Uzou Avọ 28

A nọ Riẹ Kpahe Emuọriọ-Seba

UNWENỌ ukpe ovo o vrẹ no nọ Jesu o ro kpohọ ehaa Ọnyavrẹ ọ 30 C.E. U te emerae buobu no nọ a ro fi Jọn Ọhọahwo-Ame na họ uwou-odi. Dede nọ ọ gwọlọ nọ ilele riẹ a lele Kristi, orọnikọ aikpobi a ru ere no ho.

Whaọ ilele enana jọ erọ Jọn nọ a fihọ uwou-odi na a te bru Jesu ze a tẹ nọ nọ: “Eme mai avọ otu Farisi a jẹ se emuoriọ ba, yọ ilele ra e gbẹ siọ emuọriọ ba ha?” Otu Farisi na a rẹ siọ emuọriọ ba isiava ẹkpoka wọhọ uruemu egagọ rai. Yọ ẹsejọhọ ilele Jọn a bi lele uruemu ovo na. O sae jẹ jọ nọ a be siọ emuọriọ ba ro weri Jọn nọ a fihọ uwou-odi, u te bi gbe ai unu oware nọ ilele Jesu a gbe bi lele ai evaọ edhesẹ uweri onana ha.

Evaọ uyo, Jesu o te ru ei vevẹ nọ: ‘Kọ egbẹnyusu ọva a rẹ sai bruenu nọ ọva avọ ae a gbẹ rọ? Edẹ e te tha, nọ a te rehọ ọva na se ae ba, kẹsena a vẹ te siọ emuọriọ ba.’

Ilele Jọn a rẹ kareghẹhọ nọ Jọn omariẹ ọ kake ta kpahe Jesu no wọhọ Ọva. Fikiere nọ Jesu ọ gbẹ rọ uzuazọ na, Jọn o re rri rie nọ u fo re ọ se emuore ba ha, yọ ere o rọ re kẹ ilele Jesu. Uwhremu na, okenọ Jesu o whu, ilele riẹ a weri jẹ siọ emuọriọ ba. Rekọ nọ a kpare iẹe no je kpohọ odhiwu no, u gbe du fo re a siọ emuọriọ ba ha.

Ofariẹ, Jesu ọ tẹ kẹ etadhesẹ enana: ‘Ohwo ọvo o re ko oviẹ ohọ okpokpọ fihọ ewu anwae he, keme oviẹ ohọ na o rẹ bẹre ino ewu na, o vẹ bẹre eghogho vi ere. A re fi udi okpokpọ họ oviẹ udi anwae gbe he keme eviẹ na e rẹ bẹra, udi na u ve hwẹ, eviẹ na e vẹ raha, rekọ a re fi udi okpokpọ họ eviẹ udi okpokpọ, ae ivẹ na a vẹ jarọ.’ Abọ vẹ etadhesẹ enana i wo kpahe emuọriọ-seba?

Jesu o bi fiobọhọ kẹ ilele Jọn Ọhọahwo-Ame na wo ovuhumuo nọ ohwo ọvo o re rẹro nọ ilele riẹ a re koko iruemu anwae ahwo Ju hu, wọhọ emuọriọ-seba. Orọnikọ ọ nyaze te zuẹ eyere-akpọ anwae egagọ nọ i ti kuhọ kẹle he. A ti ru re Egagọ-Ahwo-Kristi e roma kpotọ kẹ egagọ ahwo Ju erọ edẹ eyena avọ iruemu ahwo rai hi. Ijo, o te jọ wọhọ ozuẹ okpokpọ nọ a rọ zuẹ ewu anwae hayo udi okpokpọ nọ a fihọ eviẹ anwae he. Matiu 9:14-17; Mak 2:18-22; Luk 5:33-39; Jọn 3:27-29.

▪ Amono a jẹ siọ emuọriọ ba, kọ fikieme?

▪ Fikieme ilele Jesu a gbẹ siọ emuọriọ ba ha nọ ọ jọ kugbe ai, kọ evaọ obaro ẹvẹ ẹjiroro emuọriọ-seba u ti ro serihọ?

▪ Didi etadhesẹ Jesu ọ kẹ, kọ eme họ otofa rai?