Uzou Avọ 88

Ọdafe na avọ Lazarọs

JESU ọ be t’ẹme kẹ ilele riẹ kpahe ekwakwa efe rai nọ a re ro ruiruo ziezi, be ta nọ ma rẹ sae jọ irigbo kẹ enana evaọ okiọvo na jẹ jọ irigbo kẹ Ọghẹnẹ hẹ. Otu Farisi na a be gaviezọ re, a te mu Jesu ẹkoko họ ese keme a you igho. Fikiere ọ tẹ ta kẹ ai nọ: “Whai họ e nọ i re ru oma rai kiete aro ahwo; rekọ Ọghẹnẹ ọ riẹ eva rai; keme ọ nọ ọ rẹ ruaro obọ ahwo, ọ nyenye obọ aro Ọghẹnẹ.”

Oke u te no re u kiekpe ahwo nọ i fe efe akpọ na, enọ i fe evaọ ogaga esuo, gbe enọ i wuzou egagọ. A ti hrẹ rai kpotọ. Rekọ, ahwo nọ a vuhu ẹgwọlọ abọ-ẹzi rai a vẹ te kpare ai kpehru. Jesu ọ riobọ kpohọ enwene otiọye na nọ ọ nyaharo ta kẹ otu Farisi na nọ:

‘Uzi gbe eruẹaro e rọ ri te umuo Jọn [Ọhọahwo-Ame na]; no umuo oke oyena ze a be rọ vuẹovuẹ uvie Ọghẹnẹ, kohwo kohwo ọ tẹ be ya re ọ ruẹ e. Rekọ o lọhọ re ehru gbe akpọ vrẹ, vi ogẹgẹ ovo uzi nọ u re kie.’

Ikere-ebe gbe otu Farisi na a be rehọ Uzi Mosis nọ a ta nọ a bi koko rọ y’oma. Kareghẹhọ nọ okenọ Jesu o siwi ọzae jọ nọ o tuaro evaọ Jerusalẹm, a seha nọ: “Mai ilele Mosis. Ma riẹ nọ Ọghẹnẹ ọ ta ẹme kẹ Mosis.” Rekọ Uzi Mosis o ru ẹjiroro riẹ gba no orọ esuo ahwo omarokpotọ bru Ovie nọ Ọghẹnẹ o ro mu, Jesu Kristi. Fikiere muhọ evaọ odibọgba Jọn, oghoghẹrẹ ahwo kpobi, maero kọ imiwhrori gbe iyogbere na, a be daoma re a jọ omọvo Uvie Ọghẹnẹ.

Nọ Uzi Mosis u rugba no na, o gbẹ rọ ọgbahọ re a koko iei hi. Uzi na o kuvẹ nọ a sae fa orọo eva otọ eyero sa-sa, rekọ enẹna Jesu ọ tẹ ta nọ: “Kohwo kohwo nọ o siobọno aye riẹ, ọ jẹ rọwo ọfa, o bruẹnwae, ọ nọ ọ rọwo ọnọ ọzae o siobọno na o bruẹnwae.” Ẹvẹ eme itieye na e rẹ dha otu Farisi na eva te, maero nọ a kuvẹ orọo ofa evaọ otọ iyero buobu na!

Be ta eme riẹ haro kẹ otu Farisi na, Jesu ọ tẹ kẹ ọtadhesẹ jọ kpahe ezae ivẹ enọ eyero rai, hayo ẹrria rai, o ti nwene gaga. Kọ whọ sai vuhu ahwo nọ ezae enana a dikihẹ kẹ mu gbe oware nọ enwene uyero rai u dhesẹ?

Jesu ọ ta nọ: “Whaọ ọdafe jọ ọ jarọ, ọ jẹ gẹgọ iwu enwranwra gbe emamọ ehọ efuafo, ọ vẹ re enuawere kpe akiehwẹ kẹdẹ kẹdẹ. Ọyare jọ ọ jarọ odẹ riẹ Lazarọs, nọ o kiẹzẹ unu ighẹ riẹ, emela e vọ riẹ oma, ọ tẹ guọlọ nọ ọ rẹ rehọ ehẹhẹ nọ ikie no emẹjẹ ọdafe na kuọ oma; [ere re erakọ e rẹ nyaze te] lalọ emela riẹ.”

Jesu ọ jọ etenẹ rehọ ọdafe na dhesẹ isu egagọ ahwo Ju na, kugbe orọnikọ otu Farisi gbe ikere-ebe na ọvo ho rekọ otu Sadusi gbe ilori izerẹ na re. A fe evaọ uvẹ gbe ọghọ abọ-ẹzi nọ a wo, yọ a je dhesẹ oghẹrẹ uruemu ọdafe na. Ikpehọ enwranwrae rai i dhesẹ ọkwa aruoriwo nọ a wo, yọ iwu efuafo rai i dhesẹ ẹrẹreokie omobọ rai.

Otu edafe omoya na a re rri iyogbere na, imiwhrori na fihọ tọtọtọ, se ai nọ ‛am ha·’aʹrets, hayo ahwo otọakpọ na. Otu Lazarọs na a te dikihẹ kẹ ahwo nọ isu egagọ enana e be gbọ emuore gbe ekwa abọ-ẹzi na. Fikiere, wọhọ Lazarọs nọ emela e vọ oma, a bi rri imiwhrori na vo wọhọ enọ i wo ẹyao abọ-ẹzi jegbe nọ erakọ ọvo i fo nọ a rẹ nya usu kugbe. Ghele na, ohọo gbe uruame emuore abọ-ẹzi u bi kpe otu Lazarọs na, oyejabọ a jẹ rọ unuẹthẹ na, be gwọlọ umutho emuore abọ-ẹzi kpobi nọ u re kie no emẹjẹ ọdafe na tha.

Jesu ọ tẹ gbẹ nyaharo dhesẹ inwene evaọ eyero ọdafe na gbe Lazarọs. Eme họ inwene enana, kọ eme i dikihẹ kẹ?

Ọdafe na gbe Lazarọs A Wo Enwene

Ọdafe na o dikihẹ kẹ isu egagọ na enọ i wo uvẹ gbe ọghọ abọ-ẹzi, yọ Lazarọs o dikihẹ kẹ imiwhrori na enọ ohọo abọ-ẹzi u bi kpe. Jesu ọ tẹ ta iku riẹ haro, bi dhesẹ enwene ologbo evaọ izuazọ ezae na.

Jesu ọ ta nọ: “Koyehọ ọyare na o te ti whu, ikọ-odhiwu e tẹ wha e vrẹ kpo igbama Abraham. Ọdafe na o te whu re, a te ki ei. Evaọ ẹriwi nọ uye o jẹ bẹ e gaga, ọ jẹ kpare aro ọ tẹ ruẹ Abraham evaọ ugbo, gbe Lazarọs [nọ] ọ rọ igbama riẹ.”

Nọ o rọnọ ọdafe na avọ Lazarọs yọ ahwo gheghe he na rekọ a dikihẹ kẹ itu ahwo jọ na, ababọ avro uwhu rai yọ o rọ ẹwoho re. Kọ eme uwhu rai na u dikihẹ kẹ, hayo dhesẹ?

Jesu ọ nwane fodẹ enwene jọ no evaọ iyero nọ ọ ta nọ ‘uzi na gbe eruẹaro na e rọ bọwo Jọn Ọhọahwo-Ame na, rekọ no umuo okioye ze a bi whowho uvie Ọghẹnẹ.’ Fikiere, usiuwoma ota Jọn avọ Jesu Kristi oye o lẹliẹ ọdafe na avọ Lazarọs whu kẹ uzuazọ hayo eyero anwae rai.

Otu Lazarọs omarokpotọ, nọ i kurẹriẹ na a whu kẹ uzuazọ uwhu abọ-ẹzi anwae rai a tẹ te ziọ otọ aruoriwo Ọghẹnẹ. Nọ a je he rri bru isu egagọ na vẹre kẹ emu ọsese nọ o re kie no emẹjẹ abọ-ẹzi ze na, enẹna uzẹme Ikereakere nọ Jesu ọ be rọ kẹ o be nyate ẹgwọlọ rai. Fikiere a tẹ rehọ ai ziọ igbama, hayo oria aruoriwo, ọrọ Abraham Ologbo na, Jihova Ọghẹnẹ.

Evaọ abọdekọ riẹ, ahwo nọ a ru ọkwa ọdafe na via a tẹ ziọ otọ ofu Ọghẹnẹ fikinọ a se thahethahe inọ a rẹ jẹ ovuẹ Uvie nọ Jesu o bi wuhrẹ na rehọ. Fikiere aruoriwo nọ a roro nọ a wo vẹre na a te whu siẹe ba. Evaọ uzẹme, a ta kpahe ai nọ a rọ uye ẹwoho. Whaọ, gaviezọ nọ ọdafe na ọ be t’ẹme na:

“Baba Abraham, ohrọ mẹ o re owhẹ, who vi Lazarọs, re o dhe ẹroro uziobọ riẹ họ ame, o [dhei] họ ẹrọwo mẹ; keme uye o be lahiẹ omẹ gaga evaọ ebrerae ọnana.” Ovuẹ ọroro ẹdhoguo Ọghẹnẹ nọ ilele Jesu a jẹ vuẹ oye o jẹ lahiẹ otu ọdafe na. A jẹ gwọlọ nọ ilele na a siọ ovuẹ na ba ẹvuẹ, re o kẹ ai umutho ufuoma jọ no olahiẹ rai.

“Rekọ Abraham ọ tẹ ta nọ, ‘Ẹghele [kareghẹhọ] nọ emamọ eware ra i te owhẹ obọ evaọ uzuazọ ra, erọ Lazarọs kọ iyoma; rekọ enẹna ọ sasa oma no, whọ tẹ rọ evaọ uye ẹlahiẹ. Jegbe ọgọdọ ologbo nọ a tọ họ udevie mai, re enọ e guọlọ re i no etenẹ bru owhai a sae nya ha, ọvuọvo ọ sae vrẹ no obei bru omai tha ha.’ ”

Ẹvẹ u woma je fo te inọ enwene ologbo otiọye ọ roma via evaọ udevie otu Lazarọs gbe otu ọdafe na! Enwene na ọ roma via umutho emerae jọ evaọ obaro eva Pẹntikọst 33 C.E., okenọ a rehọ ọvọ ọkpokpọ na ro nwene ọvọ Uzi anwae na. O tẹ jọ vevẹ inọ ilele na họ enọ i wo aruoriwo Ọghẹnẹ, orọnikọ otu Farisi gbe isu egagọ na ha. “Ọgọdọ ologbo” nọ o hẹriẹ ọdafe ẹwoho na no ilele Jesu na u te dikihẹ kẹ ẹdhoguo okiẹrẹe Ọghẹnẹ nọ u re nwene he.

Ọdafe na ọ tẹ lẹ ‘Abraham ọsẹ na nọ’: “Vi [Lazarọs] kpo obọ uwou ọsẹ mẹ, keme me wo imoni isoi.” Ọdafe na ọ tẹ rọ enẹ feva inọ ọ rọ usu okpekpe kugbe ọsẹ ọfa, ọnọ ọ ghinẹ rọ Setan Ẹdhọ na. Ọdafe na ọ be lẹ nọ Lazarọs o rioriobọ kẹ evuẹ ẹdhoguo Ọghẹnẹ re a siọ “imoni isoi” riẹ, egbẹnyusu egagọ riẹ, ba efihọ “oria uye olahiẹ onana.”

“Rekọ Abraham ọ tẹ ta nọ, ‘A wo Mosis gbe eruẹaro; [jọ a] yo ẹme rai.’ ” Ẹhẹ, otẹrọnọ “imoni isoi” na a gwọlọ dhẹ vabọ no uye, oware nọ a re ru kpobi họ a re koko ikere Mosis gbe erọ Eruẹaro na enọ i vuhu Jesu mu wọhọ Mesaya na a ve zihe ruọ ilele riẹ. Rekọ ọdafe na ọ tẹ se: “Ijo, baba Abraham, rekọ ọjọ o te no iwhuowhu bru ai, a re ti kuevarẹriẹ.”

Rekọ a tẹ ta kẹe inọ: “A gbẹ kezọ Mosis gbe eruẹaro [na ha], a rẹ sae te kezọ gbe he, re ọ jọ ọ make kparoma no iwhuowhu bru ai dede.” Ọghẹnẹ ọ rẹ kẹ eka gbe eware igbunu jọ họ re ọ ruẹsi ku ahwo rẹriẹ. A re se je fi Ikereakere na họ iruo otẹrọnọ a gwọlọ wo aruoriwo riẹ. Luk 16:14-31; Jọn 9:28, 29; Matiu 19:3-9; Ahwo Galesha 3:24; Ahwo Kọlọsi 2:14; Jọn 8:44.

▪ Fikieme uwhu ọdafe na gbe Lazarọs o jẹ rọ orọ ẹwoho, kọ eme uwhu rai u dhesẹ?

▪ Nọ odibọgba Jọn u muhọ, didi enwene Jesu o dhesẹ inọ o roma via?

▪ Eme a ti si no okenọ Jesu o te whu no, kọ ẹvẹ onana u ti ro kpomahọ ẹme ọ orọo-ofa?

▪ Evaọ ọtadhesẹ Jesu, ono a rọ ọdafe gbe Lazarọs ro dhesẹ?

▪ Eme họ olahiẹ nọ ọdafe na ọ ruẹ uye riẹ na, kọ oghẹrẹ vẹ ọ yare nọ a rọ kẹe ufuoma?

▪ Eme “ọgọdọ ologbo” na o dikihẹ kẹ?

▪ Ono họ uzedhe ọsẹ ọdafe na, kọ amono họ inievo isoi riẹ?