Uzou Avọ 31

Ẹkọrọ Eka Evaọ Ẹdijala

U KRI hi Jesu avọ ilele riẹ a te no Jerusalẹm re a zihe kpohọ Galili. O rọ oke okpakpọ, yọ evaọ idhu na eka e who no. Ohọwo u bi kpe ilele na. Fikiere a tẹ kọrọ eka na a te muhọ ẹre. Rekọ nọ o rọ Ẹdijala na, oware nọ a ru na u dhere he.

U ri kri hi nọ isu egagọ Jerusalẹm a rọ gwọlọ nọ a re kpe Jesu fikinọ a ta nọ ọ be raha Ẹdijala. Enẹna otu Farisi na a tẹ wha ẹme ọfa ze. A tẹ ta nọ: “Ri, ilele ra a [bi] ru oware nọ ufo eruo ho ẹdẹ ẹdijala.”

Otu Farisi na a ta nọ ẹkọrọ eka re a jẹ rehọ obọ thoviẹ ai re yọ ivuẹvu gbe ẹkpare eka. Rekọ eware nọ a be rehọ wọhọ iruo u te ru Ẹdijala na zihe ruọ owha-ogbẹgbẹdẹ, kpakiyọ a fi ei họ re o jọ oke oghọghọ, orọ ọbọga abọ-ẹzi. Fikiere Jesu ọ tẹ rehọ iriruo Ikereakere na rọ zai dhe ro dhesẹ nọ Jihova Ọghẹnẹ o wo iroro egaga itieye na họ eva ha evaọ ekoko uzi Ẹdijala Riẹ.

Jesu ọ ta nọ okenọ ohọwo u kpe Devidi avọ ahwo riẹ, a tẹ wẹriẹ uwou-udhu na a tẹ re ebrẹdi udhesẹ. A si ebrẹdi enana no aro Jihova no a tẹ rehọ ekpokpọ nwene ai, a te fi ai họ obei kẹ izerẹ na re a re. Ghele na, fiki epanọ eware i kie fihọ, a bru kpe Devidi avọ ahwo riẹ fikinọ a ru erei hi.

Nọ ọ jẹ kẹ oriruo ọfa, Jesu ọ tẹ ta nọ: “Manikọ wha ri se uzi na ha epanọ izerẹ e [rọ] raha ẹdẹ ẹdijala eva uwou egagọ-ode yọ a reabe he?” Ẹhẹ, makọ evaọ Ẹdijala na dede izerẹ na a rẹ va erao je ru iruo efa eva etẹmpol na evaọ ẹruẹrẹfihọ idhe erao! Jesu ọ tẹ ta nọ: “Rekọ mẹ takẹ owhai nọ, Ọnọ ọ rọ etenẹ ọ ro vi uwou egagọ-ode.”

Be whọku otu Farisi na, Jesu ọ tẹ gbẹ ta haro nọ: “Rekọ wha riẹ otọ onana yo, ‘Mẹ guọlọ ohrọ orọnọ iwẹ hẹ’, wha hẹ sai brukpe enọ e kareabe he.” O te ku ei họ nọ: “Keme Ọmọ ohwo họ olori ẹdẹ ẹdijala.” Eme họ otofa ẹme Jesu ọyena? Jesu ọ be ta kpahe esuo udhedhẹ Uvie riẹ ọrọ ikpe odu na.

Anwọ ikpe 6,000 na, ohwo-akpọ ọ be ruẹ uye olahiẹ igbo evaọ otọ Setan Ẹdhọ na, avọ ozighi gbe ẹmo nọ e rọ odode. Evaọ abọdekọ riẹ, esuo Ẹdijala ologbo Kristi na o te jọ oke eriosehọ no uye-oruẹ itieye na kpobi gbe ọnyawọ. Matiu 12:1-8; Iruo-Izerẹ 24:5-9; 1 Samuẹle 21:1-6; Ikelakele 28:9; Hosia 6:6.

▪ Didi ota a bọwo ilele Jesu, kọ didi uyo Jesu ọ kẹ?

▪ Didi ekie otu Farisi na Jesu o dhesẹ via?

▪ Evaọ edhere vẹ Jesu ọ rọ rọ “olori ẹdẹ ẹdijala” na?