Uzou Avọ 34

Ẹsalọ Ikọ Riẹ

U TE unwenọ ukpe ọvo gbe ubro no anwẹ nọ Jọn Ọhọahwo-Ame na o ro dhesẹ Jesu via wọhọ Omogodẹ Ọghẹnẹ gbe okenọ Jesu o ro muọ odibọgba ẹgbede riẹ họ. Eva oke yena Andru, Saimọn Pita, Jọn, gbe ẹsejọhọ Jemis (oniọvo Jọn), jegbe Filip avọ Nataniẹl (nọ a re je se Batolomiu), a zihe ruọ ilele ọsosuọ riẹ no. U kri hi, ibuobu efa a te kuomagbe ai bi lele Kristi.

Whaọ Jesu ọ ruẹrẹ oma kpahe no re ọ salọ ikọ riẹ. Enana e rẹ te jọ egbẹnyusu ekpekpe riẹ enọ ọ te kẹ obọdẹ uwuhrẹ. Rekọ taure ọ tẹ te salọ ai, Jesu o te kpohọ obọ ugbehru ọ tẹ jọ obei okioke be lẹ, ẹsejọhọ be yare areghẹ gbe oghale Ọghẹnẹ. Nọ oke o ke no, o te se ilele riẹ ọ tẹ jọ udevie rai salọ 12. Ghele na, nọ a gbẹ rọ emọ-iwuhrẹ Jesu na, a sai je se ai ilele re.

Ezeza nọ Jesu ọ salọ nọ a jọ obehru fodẹ na họ enọ i zihe ruọ ilele ọsosuọ riẹ. Ọ tẹ jẹ salọ Matiu, ọnọ Jesu o se no ọfisi azọhọ na ze. Isoi edekọ nọ ọ salọ họ Judas (ọnọ a re je se Tadiọs), Judas Iskariọt, Saimọn ohwo Kenan, Tọmas, gbe Jemis ọmọzae Alfiọs. A re je se Jemis ọnana Jemis Ọsese na, ẹsejọhọ fikinọ ọ rọ kuako hayo fikinọ ọ maha vi Jemis ukọ ọdekọ na.

Ikpegbivẹ enana a rọ kugbe Jesu dina kri no, yọ ọ riẹ rai ziezi. Evaọ uzẹme, ejọ rai yọ imoni riẹ. Jemis gbe oniọvo riẹ Jọn yọ emọ-uruọmọ ẹsiẹvo kugbe Jesu. Yọ o wọhọ nọ Alfiọs yọ oniọvo Josẹf, ọsẹ aruakpọ Jesu. Fikiere ọmọzae Alfiọs, Jemis ukọ na, avọ Jesu emọ uruọmọ.

Whaọ Jesu o wo ẹbẹbẹ evaọ ẹkareghẹhọ edẹ ikọ riẹ hẹ. Rekọ, kọ whọ sae kareghẹhọ ai? Whaọ, thakpe kareghẹhọ nọ ivẹ e riẹ nọ a re se Saimọn, ivẹ nọ a re se Jemis, gbe ivẹ nọ a re se Judas, jegbe nọ Saimọn o wo oniọvo Andru, gbe nọ Jemis o wo oniọvo Jọn. Enẹ whọ rẹ rọ kareghẹhọ ikọ eree. Ene nọ i kiọkọ na i kugbe omiazọhọ (Matiu), ọjọ nọ ọ vro uwhremu na (Tọmas), ọnọ a se no otọ ure ze (Nataniẹl), gbe ogbẹnyusu riẹ Filip.

Ikọ ikpegbọvo i no Galili ze, ẹkwotọ otẹwho Jesu. Nataniẹl o no Kena ze. Filip, Pita, gbe Andru a kaki no Bẹtsaida ze, rekọ uwhremu na Pita avọ Andru a tẹ kua kpohọ Kapaniọm, oria nọ o wọhọ nọ Matiu ọ jẹ rria. Jemis avọ Jọn a jọ akiruo ikuori rai yọ o wọhọ nọ a jẹ rria Kapaniọm hayo ekẹloma riẹ. O wọhọ nọ Judas Iskariọt, ọnọ o vivie Jesu uwhremu na, ọy’ọvo họ ukọ nọ o no Judia ze. Mak 3:13-19; Luk 6:12-16.

▪ Ikọ vẹ e jọ imoni Jesu?

▪ Amono họ ikọ Jesu, kọ ẹvẹ whọ sae rọ kareghẹhọ edẹ rai?

▪ Ẹwho vẹ ikọ na a no ze?