Uzou Avọ 22

A Se Ilele Ene

NỌ O vrẹ okenọ a rọ gwọlọ kpe Jesu evaọ ẹwho riẹ Nazarẹt no, ọ tẹ nya kpohọ okpẹwho Kapaniọm kẹle Abade Galili. Onana u te ru eruẹaruẹ Aizaya ọfa gba. Onọ o ruẹaro nọ ahwo Galili nọ e be rria akotọ abade a ruẹ elo ologbo.

Nọ Jesu ọ be wha iruo elo ẹta usiuwoma Uvie riẹ haro evaọ etenẹ na, o te duku ilele ene riẹ. Enana i lele i rie usu no vẹre rekọ a te kuoma rẹriẹ kpohọ iruo ikuori rai nọ a lele Jesu no Judia ze no. Ẹsejọhọ, Jesu ọ gwọlọ e rai via, keme oke u te no re o wo ifiobọhọ nọ e rẹ jọ kugbe ei ẹsikpobi nọ o re wuhrẹ re a wha odibọgba na haro okenọ ọ tẹ nya vrẹ no.

Fikiere nọ Jesu ọ be nya evaọ akotọ unueri na ọ tẹ ruẹ Saimọn Pita avọ egbẹnyusu riẹ nọ e be wozẹ eriri rai, ọ tẹ nya bru ai. Ọ tẹ gadiẹ ruọ okọ Pita ọ tẹ ta kẹe nọ o le okọ họ. Nọ a dina bi no okpa no, Jesu ọ tẹ keria okọ na o te mu ogbotu nọ i dikihẹ okpa họ ewuhrẹ.

Oyena o vrẹ no, Jesu ọ tẹ ta kẹ Pita nọ: “Gohọ edidi, wha fi iriri rai họ re wha si.”

Pita ọ tẹ kuyo nọ: “[Owuhrẹ], ma ruẹ uye okioke, ma tọlọ oware ovo ho! Rekọ epa ẹme ra, me re fi iriri na họ.”

A te fi iriri na họ, a te mu iyei buobu te epanọ iriri na i ro muhọ ẹbẹre. Avọ ovẹrẹ, ezae na a te se erivẹ rai evaọ okọ nọ o kẹle rai re a ti fiobọhọ kẹ ai. U kri hi ekọ ivẹ na e tẹ vọ avọ iyei buobu te epanọ ekọ na i ro muhọ ezue. Nọ ọ ruẹ onana, Pita o te kie fihọ aro Jesu ọ tẹ ta nọ: “Vrẹ no omẹ, Olori, keme mẹ ọrahaizi.”

Jesu ọ tẹ kuyo nọ: “Whọ dhẹ hẹ, nọ umuo na vrẹ who ti mu ahwo.”

Jesu o te je zizie Andru oniọvo Pita. Ọ ta kẹ ae nọ: “Wha nya lele omẹ, me re ru owhai ikuori ahwo.” Egbẹnyusu ikuori rai Jemis avọ Jọn, emezae Zẹbẹdi, a kẹ rai uzizie ovo na re, ae imava a te je lele iei ababọ izudhe. Fikiere ene enana a tẹ nyasiọ iruo ikuori rai ba a te zihe ruọ ilele ene ọsosuọ Jesu, enọ e jọ kugbei ẹsikpobi. Luk 5:1-11; Matiu 4:13-22; Mak 1:16-20; Aizaya 9:1, 2.

▪ Fikieme Jesu o je se ilele riẹ nọ a lele iei, kọ amono o se?

▪ Didi oware igbunu u fi idudu họ Pita oma?

▪ Didi oghẹrẹ iyei-ikpe Jesu o zizie ilele riẹ nọ a ru?