Uzou Avọ 14

Ilele Ọsosuọ Jesu

NỌ Ọ jọ obọ igbrẹwọ na raha edẹ 40 no, Jesu o te zihe bru Jọn ze, ọnọ ọ họ riẹ ame na. Nọ o bi si kẹle na, Jọn ọ tẹ riobọ họ iẹe o te bo kẹ ahwo nọ e jọ etẹe nọ: “Ri Omogodẹ Ọghẹnẹ, ọ nọ ọ wha izieraha akpọ na vrẹ! Ọnana họ ọye ọ no mẹ ta nọ, ‘Ohwo jọ ọ be rọ kpahe omẹ tha, nọ ọ rọ aro mẹ: keme ọye ọ kake rọ omẹ rọ.’ ” Dede nọ Jọn o vi Jesu ọmọ oniọvo oni riẹ, Jọn ọ riẹ nọ Jesu ọ kake rehọ iẹe rria no wọhọ ohwo ẹzi evaọ obọ odhiwu.

Ghele na, eka jọ kakao nọ i kpemu, okenọ Jesu ọ nyaze kẹ ame-ọhọ, ẹsejọhọ Jọn ọ riẹ vevẹ hẹ inọ Jesu ọ be te jọ Mesaya na. Jọn ọ ta via nọ: “Mẹ riẹ riẹ hẹ; rekọ re a rehọ iẹ via kẹ ahwo Izrẹl, fiki onana mẹ jẹ be rehọ ame họ ahwo-ame.”

Jọn ọ tẹ ta kẹ ahwo nọ e be gaviezọ kẹe oware nọ o via okenọ ọ họ Jesu ame: “Mẹ ruẹ Ẹzi na nọ o no obọ ehru ze wọhọ erueruẹ; o te dikihẹ ehru riẹ. Mẹ riẹ riẹ hẹ: rekọ ọ nọ o vi omẹ te rehọ ame họ ahwo-ame, ọ ta kẹ omẹ, nọ, ‘Ehru ọ nọ whọ jẹ te ruẹ Ẹzi nọ ọ rẹte tha, o dikihẹ ehru riẹ, ọyena họ ọ nọ ọ rẹ te rehọ Ẹzi Ẹri họ ahwo-ame.’ Mẹ tẹ ruẹ, me te sisẹi, nọ: Ọnana họ Ọmọ Ọghẹnẹ na.”

Okiokiọ riẹ Jọn o te dikihẹ kugbe ilele ivẹ riẹ. Epanọ Jesu o bi ro sikẹle na, ọ tẹ wariẹ ta nọ: “Ri Omogodẹ Ọghẹnẹ!” Nọ ọ ta ere no, ilele ivẹ Jọn Ọhọahwo-Ame enana a te lele Jesu. Ọvo rai jọ họ Andru, yọ ababọ avro ohwo ọdekọ họ uzedhe ohwo nọ o kere eware enana, ọnọ a re je se Jọn. Jọn ọnana, wọhọ epanọ a dhesẹ i rie, yọ ọmọ oniọvo oni Jesu, nọ ọ rọ ọmọ oniọvo Meri, Salomi.

Nọ o kuomarẹriẹ jẹ ruẹ Andru gbe Jọn nọ a bi lele iei, Jesu ọ tẹ ta nọ: “Eme wha re duo?”

A tẹ nọ nọ: “Rabae, . . . bovẹ whọ rẹ ria?”

Jesu ọ tẹ kuyo nọ: “Wha nyaze wha rẹ te ruẹ.”

Oke u te ighọjọ ene no evaọ owọwọ, yọ Andru avọ Jọn a rọ kugbe Jesu evaọ ẹdẹ ọyena kpobi. Oyena o vrẹ no oma u te mu Andru te epanọ o ro siawọ nya e gwọlọ oniọvo riẹ, ọnọ a re se Pita. Ọ tẹ ta kẹe nọ: “Ma ruẹ Mesaya na [no].” Ọ tẹ rehọ Pita bru Jesu. O wọhọ nọ Jọn evaọ okiọvo na ọ tẹ ruẹ oniọvo riẹ Jemis ọ tẹ rehọ iẹe bru Jesu re; ghele, wọhọ epanọ uruemu riẹ o rọ, Jọn o te si ovuẹ obọriẹ nana no obe Usiuwoma riẹ.

Okiokiọ riẹ, Jesu ọ tẹ ruẹ Filip, ọnọ o no Bẹtsaida ze, okpẹwho ovo na nọ Andru gbe Pita a no ze. O te zizie ei: “Lele omẹ.”

Filip ọ tẹ ruẹ Nataniẹl, ọnọ a re je se Batolomiu, ọ tẹ ta nọ: “Ma ruẹ ọ nọ Mosis ọ jọ evaọ uzi gbe eruẹaro na kere [no], Jesu e Nazarẹt, ọmọ Josẹf.” Nataniẹl ọ tẹ jẹ vro. Ọ tẹ nọ nọ: “Kọ oware uwoma jọ o rẹ sai no Nazarẹt tha re?”

Filip ọ tẹ ta kẹe nọ, “Nyaze, whọ te ruẹ.” Nọ a jẹ nya bru Jesu ze, Jesu ọ tẹ ta kpahe Nataniẹl nọ: “Ri, emamọ ohwo Izrẹl, eviaviẹ e rọ eva riẹ hẹ!”

Nataniẹl ọ tẹ nọ nọ: “Bovẹ whọ jẹ riẹ omẹ?”

Jesu ọ tẹ kuyo nọ: “Nọ Filip o ti se owhẹ hẹ, no whọ jọ otọ ure-ojo, mẹ ruẹ owhẹ.”

U te gbe Nataniẹl unu. Ọ tẹ ta nọ: “Rabae [onọ otofa riẹ o rọ Owuhrẹ], whẹ họ Ọmọ Ọghẹnẹ! Whẹ họ Ovie Izrẹl!”

Jesu ọ tẹ nọ nọ: “Fiki epanọ mẹ ta kẹ owhẹ nọ, mẹ ruẹ owhẹ evaọ otọ ure-ojo, whọ [jẹ] rọwo? Whọ rẹ te ruẹ eware ilogbo nọ i vi enana.” Ọ tẹ y’eyaa nọ: “Uzẹme, uzẹme, mẹ ta kẹ owhai, wha rẹ te ruẹ ehru nọ o rovie, gbe ikọ-odhiwu Ọghẹnẹ nọ i re ti kpo ehru [je nwhrotọ bru] Ọmọ ohwo.”

U kri hi nọ onana o vrẹ no, Jesu, kugbe ilele ekpokpọ riẹ, a te no Ukiekpotọ Jọdan a te kpohọ Galili. Jọn 1:29-51.

▪ Amono họ ilele ọsosuọ Jesu?

▪ Ẹvẹ a ro dhesẹ Pita jegbe Jemis kẹ Jesu?

▪ Eme ọ kẹ Nataniẹl imuẹro inọ Jesu yọ Ọmọ Ọghẹnẹ?