Uzou Avọ 44

Ẹdaji Ẹkporo Ọgaga

JESU o ruiruo gaga no evaọ ẹdẹ ọnana, kugbe ewuhrẹ ogbotu na evaọ abotọ unueri gbe otọ etadhesẹ na nọ ọ lẹlẹ fa kẹ ilele riẹ. Nọ oke u te owọwọ no, ọ tẹ ta nọ: ‘Ma fa kpohọ abọdekọ.’

Eva unueri ofẹ ovatha-ọre ọ Abade Galili na họ ofẹ nọ a re se Dẹkapọlis, no ubiẹme Grik ze deʹka, nọ u dhesẹ “ikpe,” gbe poʹlis, nọ u dhesẹ “okpẹwho.” Ikpewho Dẹkapọlis na họ ehri ọ iruemu-ẹwho ahwo Grik, dede nọ ahwo Ju buobu a be riae re. Iruẹru Jesu evaọ ofẹ oyena u tulo ho. Makọ evaọ iweze nana, wọhọ epanọ ma te jọ obaro ruẹ na, a whaha e riẹ nọ ọ rria etẹe kri hi.

Nọ Jesu ọ yare inọ a kpohọ ofẹ unueri obei, ilele na a te fi ei họ okọ. Rekọ ahwo buobu a riẹ kpahe ẹfavrẹ rai. U kri hi amọfa a tẹ ruọ ẹkẹ ekọ esese rai re a lele ai usu. Ubiokọ na u thabọ tere he. Evaọ uzẹme, Abade Galili na yọ awae ologbo nọ u theri te ole ikilomita 20.8 yọ o kẹre te ikilomita 12.

Oma o ghinẹ lọhọ Jesu no. Fikiere, nọ a nwani lehọ no, o te kiẹzẹ ẹro okọ na, ọ tẹ rọ uzou kpahe ọthuzou, o te kie ruọ owezẹ udidi. Ikọ na buobu a biokọ reria no, keme a jọ Abade Galili na kpe iyei kri no. Fikiere ae a je biokọ na.

Rekọ erẹ ọnana ọ te lọhọ tere he. Fikiọ ehru awae na nọ ọ be roro, nọ o rehọ ole imita 215 kpotọ vrẹ usi abade, yọ ofou odhedhẹ o bi fou evaọ ehru igbehru ekẹloma na, ẹsejọ ofou ọgaga o re fou ze otọ ọ vẹ wha ẹvohẹ ọgaga họ awae na. Oware nọ o via obọnana oye. U kri hi ẹkporo na o te muọ okọ na họ ẹtehe, fikiere okọ na o tẹ kẹle ezue. Ghele na, Jesu ọ gbẹ rọ owezẹ!

Ezae na nọ i biokọ reria no na a be daoma gaga re a kpọ okọ na. Ababọ avro a bi ẹkporo vrẹ no vẹre. Rekọ evaọ onana a dawo umutho ẹgba rai kpobi no. Avọ ozọ nọ u bi mu ai kẹ izuazọ rai, a tẹ rọwo Jesu. A te bo nọ: ‘Olori, nọ eme who bi ru na? Ezue no ma rọ na! Siwi omai, uwhu ma rọ na!’

Nọ ọ kparoma, Jesu ọ tẹ whọ ku ofou gbe abade na: “Fọ, o jere.” Okpofou na o te serihọ, abade na ọ tẹ fọ rirẹ. Nọ ọ rẹriẹ ova ku ilele riẹ, ọ tẹ nọ nọ: “Fiki eme ozọ u je bi mu owhai, wha ti wo orọwọ enẹna gbe”?

Idudu o tẹ ruọ ilele na oma. A tẹ be nọ ohwohwo nọ: “Kọ nọ ono, nọ makọ ofou gbe abade i re yo ẹme riẹ?”

Rri ogaga nọ Jesu o dhesẹ! Ẹvẹ o rọ omosasọ te inọ Ovie mai o wo ogaga vi ekwakwa emama jegbe nọ okenọ ọ te rẹriẹ ova ku otọakpọ mai evaọ etoke esuo Uvie riẹ, ahwo kpobi a te rria evaọ omofọwẹ no ikpẹtu emama!

U kri hi nọ ẹkporo na ọ fọ no, Jesu avọ ilele riẹ a te t’okpa oma kọkọ. Ẹsejọhọ ẹkporo na o te ekọ edekọ na oma ha a te zihe kpo kọkọ. Mak 4:35–5:1; Matiu 8:18, 23-27; Luk 8:22-26.

▪ Eme họ Dẹkapọlis, kọ diẹse ọ rọ?

▪ Didi eware e rẹ wha ẹkporo ọgaga ziọ Abade Galili na?

▪ Nọ a dawo umutho eriariẹ okọ-ubio rai no, eme ilele na a ru?