Uzou Avọ 36

Ẹrọwọ Ologbo Olori Isoja Jọ

OKENỌ Jesu ọ kẹ Ovuẹ obọ Ugbehru riẹ, yọ ọ nyate enwenọ udevie odibọgba ẹgbede riẹ no. Onana u te dhesẹ nọ o wo oware wọhọ ukpe ọvo gbe emerae izii re o kuọ iruo otọakpọ riẹ họ.

Jesu ọ tẹ rueva okpẹwho Kapaniọm, onọ o wọhọ ẹwho nọ ọ rọ ehri kẹ iruẹru riẹ. Ekpako ahwo Ju a te bru ei ziọ etenẹ avọ ayare jọ. Olori isoja ogbaẹmo ahwo Rom jọ ọnọ ọ rọ Ọgẹdhọ, ọzae uyẹ ọfa hẹriẹ oma no ahwo Ju, ọye o vi rai ze.

Odibo oyoyou olori isoja na ọ mọ kẹle uwhu no, yọ ọ gwọlọ nọ Jesu o siwi odibo riẹ. Ahwo Ju na a tẹ be lẹ gaga kẹ olori isoja na. A tẹ ta nọ: “O te epanọ who re ro ru onana kẹe, keme o you orẹwho mai, ọye ọvo ọ bọ uwou-egagọ [na] kẹ omai.”

Ababọ izudhe, Jesu o te lele ezae na. Ghele na, nọ a kẹle no, olori isoja na o te vi egbẹnyusu riẹ haro ta nọ: “Olori whọ lahiẹ omara ha keme me te epanọ whọ rẹ rọ tha otọ ebọ mẹ hẹ; fiki ere me roro nọ me te epanọ me re ro bru owhẹ tha gbe he.”

Ẹvẹ eme enana i wo omurokpotọ te rọ kẹ olori isoja nọ ọ rẹ tahọ amọfa obọ! Rekọ o sae jọ nọ o bi roro kẹ Jesu, vuhumu nọ uruemu-ẹwho o ghọ nọ ohwo Ju o re kuomagbe ahwo nọ a rọ ahwo Ju hu. Makọ Pita ọ ta nọ: “Whai ọvo ajoma riẹ nọ ufo kẹ ohwo Ju hu, nọ o re ro kuomagbe hayo lele ohwo orẹwho ọfa.”

Ẹsejọhọ fikinọ ọ gwọlọ nọ Jesu ọ ruẹ uye ẹraha uruemu-ẹwho ọnana ha, olori isoja na ọ tẹ ta kẹ egbẹnyusu riẹ re a yare kẹe nọ: ‘Rekọ tẹme na ọvo, oma o te ga odibo mẹ. Keme mẹ ohwo nọ a kẹ udu re, me wo elakpa obọ mẹ: mẹ ta kẹ ọna nọ “Nya,” ọ vẹ nya; ọfa, “Nyaze,” ọ vẹ nyaze; odibo mẹ, “Ru ona,” o ve ru ei.’

Whaọ, nọ Jesu o yo ẹme ọnana, u te gbei unu. Ọ tẹ ta nọ: “Mẹ ta kẹ owhai, mẹ te ruẹ orọwọ oruaro utiona ha, ijo, o rọ eva Izrẹl he.” Nọ o siwi odibo olori isoja na no, Jesu ọ tẹ rehọ uvẹ na fodẹ oghẹrẹ nọ ahwo nọ e rọ erẹwho Ju hu nọ i wo ẹrọwọ a ti ro wo aruoriwo gbe eghale nọ ahwo Ju nọ e kare ẹrọwọ a se.

Jesu ọ ta nọ: “Ibuobu i reti no obọ ovatha-ọre gbe obọ [ukiediwo] riẹ tha, a rẹ te keria gba Abraham, gbe Aiziki gbe Jekọp eva uvie odhiwu, rekọ emọ uvie na a reti fi ai họ ebi afe; etẹe oviẹ gbe akọriọ [rai] e rẹte jọ.”

‘Emọ uvie na nọ a gbolo fihọ ebi otafe’ na họ emotọ ahwo Ju enọ e jẹ uvẹ nọ a kake rọ kẹ ai rehọ họ onọ a hẹ rọ jọ ibe-isu kugbe Kristi. Abraham, Aiziki, avọ Jekọp a dikihẹ kẹ ọruẹrẹfihotọ Uvie Ọghẹnẹ. Fikiere Jesu ọ be ta kpahe oghẹrẹ nọ a ti ro dede ahwo orẹwho Egedhọ rehọ re a keria emẹjẹ obọ odhiwu “eva uvie odhiwu.” Luk 7:1-10; Matiu 8:5-13; Iruẹru 10:28.

▪ Fikieme ahwo Ju a jẹ lẹ kẹ olori isoja ohwo Ọgẹdhọ na?

▪ Eme a sae ta nọ o soriẹ ze nọ olori isoja na o gbe zizie Jesu nọ ọ rueva uwou riẹ hẹ?

▪ Eme Jesu ọ rehọ eme ekuhọ riẹ dhesẹ?