Uzou Avọ 73

Ohwo Sameria Ọrivẹ Na

ẸSEJỌHỌ Jesu ọ kẹle Bẹtani no, iwhre nọ o rọ ole ikilomita esa thabọ no Jerusalẹm. Ọzae jọ nọ ọ riẹ Uzi Mosis lafi ọ tẹ rọ onọ jọ bru ei ze, anọ: “Owuhrẹ eme me re ruẹ re [mẹ] reuku uzuazọ ebẹdẹ bẹdẹ?”

Jesu ọ riẹ nọ ọzae na, elọya, ọ be nọ orọnikọ re ọ riẹ hẹ rekọ, ukpoye, re ọ dawo iẹe. Iroro elọya na họ re Jesu ọ kuyo nọ o rẹ dha ahwo Ju na eva. Fikiere Jesu o te ru re elọya na ọ ta ẹkẹ unu riẹ, anọ: ‘Eme a kere họ eva uzi na? Ẹvẹ who se?’

Evaọ uyo, elọya na, avọ ẹghẹ, ọ tẹ t’ẹme no izi Ọghẹnẹ ze eva Iziewariẹ 6:5 gbe Iruo-Izerẹ 19:18, anọ: “Whọ rẹ rehọ eva ra kpobi, gbe ẹzi ra kpobi, gbe iroro ra kpobi, gbe ogaga ra kpobi, you Ọnowo na Ọghẹnẹ ra; jegbe omọfa epanọ who you oma ra.”

Jesu ọ tẹ kuyo nọ: “Whọ riẹ yo; ru onana, whọ rẹ te zọ.”

Rekọ uyo onana o vọ elọya na eva ha. Uyo Jesu u te kẹe he. Ọ gwọlọ imuẹro no obọ Jesu ze inọ eriwo riẹ o gba yọ fikiere ọ rọ ohwo nọ o kiẹrẹe evaọ uzuazọ nọ o bi yeri kugbe amọfa. Fikiere, ọ tẹ nọ nọ: “Ono họ ọrivẹ mẹ?”—NW.

Ahwo Ju na a rọwo inọ ubiẹme na “ọrivẹ” u dhesẹ ibe ahwo Ju ọvo, wọhọ epanọ o wọhọ nọ Iruo-Izerẹ 19:18 o bi dhesẹ na. Evaọ uzẹme, uwhremu na makọ Pita ukọ na ọ ta nọ: “Whai ọvo ajoma riẹ nọ ufo kẹ ohwo Ju hu, nọ o re ro kuomagbe hayo lele ohwo orẹwho ofa jọ wo ukoko ovo.” Fikiere elọya na, ẹsejọhọ kugbe ilele Jesu omarai dede, a rọwo inọ a kiẹrẹe otẹrọnọ a rehọ ẹwo yeri kugbe ibe ahwo Ju ọvo, keme, evaọ eriwo rai, ahwo nọ e rọ ahwo Ju hu a ghinẹ rọ erivẹ rai hi.

Kọ ẹvẹ Jesu ọ sae rọ kpọ enọ e be gaviezọ kẹe na vi ababọ ẹta eme nọ e rẹ dhae eva? O te gbiku jọ, ẹsejọhọ oware nọ o ghinẹ via. Jesu ọ ta nọ: “Ohwo jọ [ohwo Ju] o je no Jerusalem kpobọ Jeriko, o te kie ruọ udevie igbulegbu, enọ e ba riẹ fihọ, a te kpe i, nọ o te uwhu no, a tẹ nya siẹ e ba.”

Jesu ọ tẹ taharo nọ: ‘Whaọ ozerẹ jọ ọ jẹ nya edhere ọyena vrẹ; nọ ọ rue riẹ ọ tẹ nya akotọ ọdekọ vrẹ. Epọvo na nọ ohwo Livai jọ, nọ o te oria na, nọ ọ rue riẹ, ọ tẹ nya abọobe edhere na vrẹ. Rekọ ohwo Sameria jọ, nọ o je kpo erẹ, nọ o te oria nọ ọ jọ; nọ ọ rue riẹ ohrọ riẹ o tẹ re iẹe.’

Izerẹ buobu gbe ahwo Livai nọ e be jọ etẹmpol fiobọhọ kẹ ai a be rria Jeriko, onya ikilomita 23 evaọ edhere imuozọ nọ o rọ imita 900 whrẹkpo no oria nọ a be jọ ruiruo evaọ etẹmpol obọ Jerusalẹm na. A rẹ sai rẹro nnọ ozerẹ hayo ohwo Livai o re fiobọhọ kẹ ibe ohwo Ju riẹ nọ ọ rọ uye. Rekọ a ru erei hi. Ukpoye, ohwo Sameria họ ọnọ o fiobọhọ kẹe. Ahwo Ju a mukpahe ahwo Sameria te epanọ kẹle na a rọ rehọ eme nọ e mae ga rọ la Jesu eka nọ a sei “ohwo Sameria.”

Eme ohwo Sameria na o ru ro fiobọhọ kẹ ohwo Ju na? Jesu ọ ta nọ: “Ọ tẹ nya bru ei, ọ tẹ gba emela riẹ, je [ku] ewhri gbe udi họ ae; kẹsena ọ tẹ wọ e fihọ ehru arao riẹ, ọ jẹ rehọ iẹ ze uwou erara, o je ri ye i. Okeokiọ riẹ, ọ tẹ rehọ isele ivẹ [enwene osa edẹ ivẹ], ọ tẹ rehọ ae kẹ ọnọ ọ be sẹro uwouerara na, anọ, ‘Sẹro riẹ; whọ tẹ raha vi ere, no me ziheze mẹ rẹ [te] hwa kẹ owhẹ’.”

Nọ o gbiku na kpobi no, Jesu ọ tẹ nọ elọya na nọ: “Usu imasa na ono who roro nọ o ru oma riẹ họ ọrivẹ kẹ ohwo nọ o kie fihọ abọ igbulegbu na?”—NW.

Fikinọ u kiehọ iẹe oma ha re ọ fodẹ nọ ohwo Sameria o ru oware uwoma, elọya na ọ tẹ fake kuyo nọ: “Ọnọ o dhesẹ ohrọ kẹ e na.”

Jesu o te ku ei họ nọ: “Nya i ru ere re.”

Otẹrọnọ Jesu ọ ta kẹ elọya na gbiae inọ ahwo nọ a rọ ahwo Ju hu yọ erivẹ riẹ re, orọnikọ ọzae na ọ hae se onana ọvo ho rekọ ahwo buobu evaọ ogbotu na a hae jọ abọ riẹ wọso Jesu. Ikuigbe uzẹme onana u te ru ei vevẹ nnọ ahwo erẹwho gbe uyẹ ofa yọ erivẹ mai re. Ẹvẹ edhere uwuhrẹ Jesu u gbunu te! Luk 10:25-37; Iruẹru 10:28; Jọn 4:9; 8:48.

▪ Didi onọ elọya na ọ nọ Jesu, kọ eme họ ẹjiroro onọ riẹ?

▪ Amono ahwo Ju na a roro nọ ae họ erivẹ rai, kọ didi imuẹro e riẹ nọ a rẹ rọ rọwo inọ makọ ilele na a wo eriwo ọnana?

▪ Ẹvẹ Jesu o ro ru eriwo ọgbagba na vevẹ re elọya na ọ seba ẹvro?