Uzou Avọ 80

Ewa-Igodẹ na gbe

Othuru-Igodẹ Na

JESU ọ ze Jerusalẹm rọkẹ Ehaa Eromudhe na, hayo Hanukkah, ehaa nọ a re ro ru ọwariẹ-romudhe avivẹ etẹmpol Jihova. Evaọ 168 B.C.E., ole ikpe 200 nọ i kpemu no, Antiochus IV Epiphanes o te fi Jerusalẹm kparobọ, o te zue etẹmpol na gbe agbada-idhe riẹ. Ghele na, ikpe esa nọ i lele i rie, a tẹ rehọ Jerusalẹm zihe a tẹ wariẹ rọ etẹmpol na mudhe. Uwhremu na, a tẹ jẹ hai ru ehaa ọwariẹ-romudhe ẹgbukpe riẹ.

A re ru Ehaa Eromudhe ọnana eva Chislev 25, amara ahwo Ju nọ o kie fihọ abọ urere ọ amara November gbe abọ ọsosuọ December evaọ ukeledẹ ọgbọna. Fikiere, edẹ nọ i kiọkọ kẹ ehaa obọdẹ Ọnyavrẹ ọrọ 33 C.E. na o dina bu vi edẹ udhusoi. Fikinọ o rọ ezi uriri, Jọn ukọ na o te sei “oke ekpahe.”

Jesu ọ tẹ fodẹ ọtadhesẹ jọ onọ ọ jọ fodẹ ewa-igodẹ esa gbe iruo riẹ wọhọ Othuru-Igodẹ Owoma na. Owa-igodẹ ọsosuọ nọ ọ fodẹ o whoma họ ọruẹrẹfihotọ ọvọ Uzi Mosis na. Uzi na o jọ wọhọ ugbẹhẹ, nọ o hẹriẹ ahwo Ju na no iruemu ogbekuo ahwo nọ e rọ ọvọ obọdẹ ọnana kugbe Ọghẹnẹ hẹ. Jesu ọ ta nọ: “Uzẹme, uzẹme, mẹ ta kẹ owhai, ọnọ ọ rehọ unu ruọ uwou-igodẹ hẹ rekọ ọ tẹ gadiẹ obọfa jọ, ọyena họ oji gbe owhewheriwhe. Rekọ ọnọ ọ rehọ unu ẹthẹ ruọ eva, ọyena họ othuru igodẹ.”

Amọfa a nyaze no a tẹ ta nọ ae họ Mesaya na, hayo Kristi na, rekọ ae họ uvi othuru-igodẹ nọ Jesu ọ nyaharo t’ẹme kpahe na ha: “Oriẹthẹ o re rovie kẹ [ọnana]; igodẹ na i re yo uru riẹ, ove se igodẹ obọriẹ odẹ, o ve su ai vrẹ. . . . Erẹ sai lele ọrara ha, rekọ e rẹ dhẹ siẹ e ba, fiki epanọ e riẹ uru e rara ha.”

“Oriẹthẹ” owa-igodẹ ọsosuọ na họ Jọn Ọhọahwo-Ame na. Wọhọ oriẹthẹ, Jọn o “rovie kẹ” Jesu ẹkwoma edhesẹ nọ o dhesẹ i rie kẹ igodẹ ẹwoho nọ o ti su vrẹ kpohọ emuọriọ na. Igodẹ enana nọ Jesu ọ rehọ odẹ se na a te rehọ ai kpohọ owa-igodẹ ọfa, wọhọ epanọ ọ ta nọ: “Uzẹme, uzẹme, mẹ ta kẹ owhai, mẹ họ unuẹthẹ igodẹ [na],” koyehọ, unuẹthẹ owa-igodẹ ọkpokpọ. Okenọ Jesu ọ rehọ ọvọ ọkpokpọ na mu kugbe ilele riẹ je ku ẹzi ọfuafo no odhiwu ze ku ai evaọ Pẹntikọst nọ u lele i rie, a tẹ rehọ ai ziọ owa-igodẹ ọkpokpọ ọnana.

Be fodẹ iruo riẹ haro, Jesu ọ tẹ ta nọ: “Mẹ họ unuẹthẹ [na]; otẹrọnọ ohwo jọ ọ rehọ omẹ ruọ eva, a re ti si yei, ọ rẹ te ruọ eva, o ve noi, ọ rẹ te ruẹ emu-ore. . . . Mẹ ze re a wo uzuazọ re a ruẹse woi buobu. . . . Mẹ họ othuru igodẹ owoma [na]; mẹ riẹ e rọ obọ mẹ erọ obọ mẹ e riẹ omẹ, wọhọ epanọ Ọsẹ [na] ọ riẹ omẹ, ere mẹ riẹ Ọsẹ na [re]; me te siobọno uzuazọ mẹ fiki igodẹ [na].”

Kẹle na, Jesu ọ kẹ ilele riẹ omosasọ no, ta nọ: “Wha dhẹ-ozọ họ, uthuru okakao, keme o were Ọsẹ rai nọ ọrẹ rehọ uvie na kẹ owhai.” Uthuru okakao onana, enọ i ti bu te ahwo 144,000 na, a nyaziọ owa-igodẹ ọkpokpọ no hayo orọ avivẹ onana. Rekọ Jesu ọ tẹ nyaharo muẹrohọ nọ: “Igodẹ efa jọ no me wo, enọ e rọ uthuru onana ha [e riẹ]; mẹ rẹ te rehọ ae tha hrọ, i re ti yo uru mẹ. Fikiere e rẹ te jọ uthuru ọvo, othuru igodẹ ọvo.”

Nọ “igodẹ efa” na e rọ “uthuru onana ha” na, koyehọ a rọ uthuru ofa, orọ avọ esa. Ithuru ivẹ urere enana, hayo owa-igodẹ na, a wo eria sa-sa nọ a te rria. “Uthuru okakao” na evaọ uthuru ọvo a ti su kugbe Kristi evaọ obọ odhiwu, yọ “igodẹ efa” evaọ uthuru ọdekọ na a te rria otọakpọ Aparadase. Ghele na, dede nọ a rọ otọ ithuru ivẹ, igodẹ na i wo ihri-eriọ họ, hayo kọ a roro nọ a wo omohẹriẹ hẹ, keme wọhọ epanọ Jesu ọ ta, a rọ “uthuru ọvo” evaọ otọ “othuru igodẹ ọvo.”

Othuru-Igodẹ Owoma na, Jesu Kristi, ọ rehọ unevaze rehọ uzuazọ riẹ kẹ owa-igodẹ ivẹ na. ‘Iroro eva mẹ me ro siobọnoi,’ ere ọ ta. “Me wo ogaga nọ me re ro siobọnoi; me te je wo ogaga nọ mẹ jẹ rọ rehọ iẹ. Obọ Ọsẹ mẹ, mẹ [jọ] rehọ ujaje onana.” Okenọ Jesu ọ ta onana no, ẹwhọ ọ tẹ ruọ udevie ahwo Ju na.

Ahwo buobu evaọ ogbotu na a tẹ ta nọ: “O wo ẹzi-ogbegbe, ọ be mọ oruẹ; eme wha je bi yo eme riẹ?” Rekọ efa a tẹ kuyo nọ: “Enana erọ eme ọnọ ẹzi-ogbegbe o mu hu.” Yọ ẹsejọhọ be ta kpemu kpohọ emerae jọ nọ e vrẹ kpahe aro orovie ọzae nọ a yẹ tuaro na, a tẹ ta nọ: “Kọ ukumuomu ọ sai rovie aro otuaro?” Jọn 10:1-22; 9:1-7; Luk 12:32; Eviavia 14:1, 3; 21:3, 4; Olezi 37:29.

▪ Eme họ Ehaa Eromudhe, kọ oke vẹ a re ro ru ei?

▪ Eme họ owa-igodẹ ọsosuọ na, kọ ono họ oriẹthẹ na?

▪ Ẹvẹ oriẹthẹ na o re ro rovie kẹ Othuru-Igodẹ na, kọ diẹse a rehọ igodẹ na ze?

▪ Amono a ru ithuru ivẹ Othuru-Igodẹ Owoma na via, kọ bro ithuru a zihe ro?