Uzou Avọ 10

Erẹ Kpohọ Jerusalẹm

OKE okpakpọ u te no. Yọ oke u te no kẹ uviuwou Josẹf, kugbe egbẹnyusu gbe imoni riẹ, re a kpohọ erẹ okpakpọ kukpe kukpe rai eva obọ Jerusalẹm re a ru ehaa Ọnyavrẹ na. Nọ a rọ edhere bi kpohọ erẹ nọ o wọhọ ikilomita 100 na, oghọghọ nọ o rẹ jariẹ ẹsikpobi na o riẹ. Jesu ọ kpako te ikpe 12 no, yọ o bi rẹro ehaa na gaga.

Rọkẹ Jesu avọ uviuwou riẹ, Ọnyavrẹ na o rọ oware ẹdẹ ọvo ho. A rẹ jẹ daji kẹ Ehaa Ebrẹdi nọ ọ Kare Ẹvi nọ a re ru edẹ ihrẹ na, onọ a rri wọhọ abọ jọ Ọnyavrẹ rai na. Fikiere, erẹ na kpobi n’obọ uwou rai ze evaọ Nazarẹt, kugbe oke nọ a rẹ rọ jọ Jerusalẹm, o te oware wọhọ eka ivẹ. Rekọ enukpe ọnana, fiki oware jọ nọ u kpomahọ Jesu, a rria kri vrẹ ere.

Ẹbẹbẹ na ọ roma via nọ a je zihe kpo no Jerusalẹm. Josẹf avọ Meri a roro nọ Jesu ọ rọ usu imoni gbe egbẹnyusu nọ a gbẹ rọ erẹ na nya. Ghele na, ọ r’oma via ha evaọ okenọ a je serihọ evaọ oria nọ a te jọ wezẹ hẹrioke, a te mu ei họ ẹgwọlọ evaọ udevie ahwo nọ a gbẹ rọ usu na. A jọ oria ovo duku ei hi. Fikiere Josẹf avọ Meri a te kuoma rẹriẹ zihe kpohọ Jerusalẹm re a jọ obei gwọlọ iẹe.

Okpẹdoke soso a gwọlọ e riẹ, rekọ a rue riẹ hẹ. Ẹdẹ avivẹ a rue riẹ gbe he. Uwhremu na, evaọ ẹdẹ avọ esa, a te kpohọ etẹmpol na. Evaọ ọgwa riẹ jọ, a tẹ ruẹ Jesu nọ ọ keria udevie iwuhrẹ ahwo Ju na, be gaviezọ kẹ ai jẹ nọ ai enọ.

“Ọmọ, ẹvẹ who je ru omai ere?” ere Meri ọ nọ. “Ri, mẹ avọ ọsẹ ra ma rọ awa be guọlọ owhẹ.”

U gbe Jesu unu nọ a riẹ oria nọ a rẹ jọ rue riẹ hẹ. Ọ tẹ nọ nọ: “Eme wha jẹ be guọlọ omẹ? Wha gbẹ riẹ nọ mẹ rẹ jọ eva uwou Ọsẹ mẹ?”

U gbe Jesu unu oware nọ ọsẹ gbe oni riẹ a gbẹ rọ riẹ onana ha. Jesu o te lele ọsẹ gbe oni riẹ zihe ọ tẹ ruabọhọ ẹmeoyo rọ kẹ ai. Ọ tẹ be rro haro evaọ areghẹ gbe ugboma evaọ aruoriwo kugbe Ọghẹnẹ gbe ahwo. Ẹhẹ, no emaha riẹ ze, Jesu o fi emamọ oriruo họ otọ orọnikọ evaọ isiuru abọ-ẹzi ọvo ho rekọ te edhesẹ adhẹẹ rọ kẹ ọsẹ gbe oni riẹ. Luk 2:40-52; 22:7.

▪ Didi erẹ oke okpakpọ Jesu avọ uviuwou riẹ a jẹ hai ru ẹsikpobi, kọ ẹvẹ u re kri te?

▪ Eme ọ via evaọ etoke erẹ nọ a kpohọ okenọ Jesu ọ kpako te ikpe 12 no?

▪ Didi oriruo Jesu o fihọ kẹ izoge nẹnẹ?