Uzou Avọ 59

Ghinọ Ono Họ Jesu?

OKENỌ okọ nọ Jesu avọ ilele riẹ a rọ o kpahe Bẹtsaida no, ahwo na a tẹ rehọ ọzae otuaro jọ bru ei ze a tẹ lẹe inọ ọ rọ obọ te ọzae na re o siwi ei. Jesu o te kru ọzae na obọ no iwhre na no, nọ o nwoeya ku aro riẹ, ọ tẹ nọ nọ: “Whọ ruẹ oware jọ?”

Ọzae na ọ tẹ kuyo nọ: “Mẹ ruẹ ahwo; rekọ mẹ rue erai wọhọ ire, nọ [e be] nya.” Nọ ọ rọ abọ riẹ kpahe aro ọzae na, Jesu o te rovie aro riẹ, o te muọ ude họ ẹruẹ ziezi. Jesu o te vi ọzae na kpo avọ uthubro inọ ọ rueva okpẹwho na ha.

Koyehọ Jesu ọ rehọ ilele riẹ gboma kpohọ iwhre Sisaria Filipai, evaọ oka ẹkpẹlobọ-ọre Palẹstain. Ubiokọ na u thabọ, o le ikilomita 48, kpohọ ewho iwowoma Sisaria Filipai, enwene imita 350 ro kpehru vi usi abade. Erẹ na o rehọ unuedẹ jọ.

Evaọ edhere, Jesu ọvo ọ tẹ nya e lẹ. Enwene emerae izii hayo ikpe ọvo i kiọkọ kẹ uwhu riẹ, yọ ọ be ruawa kpahe ilele riẹ. Ibuobu a nya siẹe ba no. Efa a rọ reghe reghe avọ ẹruore ofofe fikinọ ọ siọ omodawọ ahwo na re a rehọ iẹe mu ovie jegbe nọ ọ se, okenọ ewegrẹ na a sei abọ inọ o dhesẹ oka jọ no odhiwu ze ro dhesẹ ọkwa-ovie riẹ via. Kọ eme ikọ enana a rọwo kpahe oghẹrẹ ohwo nọ ọ rọ? Nọ a bru ei ziọ oria nọ ọ be jọ lẹ, Jesu ọ tẹ nọ nọ: “Ono ahwo a bi se omẹ?”

A tẹ kuyo nọ: “Ejọ e be ta nọ Jọn Ọhọahwo-ame, ejọ anọ Elaeja, edekọ anọ Jerimaya, hayo ọruẹaro jọ.” Ẹhẹ, ahwo na a roro inọ Jesu yọ omọvo ezae enana jọ nọ ọ kparoma no uwhu ze!

Jesu ọ tẹ nọ nọ: ‘Kọ owhai, ono wha bi roro omẹ fihọ?’

Pita ọ tẹ kuyo vẹrẹ vẹrẹ nọ: “Whẹ họ Kristi na, Ọmọ Ọghẹnẹ uzuazọ.”

Nọ o jiri Pita kẹ uyo riẹ no, Jesu ọ tẹ ta nọ: “Mẹ ta kẹ owhẹ nọ, whẹ họ Pita; ehru utho o nana mẹ rẹ rehọ [ukoko, NW ] mẹ viẹ, egaga uwhu erẹ sae ga vi ei hi.” Evaọ etenẹ Jesu ọ jẹ kaki whowho inọ ọ te bọ ukoko jegbe nọ makọ uwhu o ti kru ahwo riẹ họ igbo ho nọ a te wo ẹrọwọ te uwhu evaọ otọakpọ. Ọ tẹ ta kẹ Pita nọ: “Mẹ rẹ te rehọ isiavẹ uvie odhiwu kẹ owhẹ.”

Fikiere Jesu ọ tẹ ta via inọ Pita o ti wo uvẹ obọdẹ. Ijo, orọnikọ a kẹ Pita oria ọsosuọ evaọ udevie ikọ na ha, hayo kọ a ru ei họ otọhotọ ukoko na ha. Jesu omariẹ họ Utho nọ a bọ ukoko na fihọ. Rekọ a te rehọ isiavẹ esa kẹ Pita enọ o ti ro rovie uvẹ kẹ ẹko ahwo nọ a rẹ rọ ro Uvie obọ idhiwu.

Pita ọ te rehọ usiavẹ ọsosuọ na ruiruo evaọ Pẹntikọst 33 C.E. ro dhesẹ kẹ ahwo Ju nọ i kurẹriẹ oware nọ u fo nọ a re ruẹ re a zọ. Nwani lele oyena, ọ te rehọ usiavẹ avivẹ na rovie kẹ ahwo Sameria nọ e rọwo uvẹ nọ a rẹ rọ ro Uvie Ọghẹnẹ. Kẹsena, evaọ 36 C.E. ọ te rehọ usiavẹ avọ esa na rovie uvẹ ovo na kẹ ahwo Egedhọ nọ e yawo ho, Kọniliọs gbe egbẹnyusu riẹ.

Jesu ọ tẹ ruabọhọ ẹmeọta riẹ kugbe ikọ riẹ. Ọ lẹliẹ udu bru rai nọ ọ ta kẹ ai kpahe uye-oruẹ gbe uwhu nọ ọ bete rẹriẹ ova ku kẹle evaọ Jerusalẹm. Fikinọ o vuhumu inọ a te kpare Jesu kpohọ uzuazọ obọ odhiwu hu, Pita ọ tẹ whọku Jesu. Ọ ta nọ: “Ọghẹnẹ ọ rẹ ghọ, Olori! Onana o rẹ sae via kẹ owhẹ hẹ.” Nọ o kiemu ku ei, Jesu o te yo nọ: “Setan, nya ruọ emu mẹ! Whẹ ezoruẹ rọ kẹ omẹ; keme who bi roro epanọ Ọghẹnẹ o re roro ho rekọ epanọ ahwo a re roro.”

Ẹsejọhọ, u te no ikọ na no amọfa a rọ usu kugbe Jesu, fikiere o te se ai gboma ọ tẹ ta kẹ ai inọ o te jọ lọlọhọ re a jọ olele riẹ hẹ. Ọ ta nọ: “Ohwo nọ ọ guọlọ nọ o re lele omẹ, jọ ọ vro oma riẹ re ọ tọlọ ure oja riẹ ọ rọ kpahe omẹ. Keme ohwo nọ o re ti siwi uzuazọ riẹ u re ti vrẹ; rekọ ohwo nọ uzuazọ riẹ u vru fiki mẹ ọ rẹ te rue riẹ.”—NW.

Ẹhẹ, a tẹ gwọlọ dhesẹ oma rai nọ a fo kẹ aruoriwo riẹ, ilele Jesu a re wo aruọwha gbe omolahiẹ. Ọ ta nọ: “Keme ohwo nọ ọ rẹ te vuoma mẹ gbe eme mẹ evaọ iraro oge obrẹnhwae avọ izieraha ọnana, Ọmọ ohwo ọ rẹ te vuoma riẹ re, nọ, [ọ te] rehọ oruaro Ọsẹ na tha avọ emamọ ikọ obọ odhiwu.” Mak 8:22-38; Matiu 16:13-28; Luk 9:18-27.

▪ Fikieme Jesu ọ jẹ be ruawa kpahe ilele riẹ?

▪ Didi eriwo kpahe Jesu ahwo a wo?

▪ Didi isiavẹ a rọ kẹ Pita, kọ ẹvẹ a ti ro fi ai họ iruo?

▪ Didi ọkpọvio a kẹ Pita, kọ fikieme?