Uzou Avọ 56

Eme O re Zue Ohwo Oma?

ỌWỌSUỌ mukpahe Jesu o bi dhe ẹgẹga ọvo. Orọnikọ ilele riẹ buobu a nya siẹe ba ọvo ho rekọ ahwo Ju erọ Judia a be gwọlọ kpei re, nwane wọhọ epanọ a ru okenọ ọ jọ Jerusalẹm evaọ etoke ehaa Ọnyavrẹ 31 C.E. na.

Enẹna u te ehaa Ọnyavrẹ 32 C.E. no. Ẹsejọhọ, rọwo kugbe ẹgwọlọ Ọghẹnẹ re a kpohọ iẹe, Jesu o te kpohọ ehaa Ọnyavrẹ na evaọ Jerusalẹm. Ghele na, o ru ere avọ ẹghẹ keme uzuazọ riẹ o rọ awa. U no ere no o te zihe kpohọ Galili.

O wọhọ nọ Jesu ọ jọ Kapaniọm nọ otu Farisi gbe ikere-ebe nọ i no Jerusalẹm ze a ro bru ei ze. A be gwọlọ edhere nọ a rẹ rọ bọwo iẹe ota ọrọ ẹraha uzi egagọ. A tẹ nọ nọ: “Fikieme ilele ra a jẹ be raha uruemu ekpako na? Keme nọ a be re emu a be wozẹ abọ rai hi.” Onana yọ oware nọ Ọghẹnẹ ọ gwọlọ họ, ghele otu Farisi na a rri rie wọhọ uzioraha ulogbo otẹrọnọ ohwo o ru uruemu anwae ọnana ha, onọ u kugbe ẹwozẹ abọ te ighilabọ.

Ukpenọ ọ kẹ ai uyo kpahe ota rai, Jesu ọ tẹ riobọhọ emuemu rai gbe aro nọ a bi keke fihọ raha Uzi Ọghẹnẹ. Ọ tẹ gwọlọ riẹ mi ai nọ: “Kọ fikieme wha jẹ be raha ujaje Ọghẹnẹ fiki uruemu anwae rai? Keme Ọghẹnẹ ọ ta nọ, ‘Dhẹ ọsẹ ra avọ oni ra’; gbe Ọnọ ọ ta ẹme oyoma kpahe ọsẹ hayo oni, rure o ghine whu uwhu na.’ Rekọ wha ta nọ, ‘Otẹrọnọ ohwo ọ ta kẹ ọsẹ hayo oni riẹ nọ, Oware erere nọ who he wo obọ mẹ a rehọ e riẹ kẹ Ọghẹnẹ [no], ọ gbẹ sae dhẹ ọsẹ hayo oni riẹ hẹ.’ ”

Uzẹme, otu Farisi a wuhrẹ inọ ugho, ekwakwa, hayo oware ofa nọ a ro mudhe wọhọ okẹ kẹ Ọghẹnẹ orọ kẹ etẹmpol na yọ a rẹ rehọ iẹe ruiruo kẹ ẹjiroro ọfa ha. Ghele na, okẹ nọ a ro mudhe na o rẹ gbẹ jọ obọ ọnọ ọ rehọ iẹe mudhe na. Evaọ edhere ọnana ọmọ, ọ tẹ nwane bọwo unu ta nọ ugho hayo okwakwa riẹ yọ ‘kọban’—okẹ nọ a ro mudhe kẹ Ọghẹnẹ hayo etẹmpol na—o ve ku uzou no owha-iruo riẹ nọ o re ro fiobọhọ kẹ ọsẹ gbe oni riẹ nọ e kpako no, ẹsejọhọ enọ uye o be bẹ.

Avọ emamọ eva nọ e dha riẹ kẹ edhere emuemu nọ otu Farisi a bi ro nwene Uzi Ọghẹnẹ, Jesu ọ tẹ ta nọ: “Wha te zihe ẹme Ọghẹnẹ họ ofofe, fiki uruemu anwae rai. Whai eviẹwẹ! Aizaya ọ ta uzẹme kpahọ owhai nọ, ‘Ahwo ọnana igbenu rai a be rọ dhẹ omẹ, a be gọ omẹ gheghe, uwuhrẹ rai epa orọ ijaje ahwo.’ ”

Ẹsejọhọ ogbotu na a siuke kpemu re a kuvẹ kẹ otu Farisi na re a nọ Jesu enọ. Enẹna, nọ otu Farisi na a wo uyo kẹ ọwhọkuo ọgaga Jesu hu na, o te se ogbotu na kẹle oma. Ọ tẹ ta nọ: “Wha yo ẹme mẹ, wha riẹ otọ riẹ; oware ovo nọ o rọ afe ohwo nọ o rẹ ru ẹe, o sai zu ei oma, o rọ họ; rekọ eware nọ i no eva ohwo via eyena i re zue ohwo oma.”

Uwhremu na, nọ a rueva uwou no, ilele riẹ a tẹ nọ nọ: “Whọ riẹ nọ otu Farisi a zoruẹ nọ a yo ẹme nana?”

Jesu ọ tẹ kuyo nọ: “Okakọ kpobi nọ Ọsẹ mẹ obọ odhiwu ọ kọ họ a re wolo iei no. Vu ai wa; ae isu nọ ituaro. Re otuaro o te su otuaro, ai ivẹ na a re kie fihọ ọgọdọ.”

U gbe Jesu unu okenọ Pita ọ rehọ unu ilele na nọ onọ kpahe oruvẹ oware nọ u re zue ohwo oma. Jesu ọ tẹ kuyo nọ: “Ri fi enẹna wha re riẹ gbe he? Wha gbẹ riẹ nọ koware koware nọ o ruọ eva unu o rẹ vrẹ kpobọ eva a ve fi ei họ uzuahọ? Rekọ eware nọ i re no unu via eva i re no tha, e ye e rẹ lẹliẹ ohwo zue oma. Keme eva iroro iyoma i re no tha, ijihẹ, ẹnwae-obro, uji, isẹierue, igberedha, ugbeguo. Enana họ eware nọ i re zue ohwo oma; rekọ emuọriọ avọ abọ nọ a wozẹ hẹ o re zue ohwo oma ha.”

Orọnikọ Jesu ọ be jọ etenẹ mukpahe ẹfuọ họ. Orọnikọ ọ be vro inọ ohwo ọ rẹ wozẹ abọ họ họ nọ o te bi there emu hayo ọ tẹ be re emu. Ukpoye, Jesu o bi brukpe eviẹhọ isu egagọ na enọ e be gwọlọ nwene izi ikiẹrẹe Ọghẹnẹ ẹkwoma ikẹ-isio iruemu nọ i no Ikereakere ze he. Ẹhẹ, iruemu iyoma họ eware nọ i re zue ohwo oma, yọ Jesu o dhesẹ nọ enana i re no udu ohwo ze. Jọn 7:1; Iziewariẹ 16:16; Matiu 15:1-20; Mak 7:1-23; Ọnyano 20:12; 21:17; Aizaya 29:13.

▪ Didi ọwọsuọ Jesu ọ rẹriẹ ova dhe enẹna?

▪ Didi ota otu Farisi na a bọwo, rekọ wọhọ epanọ Jesu ọ ta, ẹvẹ otu Farisi na a be rọ barosa raha Uzi Ọghẹnẹ?

▪ Didi eware Jesu o dhesẹ nọ i re zue ohwo oma?