo erọ. Kristi ọ reheriẹ dhesẹ, ẹsa ọvojọ, evaọ idhere ivẹ na. Ọ tanọ, edhere jọ ọ rẹ “kẹkẹre je riamafihọ.” Enọ e be nya eva riẹ, a kẹ rai uvẹ re, a ru onọ uje rai. Rekọ, edhere ọdekọ, ọ rẹ “kekeke.” Ẹhẹ, enọ erọ edhere ọyena, a gwọle rai nọ a re yo ẹme kẹ ithibro gbe izi Ọghẹnẹ. Ibuobu e be nya ruọ, edhere ọkẹkẹre na, ere Jesu ọ tae, emekakao ọvo erọ ọhwahwa na. Edhere ọ vẹ whọ te sa? Evaọ ẹsa ra na, kareghẹhọ onana: Edhere ọkẹkẹre na o ti kuhọ idudhe evaọ uwhu—okpekufiẹ! Rekọ, edhere ọhwahwa na, o re ti su owhẹ lafiọ eyero ọkpokpọ Ọghẹnẹ. Etẹ who je ti wobọ evaọ otọakpọ na uzihe ruọ aparadase urirẹ, oria nọ whọ jẹ ria bẹdẹ bẹdẹ evaọ oghọghọ.—Matiu 7:13, 14.
14. Eme who re kuomagbe re whọ ruẹse zọ ruọ eyero ọkpokpọ Ọghẹnẹ?
14 Who du kue’i họ nọ, idhere buobu hayo inu sasa erọ nọ whọ nya who ve wo uzuazọ evaọ eyero ọkpokpọ Ọghẹnẹ hẹ. Ọvuọvo ọ rọ. Okọ ovuọvo ojọ nọ, ovrẹ Ẹvo na, orọnikọ ekọ buobu hu. Yọ ukoko ovuọvo orẹ te jọ—ukoko Ọghẹnẹ nọ a rẹ ruẹ—oye o te vrẹ “uye ulogbo” nọ o be tha kpatakpata na. Orọ uzẹme vievie he, inọ egagọ na kpobi i re su kpohọ oria ovo. (Matiu 7:21-23; 24:21) Who re kuomagbe ukoko Jihova, je ru oreva riẹ, re whọ ruẹse wo oghale uzuazọ ebẹdẹ bẹdẹ riẹ.—Olezi 133:1-3.
15. (a) Eme ofokẹ omai eruo kẹdẹ kẹdẹ? (b) Didi ẹruore họ ọnọ ọrọ ewezẹ hẹ?
15 Fikiere, jọ ifoto eyero eware, ọkpokpọ Ọghẹnẹ nọ a ya kpahe na, i he lo evaọ iroro gbe ubiudu ra. Kẹdẹ kẹdẹ he roro kpahọ osa ulogbo nọ Jihova Ọghẹnẹ ọ te hwa kowhẹ—ẹria ebẹdẹ bẹdẹ evaọ Aparadase otọakpọ na. Onana orọ ewezẹ hẹ. Rekọ uzẹme! Keme eya Ebaibol erẹ seba erugba ha: “Enọ ikiẹrẹe i re ti wo, otọakpọ na, a vẹ te ria eva riẹ bẹdẹ bẹdẹ. . . . Okenọ a kpe irumuemu no, whọ rẹte rue riẹ.”—Olezi 37:29, 34.
[Uwoho nọ o rrọ ẹwẹ-obe avọ 251]
Rehọ omara kẹ Jihova . . . re whọ họame
[Uwoho nọ o rrọ ẹwẹ-obe avọ 253]
“Kareghọhọ aye Lọt”
[Iwoho nọ e rrọ ẹwẹ-obe avọ 254]
Ru eyero ọkpokpọ Ọghẹnẹ lo evaọ iroro gbe udu ra