Uzou Avọ 17

Ewuhrẹ Nikodimọs

OKENỌ ọ jọ ehaa Ọnyavrẹ 30 C.E. na, Jesu o te dhesẹ eware urirẹ, hayo igbunu. Fikiere, ahwo buobu a te fi ẹrọwọ họ iẹe. Eware enana i te duobọ te Nikodimọs udu, omọvo Sanhẹdrin, okọto okpehru ahwo Ju, ọ tẹ gwọlọ nọ o re gbe wuhrẹ viere. Fikiere o te weze bru Jesu evaọ aso, ẹsejọhọ fiki ozọ nnọ otẹrọnọ isu ahwo Ju efa a rue riẹ, o te raha emamọ odẹ riẹ.

Ọ tẹ ta nọ: “Rabae, ma riẹ nọ whẹ owuhrẹ nọ ono obọ Ọghẹnẹ ze; keme ohwo ọvo ọ sai ru eware enana no who bi ruẹ na ha, ajokpa nọ Ọghẹnẹ avọ iẹ a rọ.” Evaọ uyo, Jesu ọ tẹ ta kẹ Nikodimọs inọ re ohwo ọ ruọ Uvie Ọghẹnẹ, a rẹ ‘wariẹ yẹi.’

Ghele na, ẹvẹ a sae rọ wariẹ yẹ ohwo? Nikodimọs ọ tẹ nọ nọ: “Kọ ọ jẹ sae ruọ eva edhede oni riẹ orọ avivẹ re a yẹ i?”

Ijo, oye họ otofa ọwariẹ yẹ hẹ. Jesu o te ru ei vevẹ nọ: “Ajokpa ame gbe Ẹzi i gbe yẹ ohwo ho ọ sae ruọ uvie Ọghẹnẹ hẹ.” Okenọ Jesu ọ họ-ame nọ ẹzi ọfuafo o ro kie mu ei, ere a ro yẹi ‘no ame gbe ẹzi’ ze. Ẹkwoma urru nọ u no odhiwu ze, ‘Ọnana họ Ọmọ mẹ ọnọ mẹ jẹrehọ,’ Ọghẹnẹ o te whowho nọ o yẹ ọmọ abọ-ẹzi no nọ o wo ẹruore ẹruọ Uvie obọ odhiwu. Uwhremu na, eva Pẹntikọst 33 C.E., amọfa nọ a họ-ame a ti je wo ẹzi ọfuafo a vẹ te wariẹ yẹ ai wọhọ emọ abọ-ẹzi Ọghẹnẹ.

Rekọ iruo Ọmọ obọdẹ ohwo-akpọ Ọghẹnẹ i wuzou. Jesu ọ ta kẹ Nikodimọs nọ: “Epanọ Mosis ọ kpare oriọvọ eva obọ ẹwọ na ere a rẹ te kpare Ọmọ ohwo re, kohwo kohwo nọ ọ rọwo riẹ ore wo uzuazọ ebẹdẹ bẹdẹ.” Ẹhẹ, epanọ emọ Izrẹl nọ eraomuomu e rowo na a rri araomuomu oro na re a zọ na, ere o gwọlọ nọ ahwo-akpọ kpobi a re fi ẹrọwọ họ Ọmọ Ọghẹnẹ re a zọ no eyero uwhu rai.

Bi fiẹgba họ ẹkẹ abọ uyoyou Jihova evaọ onana, Jesu ọ tẹ ta kẹ Nikodimọs nọ: “Ọghẹnẹ o you akpọ na hrọ, ọ jẹ rehọ Ọmọvo riẹ kẹ, re kohwo kohwo nọ ọ rọwo riẹ o gbe vrẹ hẹ rekọ o re wo uzuazọ ebẹdẹ bẹdẹ.” Fikiere, evaọ obọ Jerusalẹm obonẹ evaọ emerae ezeza ọvo nọ o mu odibọgba riẹ họ no, Jesu o te ru ei vevẹ inọ ọye họ edhere nọ Jihova Ọghẹnẹ o ti ro siwi ahwo-akpọ.

Jesu ọ tẹ ta haro kẹ Nikodimọs nọ: “Keme Ọghẹnẹ o vi Ọmọ na ze akpọ re o ti bruoziẹ akpọ họ,” koyehọ, orọnikọ o ti brukpe akpọ na ha, re o bruoziẹ kpe uyẹ ahwo-akpọ kpobi kpohọ ọraha. Ukpoye, wọhọ epanọ Jesu ọ ta, a vi ei ze “re akpọ na o wo esiwo fiki riẹ.”

Nikodimọs ọ nyabru Jesu ze ozozọ evaọ aso. Fikiere o tẹ rọ oware isiuru inọ Jesu o ku eme riẹ họ kugbe ei ta nọ: “Onana họ oziẹ na, elo [nọ o dhesẹ oma via evaọ uzuazọ gbe iwuhrẹ Jesu] ọ ze akpọ na, ahwo a te you ebi vi elo, fiki uruemu uyoma rai. Keme kohwo kohwo nọ o re ru umuemu o re mukpahe elo, o re bikẹle elo ho, re a siọ iruo riẹ ba erimuo. Rekọ ọnọ o re ru uvi oware ọ rẹ ze obọ elo, re a ruẹse ruẹ rai vevẹ epanọ obọ Ọghẹnẹ o rọ iruo riẹ kpobi.” Jọn 2:23–3:21; Matiu 3:16, 17; Iruẹru 2:1-4; Ikelakele 21:9.

▪ Eme ọ wọ Nikodimọs kpohọ iweze riẹ, kọ fikieme ọ jẹ nyaze evaọ aso?

▪ Eme u dhesẹ re a ‘wariẹ yẹ’ ohwo?

▪ Ẹvẹ Jesu o ro dhesẹ ẹkẹ iruo riẹ evaọ esiwo mai?

▪ Eme o dhesẹ nọ Jesu ọ nyaze ti bruoziẹ akpọ na ha?