Uzou Avọ 100

Ọtadhesẹ Emaena Na

ẸSEJỌHỌ Jesu ọ gbẹ rọ uwou Zakiọs, oria nọ ọ wẹriẹ evaọ edhere je kpohọ Jerusalẹm. Ilele riẹ a rọwo inọ okenọ o te te Jerusalẹm no, o ti whowho inọ ọye họ Mesaya na ọ vẹ rehọ Uvie riẹ mu. Re ọ kpọ iroro nana vi re o je dhesẹ inọ Uvie na o gbẹ rọ ugbothabọ, Jesu ọ tẹ kẹ ọtadhesẹ jọ.

O gbiku nọ: “Okpohwo jọ o te kpo orẹwho uthabọ jọ, re ọ dẹ uvie kẹ oma obọ riẹ, o ziheze.” Jesu họ “okpohwo” na, yọ odhiwu họ “orẹwho uthabọ” na. Okenọ Jesu o te t’obei, Ọsẹ riẹ ọ te kẹe ogaga uvie.

Rekọ taure ọ tẹ te nyavrẹ, okpohwo na o te se irigbo ikpe riẹ ọ tẹ rehọ emaena isiliva ọvuọvo rọ kẹ ai, ta nọ: “Wha rehọ enana thueki bẹsenọ mẹ rẹ tha.” Irigbo ikpe na evaọ orugba ọsosuọ riẹ a dikihẹ kẹ ilele ọsosuọ Jesu. Evaọ orugba ọkẹkẹe riẹ, a dikihẹ kẹ ahwo nọ e te jọ ereuku kugbei kpobi evaọ Uvie obọ odhiwu.

Emaena isiliva na yọ igho logbo, ọvo rai u te osa emerae esa kẹ ohwo nọ o bi ruiruo ẹwọ. Rekọ eme emaena na i dikihẹ kẹ? Kọ didi eki irigbo na a rẹ rehọ ae tho?

Emaena na i dikihẹ kẹ ekwakwa nọ ilele nọ a kẹ ẹzi na a re ro ruiruo re a rehọ ereuku Uvie odhiwu efa ze bẹsenọ Jesu ọ rẹ tha wọhọ Ovie evaọ Uvie nọ a yeyaa riẹ na. Nọ ọ kparoma ze jẹ roma via kẹ ilele riẹ no, ọ tẹ rehọ emaena ẹwoho na kẹ ai re a rehọ ai ru ilele efa jẹ rọ enẹ fiba ẹko Uvie odhiwu na.

Jesu ọ tẹ gbẹ taharo nọ: “Rekọ ahwo ẹwho riẹ a mu kpahe [okpohwo na], a te vi [enyukọ] rọ kpahe iẹ, anọ, ‘Ma guọlọ ohwo ọnana ọ re uvie he.’ ” Ahwo na họ emọ Izrẹl, hayo ahwo Ju, u kugbe ilele riẹ hẹ. Okenọ Jesu o kpohọ odhiwu no, ahwo Ju enana ẹkwoma ekpokpo ilele riẹ a te dhesẹ inọ a gwọlọ nọ ọ jọ ovie rai hi. Evaọ edhere ọnana a te ru wọhọ ahwo nọ a vi enyukọ na.

Kọ ẹvẹ irigbo ikpe na a rehọ emaena rai ruiruo? Jesu ọ ta nọ: “Koyehọ nọ o je ziheze, nọ uvie u te i obọ no, ọ tẹ ta re idibo enana, enọ ọ rehọ igho kẹ na a se ae bru ei, re ọ riẹ epanọ o ro rai erere eki ọthuọ rai. Ọ rọ ọsosuọ ọ tẹ ze aro riẹ nọ, ‘Olori, [emaena] ra o rehọ [emaena] ikpe kugbe oma.’ Ọ tẹ ta kẹ e nọ, ‘Whẹ emamọ ohwo, whọ riẹ ru; epanọ a ru owhẹ oruọzewọ eva osese ivievie, who re ti wo uzou eva ewho ikpe.’ Ọ rọ avivẹ ọ tẹ ze nọ, ‘Olori, [emaena] ra o rehọ [emaena] isoi kugbe oma.’ Ọ tẹ ta kẹ e re nọ, ‘Who re wo uzou evaọ ewho isoi re.’ ”

Ọrigbo nọ o wo emaena ikpe na o dikihẹ kẹ otu hayo ẹko ilele no Pẹntikọst 33 C.E. rite enẹna nọ u kugbe ikọ na. Ọrigbo nọ o wo emaena isoi na o te je dikihẹ kẹ ẹko jọ evaọ etoke ọyena enọ, wọhọ epanọ uvẹ gbe ẹgba rai u te, a ru ekwakwa ovie rai rro evaọ otọakpọ. Eko ivẹ na a rehọ ọwhọ ta usiuwoma na, yọ fikiere ahwo udu oruọzewọ buobu a te zihe ruọ Ileleikristi. Irigbo izii evaọ usu rai a riẹ eki tho a te ru ekwakwa rai nyaharo.

Jesu ọ tẹ gbẹ ta haro nọ: “Rekọ ọfa ọ tẹ ze, ta nọ, ‘Olori, emaena ra ọna, onọ mẹ variẹ fihọ ohọ fihọ obei. Whọ ruẹ, ozọ ra u je mu omẹ, keme whẹ ohwo ọrivri; whọ rẹ rehọ eware nọ who fihọ obei hi je vu onọ whọ kọ họ.’ Ọ tẹ ta kẹ e nọ, ‘Unu obọ ra me bi ro bruoziẹ ra, ọrigbo omuomu. Whọ riẹ nọ mẹ ọrivri, mẹ rẹ rehọ onọ me fihọ obei hi je vu onọ mẹ kọ họ? Kọ eme jabọ who gbe fi igho mẹ fihọ ebanke he? Re nọ me zihe ze mẹ vẹ rehọ iẹe avọ isuo ho.’ Ọ tẹ ta kẹ enọ i dikihẹ akotọ nọ, ‘Wha mi ei emaena na re wha rọ kẹ ọnọ o wo emaena ikpe na.’ ”—NW.

Rọkẹ ọrigbo omuomu na, ekufiẹ emaena ẹwoho na u dhesẹ ekufiẹ oria evaọ Uvie obọ odhiwu. Ẹhẹ, o wọhọ ẹsenọ o ku uvẹ nọ o re ro su ikpewho ikpe hayo isoi fiẹ. Je muẹrohọ inọ a ta nọ ọrigbo na o muomu orọnikọ fiki eyoma jọ nọ o ru hu rekọ, ukpoye, fikinọ o ruiruo kẹ ẹvi efe uvie olori riẹ hẹ.

Nọ a rehọ emaena ọrigbo omuomu na rọ kẹ ọrigbo ọsosuọ na, a te gu unoma nọ: ‘Olori, o wo emaena ikpe!’ Ghele na, Jesu ọ tẹ kuyo nọ: “Ohwo nọ o wo, ọye a rẹ kẹ; rekọ ọnọ o wo ho a re mi ei omonọ o wo kpobi. Rekọ rọ kẹ ewegrẹ mẹ enana, e nọ e rọwo nọ me su ai hi [na], wha rehọ ae ze etenẹ, re wha kpe ai eva aro mẹ.” Luk 19:11-27; Matiu 28:19, 20.

▪ Eme ọ wha ọtadhesẹ Jesu ọrọ emaena na ze?

▪ Ono họ okpohwo na, kọ diẹse họ ẹkwotọ nọ o kpohọ na?

▪ Amono họ irigbo na, kọ eme emaena na i dikihẹ kẹ?

▪ Amono họ ahwo ẹwho na, kọ ẹvẹ a ro dhesẹ omukpahe rai?

▪ Fikieme a je se ọrigbo jọ omuomu, kọ eme ekufiẹ emaena riẹ u dhesẹ?