Uzou Avọ 38

Kọ Jọn Ọ Kare Ẹrọwọ?

JỌN Ọhọahwo-Ame na, ọnọ ọ rria uwou-odi kri te ukpe ọvo no na, o te yo kpahe iyẹrẹ ẹkparomatha ọmọzae aye-uku obọ Nein na. Rekọ Jọn ọ gwọlọ yo no unu Jesu ze kpahe otofa onana, fikiere o te vi ilele ivẹ riẹ re a nya e nọe inọ: ‘Whẹ họ ọnọ ọ be tha na manikọ ma bi rẹro ọfa?’

Onọ yena o wọhọ onọ igbunu, maero nọ o rọnọ Jọn ọ ruẹ ẹzi Ọghẹnẹ nọ o kiemu Jesu je yo urru Ọghẹnẹ nọ ọ jẹ riẹ rehọ evaọ okenọ ọ jẹ họ Jesu ame kẹle ikpe ivẹ nọ e vrẹ no. Onọ Jọn u re ru ahwo jọ ta nọ ẹrọwọ riẹ u whrehe no. Rekọ onana o rọ ere he. Jesu ọ hae ta ewoma Jọn rro tere he, onọ ọ jọ oke onana ta, otẹrọnọ Jọn o muhọ ẹvro no. Kọ fikieme Jọn ọ jẹ nọ onọ onana?

Jọn ọ fake gwọlọ yo no unu Jesu ze inọ Ọye họ Mesaya na. Onana o rẹ kẹ Jọn ẹgba nọ ọ be jọ uwou-odi riakọ na. Rekọ o sae jọ nọ oware nọ o lẹliẹ Jọn n’onọ na o rro viere. O wọhọ nọ ọ gwọlọ riẹ sọ ọfa jọ ọ be tha, ohwo nọ ọ te rehọ ẹta riẹ, ọnọ o ti ru eware edekọ kpobi nọ a ta kpahe Mesaya na gba.

Rọ kpahe eruẹaruẹ Ebaibol nọ Jọn ọ riẹ, Ọnọ Ọghẹnẹ o ku Ẹzi ku na ọ rẹ te jọ ovie, osiwi. Ghele na, Jọn ọ gbẹ rọ uwou-odi, makọ emerae buobu nọ Jesu ọ họ-ame no. Fikiere o sae jọ nọ Jọn ọ be nọ Jesu nọ: ‘Kọ whẹ họ ọnọ ọ te ghinẹ rehọ Uvie Ọghẹnẹ mu avọ ogaga na, manikọ ọfa jọ ọ riẹ, ọnọ ọ te rehọ ẹta ra, ọnọ ma rẹ hẹrẹ re o ti ru eruẹaruẹ igbunu nọ e ta kpahe oruaro Mesaya na gba?’

Ukpenọ ọ ta kẹ ilele Jọn nọ, ‘Mẹ họ ọnọ ọ be tha na!’ evaọ auwa ọyena Jesu o te muọ ahwo buobu họ esiwo, bi siwi oghoghẹrẹ eyao gbe edada. Ọ tẹ ta kẹ ilele na nọ: ‘Wha kpo wha ta kẹ Jọn eware nọ wha ruẹ gbe enọ wha yo: ituaro e be ruẹ ude, emo e be nya, emoti e be fo, idiezọ i bi yo ẹme, iwhuowhu e be kparoma, iruori a be vuẹ ae usiuwoma na.’

Evaọ abọ ọfa riẹ, onọ Jọn na o sae jọ nọ o bi rẹro nọ Jesu o ti ru vi epanọ o bi ru na gbe nọ ẹsejọhọ ọ te kẹ Jọn ufuoma dede. Ghele na, Jesu ọ be ta kẹ Jọn inọ o rẹro vi eware igbunu nọ Jesu o bi ru na ha.

Okenọ ilele Jọn a nyavrẹ no, Jesu ọ tẹ rẹriẹ ova ku ogbotu na ọ tẹ ta kẹ ai nọ Jọn họ “ukọ” Jihova ọnọ a ruẹaro riẹ evaọ Malakae 3:1 na ọ tẹ jẹ rọ Elaeja nọ a ruẹaro riẹ evaọ Malakae 4:5, 6. Fikiere ọ tẹ kpare Jọn kpehru wọhọ ẹrẹrẹ kugbe ọruẹaro ọfa kpobi nọ ọ kake rehọ iẹe rria no, ta nọ: “Uzẹme mẹ ta kẹ owhai, eva enọ eyae i yẹ na ọnọ ọ ro vi Jọn Ọhọahwo-Ame ọ riẹ hẹ; rekọ ọnọ ọ mae kawo eva uvie odhiwu ọ ro vi ei. Nọ umuo edẹ Jọn Ọhọahwo-Ame ri te enẹna uvie obọ odhiwu na họ ute nọ ahwo a be ya kẹ.”—NW.

Jesu ọ be jọ etenẹ dhesẹ nọ Jọn ọ te jọ Uvie obọ odhiwu na ha, keme ohwo nọ ọ mae jọ obei kawo ọ rro vi Jọn. Jọn ọ ruẹrẹ edhere kẹ Jesu rekọ o whu taure Kristi ọ tẹ te koka họ ọvọ na, hayo agrimeti na, kugbe ilele riẹ, re a jọ ibe-isu kugbei evaọ Uvie riẹ. Oye jabọ Jesu ọ jẹ ta nọ Jọn ọ te jọ Uvie obọ odhiwu na ha. Ukpoye Jọn ọ rẹ te rria otọakpọ Uvie Ọghẹnẹ. Luk 7:18-30; Matiu 11:2-15.

▪ Fikieme Jọn ọ jẹ nọ sọ Jesu họ Ọnọ ọ be Tha na hayo sọ a re rẹro ọfa?

▪ Didi eruẹaruẹ Jesu ọ ta nọ Jọn o rugba?

▪ Fikieme Jọn Ọhọahwo-Ame na ọ gbẹ te rọ jọ odhiwu kugbe Jesu hu?