Uzou Avọ 70

Usiwo Ọzae nọ A Yẹ Tuaro

OKENỌ ahwo Ju na a gwọlọ nọ a rẹ rọ itho fi Jesu, orọnikọ o no Jerusalẹm hu. Uwhremu na, evaọ Ẹdijala, tei te ilele riẹ a tẹ jẹ nya okpẹwho na nọ a ruẹ ọzae jọ nọ o tuaro no eyẹ ze. Ilele na a tẹ nọ Jesu nọ: “Rabae, ọzae ọnana avọ enọ i yẹ riẹ ono họ ọnọ ọ raha uzi nọ a je yẹ i tuaro?”

Ẹsejọhọ ilele na a roro, wọhọ epanọ iwuhrẹ jọ a roro, inọ ohwo ọ rẹ sae thuzi evaọ edhede oni riẹ. Rekọ Jesu ọ tẹ kuyo nọ: “Ọzae ọnana avọ enọ i yẹ riẹ ọvuọvo ọ raha uzi hi, rekọ re a jọ oma riẹ dhesẹ iruo Ọghẹnẹ via.” Orọnikọ fiki ẹthọthọ hayo uzioraha jọ o lẹliẹ ọzae ọnana tuaro na ha. Uzioraha ọzae ọsosuọ Adamu o wha riẹ ze nọ ahwo-akpọ kpobi a rọ kare ẹgbagba, fikioye ma je wo ẹyao sa-sa wọhọ eyẹ nọ a re yẹ ohwo tuaro. Ẹthọthọ ọnana evaọ oma ọzae na o tẹ kẹ Jesu uvẹ re o dhesẹ iruo Ọghẹnẹ via.

Jesu ọ fodẹ ovẹrẹ nọ a re ro ru iruo enana. Ọ ta nọ: “Nọ o rọ uvo na ma re ru iruo ọnọ o vi omẹ, aso ọ be tha, nọ, ohwo ọvo ọ gbẹ sai ti ru iruo ho. Nọ mẹ gbẹrọ eva akpọ na, mẹ họ elo rọkẹ akpọ na.” Uwhu Jesu u ti gele iei fihọ ebi uki kẹle na oria nọ ọ gbẹ sai jo ru oware ovo ho. Bọo oke yena, ọ rọ ehri elo kẹ akpọ na.

Nọ ọ ta eme enana no, Jesu o te nweya ku otọ ọ tẹ rehọ eya na ru ọviẹ. O te fi ei họ ibiaro ọzae na ọ tẹ ta nọ: “Nya, e họ eva ẹtẹre Siloam.” Ọzae na o te ru erei. Nọ o ru erei, aro riẹ i te rovie! Ẹvẹ ọ ghọghọ te nọ o zihe ze, be ruẹ ude evaọ oke ọsosuọ evaọ uzuazọ riẹ!

Erivẹ gbe amọfa nọ e riẹ riẹ vẹre u te gbe ai unu. A tẹ nọ nọ: “Ogbẹrọnọ ọzae ọnana ọ jẹ hae keria yare eware na?” Ejọ a tẹ kuyo nọ: “Ọye.” Rekọ amọfa a sae rọwo onana ha: “Ijo, rekọ o tho rie i.” Ghele na ọzae na ọ tẹ ta nọ: “Mẹ họ ọye.”

“Kẹvẹ aro ra o ro rovie?” ahwo na a gwọlọ riẹ.

“Ọzae nọ a re se Jesu o gbe ẹkpẹ ọ tẹ rehọ iẹ wholo aro mẹ, ọ tẹ ta kẹ omẹ nọ, ‘Kpobọ Siloam whọ họ’; fikiere mẹ tẹ nya e họ mẹ jẹ ruẹ ude.”

A tẹ nọe inọ: “Bovẹ ọ rọ”?

O te yo nọ: “Mẹ riẹ hẹ.”

Ahwo na a te su ọzae nọ o tuaro vẹre na bru isu egagọ rai, otu Farisi na. Enana omarai a te mu ei enọ họ ẹnọ kpahe oghẹrẹ nọ ọ be rọ ruẹ ude. Ọzae na ọ tẹ ta nọ: “Ọ rehọ ẹkpẹ wholo aro mẹ, mẹ jẹ họ mẹ [tẹ] ruẹ ude.”

Evaọ uzẹme, u fo re otu Farisi na a ghọghọ kugbe ọzae otuaro nọ ọ jẹ yare eware na! Rekọ ukpoye, a tẹ jẹ poviẹ Jesu. A tẹ ta nọ: “Ohwo ọnana o no obọ Ọghẹnẹ ze he.” Fikieme a jẹ ta onana? “Keme o bi koko ẹdijala ha.” Ghele na otu Farisi efa a te roro nọ: “Ẹvẹ ohwo nọ ọ rọ ọrahaizi ọ rẹ sai ru eka itiena?” Fikiere ohẹriẹ o tẹ ruọ udevie rai.

Fikiere, a tẹ nọ ọzae na nọ: “Ẹvẹ whọ ta kpahe iẹ, epanọ o ro rovie aro ra na?”

Ọ tẹ kuyo nọ: “Ọruẹaro ọ rọ.”

Otu Farisi na a se nọ a rẹ rọwo onana. U mu rai ẹro nnọ Jesu avọ ọzae ọnana a gba kugbe re a ruẹse viẹ ahwo na họ. Fikiere re a ku ẹme na họ, a te se ọsẹ gbe oni ọyareware na re a nọ ai enọ. Jọn 8:59; 9:1-18.

▪ Eme o soriẹ ze nọ ọzae na o je tuaro, kọ eme o soriẹ ze he?

▪ Eme họ aso na nọ ohwo ọvo ọ sai jo ru iruo ho na?

▪ Nọ a siwi ọzae na, eme ahwo nọ a riẹ riẹe vẹre a ta?

▪ Ẹvẹ otu Farisi na a rọ jọ ọvuọ abọ riẹ kpahe esiwo ọzae na?