Uzou Avọ 53

Osu Igbunu nọ O Siuru

OKENỌ Jesu ọ rehọ edhere igbunu ko idu ahwo na no, u te gbe ahwo na unu. Anọ: “[Uzẹme], ọnana họ ọruẹaro nọ ọ te tha akpọ na!” A ku rie họ inọ orọnikọ Jesu họ ọruẹaro nọ ọ rro vi Mosis na ọvo ho rekọ ọ tẹ jẹ rọ osu nọ o siuru. Fikiere a tẹ jiroro nọ a re mu ei re a rehọ iẹe mu ovie.

Ghele na, Jesu ọ riẹ oware nọ ahwo na a be m’oma riẹ. Fikiere ọ tẹ dhẹ vẹrẹ vẹrẹ re a siẹe ba emu. O vi ogbotu na vrẹ no o te ru re ilele riẹ a ruọ okọ rai re a bi kpohọ Kapaniọm. O te kpohọ obọ ugbehru re ọ lẹ. Evaọ aso ọyena Jesu ọvo ọ jọ obei.

Taure irioke o tẹ nwani te Jesu o te rri no ukpehru nọ ọ rọ ze ọ tẹ ruẹ abade na nọ o bi fi ẹkporo ọgaga. Evaọ elo ọvẹre nọ o ghelie kpobi no, keme ehaa Ọnyavrẹ o kẹle no, Jesu ọ tẹ ruẹ okọ na avọ ilele riẹ nọ e be thuẹ evaọ ẹkporo na. Ezae na a be rehọ ẹgba rai kpobi kpọ okọ na.

Nọ ọ ruẹ onana, Jesu o te ruotọ no ugbehru na o te muọ okọ na họ ẹnyabru evaọ ehru ẹkporo na. Okọ na u bi te emaele esa hayo ene no nọ Jesu o ro tei oma. Ghele na, o te ru epaọ ẹsenọ ọ be nyavrẹ okọ na. Nọ ilele na a rue riẹ, a te bo nọ: “Ẹzi”!

Jesu ọ tẹ rọ omosasọ kuyo nọ: “Mẹ; ozọ umu owhai hi.”

Rekọ Pita ọ tẹ ta nọ: “Olori, o tẹ rọ owhẹ, whọ ta kẹ omẹ re mẹ nya ehru ame [na] bru owhẹ ze.”

Jesu ọ tẹ kuyo nọ: “Nyaze.”

Fikiere, Pita, nọ o no okọ na no, ọ tẹ nya ehru ame na bru Jesu. Rekọ nọ o rri ẹkporo na, ozọ u te mu Pita, nọ o muhọ ekiedi no, o te bo nọ: “Olori, siwi omẹ.”

Idudhe na nọ ọ riẹ obọ riẹ, Jesu o te kru ei, ta nọ: “O whẹ ọnọ o wo ẹrọwọ ọkakao, fiki eme ugbe mu owhẹ ẹro ho?”

Nọ Pita avọ Jesu a rueva okọ na no, ẹkporo na o te serihọ, u te gbe ilele na unu. Rekọ u fo nọ u gbe ai unu? Otẹrọnọ a ‘riẹ otọ ikulu na’ ẹkwoma ovuhumuo oware igbunu nọ Jesu o ru euwa kakao nọ i kpemu na okenọ ọ rehọ ebrẹdi isoi ọvo gbe imiyei ivẹ ko idu ahwo, o gbẹ hai gbe ai unu tere he inọ ọ nya evaọ ehru ame o te je ru ẹkporo na serihọ. Ghele na, enẹna ilele na a te kiekpo gọ Jesu jẹ ta nọ: “Ghinọ uzẹme whẹ Ọmọ Ọghẹnẹ.”

U kri hi, a te te Gẹnesarẹt, ẹwho owoma jọ nọ o re wou ekakọ nọ ọ kẹle Kapaniọm. Etẹe a rọ okọ rai kpahe. Rekọ nọ a ruọ okpa no, ahwo a te vuhu Jesu a te kpohọ ewho ekẹloma riẹ, a tẹ be gwọlọ ahwo nọ e be mọ. Nọ a rọ ehwa rai wọ enana ze a jẹ robọ te ẹroro ewu Jesu, ẹyao rai o te kpo no riẹriẹriẹ.

Oke onana kpobi, ogbotu idu ahwo buobu nọ a rehọ emu ko na a tẹ ruẹ nọ Jesu ọ nyavrẹ no. Fikiere nọ ekọ esese i no Taibirias ze, a tẹ ruọ ekọ enana a te bi ziọ Kapaniọm te gwọlọ Jesu. Nọ a rue riẹ, a tẹ nọ nọ: “Rabae, oke ovẹ whọ rọ ze obonẹ?” Jesu ọ tẹ whọku ai, wọhọ epanọ ma te ruẹ na. Jọn 6:14-25; Matiu 14:22-36; Mak 6:45-56.

▪ Nọ Jesu ọ rọ edhere igbunu ko idu ahwo na no, eme ahwo na a gwọlọ rehọ iẹe ru?

▪ Eme Jesu ọ ruẹ no ugbehru nọ o kpohọ ze, kọ eme o ru?

▪ Fikieme u gbe fo re eware enana i gbe ilele na unu tere he?

▪ Eme ọ via nọ a te okpa no?