Uzou Avọ 45

Olele Aghẹruẹ Jọ

ẸVẸ oware nọ Jesu ọ ruẹ u mu idudu te nọ ọ ruọ okpa no! Ezae ivẹ jọ nọ i muozọ thesiwa a tẹ họrọ no ahoo nọ ọ kẹle etẹe ze be dhẹ bru ei ze. Idhivẹri e rọ ae oma. Nọ o wọhọ nọ omọvo rai jọ ọ mai muozọ vi ọdekọ na gbe nọ ọ ruẹ uye kri no evaọ otọ ekpokpo idhivẹri, kọ ọye a mae rẹriẹ ova ku.

U kri no nọ ọzae oja ọnana ọ be rria ẹbẹba evaọ udevie iki. Kẹse kẹse, t’aso t’uvo, ọ rẹ tehe unubo họ ọ vẹ rehọ itho bẹre oma riẹ. O zighi te epanọ ohwo ọvo o ro wo udu nọ ọ rẹ rọ nya edhere ọyena vrẹ hẹ. A daoma ẹsibuobu no re a kare iẹe, rekọ ọ rẹ sae egbregba na no abọ riẹ o ve wiri egbokọ na no awọ riẹ no. Ohwo ọvo nọ ọ ga mu ei ọ rọ họ.

Nọ ọzae na ọ dhẹ kẹle Jesu je kie fihọ awọ riẹ, idhivẹri nọ e be kpọe na i te ru ei bo via: “Jesu Ọmọ Ọghẹnẹ Oride na, eme ma gbe wo kugbe? Mẹ rehọ odẹ Ọghẹnẹ lẹ owhẹ, whọ kẹ omẹ uye he.”

Jesu o te dhe ẹtẹta nọ: “Whẹ ẹzi ogbegbe na, no ohwo na no!” Rekọ ọ tẹ nọ nọ: “Didi odẹ ra?”

Ọ tẹ kuyo nọ: “Odẹ mẹ Lijiọn (Ogbaẹmo); keme ma re buobu.” O rẹ were idhivẹri na re a lahiẹ ohwo nọ a sae ruoma, ẹsejọhọ re a su kokohọ oma ohwo. Rekọ nọ a nyaku Jesu, a tẹ lẹ inọ o fi ai họ ọgọdọ odidi na ha. Ma tẹ jẹ ruẹ nọ Jesu o wo ogaga ulogbo; ọ sai tube fi idhivẹri iyoma kparobọ dede. Onana u te je dhesẹ nọ idhivẹri na a riẹ nọ efihọ ọgọdọ odidi na kugbe osu rai, Setan Ẹdhọ na, họ ẹdhoguo nọ Ọghẹnẹ ọ be rọ hẹrẹ ai.

Owa isi nọ i bu te 2,000 e be re emu kẹle etẹe evaọ ugbehru na. Fikiere idhivẹri na a tẹ ta nọ: “Vi omai bru isi na re ma ruọ eva rai.” O wọhọ nọ idhivẹri na a wo omawere oyoma jọ nọ a rẹ rọ ro ugboma emama. Nọ Jesu ọ kẹ ai uvẹ re a ruọ isi na no, isi 2,000 na e tẹ họrọ no ugbehru na ze e tẹ d’ame whu evaọ abade na.

Nọ ahwo nọ e be sẹro isi na a ruẹ onana, a tẹ họrọ nya e nẹ iyẹrẹ na evaọ okpẹwho na gbe evaọ iwhre rai. Fikiere, ahwo na a tẹ ruọ otafe te ruẹ oware nọ o via. Nọ a nyaze, a tẹ ruẹ ọzae nọ idhivẹri na i no oma ze na. Whaọ, ọ whẹ iwu họ no jẹ ziọ iroro riẹ no, ọ keria kẹle Jesu!

Ahwo nọ a ruẹ oware nọ o via na a tẹ niyẹrẹ na. A tẹ jẹ ta kẹ ahwo na kpahe uwhu igbunu isi na. Nọ ahwo na a yo onana, ozọ u te mu ai gaga, a te muọ Jesu họ ẹlẹ inọ o no ẹkwotọ rai. O te yo ẹme rai ọ tẹ rueva okọ. Ọzae nọ idhivẹri e joma vẹre na ọ tẹ be lẹ Jesu inọ a kẹe uvẹ re o lele ai. Rekọ Jesu ọ tẹ ta kẹe nọ: “Kpo bru egbẹnyusu ra, re whọ ta epa eware ilogbo nọ Ọnowo o ru kẹ owhẹ kẹ ae, gbe epanọ ọ rọ re ohrọ ra.”

Anwẹdẹ Jesu ọ rẹ vẹvẹ ahwo nọ o siwi unu nọ a ta kẹ ohwo ọvo ho, keme ọ gwọlọ nọ ahwo a riẹ kpahe iẹe fiki iyẹrẹ ejaja nọ a yo ho. Rekọ ẹme nọ ọ jọ etenẹ ta na u fo keme ọzae nana nọ idhivẹri e jọ oma vẹre na ọ te sai se isẹri evaọ udevie ahwo nọ Jesu ọ te sai t’oma ha. Ofariẹ, ọriakugbe ọzae na ọ te kẹ imuẹro kpahe ogaga Jesu nọ o re ro ru ewoma, nọ u ti si iyẹrẹ ethọthọ kpobi no nọ a te vaha kpahe uwhu isi na.

Nya lele uthubro Jesu, ọzae ọnana nọ idhivẹri e joma vẹre na ọ tẹ nya vrẹ. O te muhọ ewhowho nya Dẹkapọlis na kpobi wariẹ kpahe eware nọ Jesu o ru kẹe, u te je gbe ahwo na unu ọvo. Matiu 8:28-34; Mak 5:1-20; Luk 8:26-39; Eviavia 20:1-3.

▪ Fikieme a jẹ mae rẹriẹ aro ku ọzae ọvo ọnọ idhivẹri e rọ oma kpakiyọ ivẹ e riẹ?

▪ Eme o dhesẹ nọ idhivẹri na a riẹ nọ a ti fi ai họ ọgọdọ odidi evaọ obaro?

▪ Fikieme o jẹ were idhivẹri na re a ruọ oma ahwo gbe erao?

▪ Fikieme Jesu ọ jẹ t’ẹme nọ o hẹriẹ oma kẹ ọzae nọ idhivẹri e joma vẹre na, nọ ọ jẹ ta kẹe re ọ ta oware nọ O ru kẹe via kẹ amọfa?