Uzou Avọ 118

Evivie gbe Emuo

OKE o vrẹ udeviaso no nọ Judas o su ogbotu obuobu isoja ze, ilori izerẹ, otu Farisi, gbe amọfa rueva ọgbọ Getsemane na. Izerẹ na a gba riẹ mu no nnọ a rẹ kẹ Judas ewẹ isiliva 30 re o vivie Jesu.

Vẹre, okenọ a vi Judas vrẹ no Ọnyavrẹ na, ẹsejọhọ ọ nya ovavo bru ilori izerẹ na. Enana a tẹ nwani koko iletu rai họ, jegbe ẹko isoja. Ẹsejọhọ Judas ọ kaki su ai kpohọ oria nọ Jesu avọ ikọ riẹ a je ru Ọnyavrẹ na. Nọ ọ ruẹ nnọ a no etẹe no, ogbotu ahwo nọ a wha ekwakwa-ẹmo jẹ wha ikpẹ gbe ituerae na a te lele Judas no Jerusalẹm fa Ukiekpotọ Kidrọn na vrẹ.

Nọ Judas o bi su ogbotu na kpohọ Ugbehru Olivi na, u mu rie ẹro nnọ ọ riẹ oria nọ ọ jẹ ruẹ Jesu. Evaọ eka jọ nọ e vrẹ na, nọ Jesu avọ ikọ na a jẹ nya kpemu kparo no Bẹtani kpohọ Jerusalẹm na, a jẹ hẹ keria serihọ ẹsibuobu evaọ ọgbọ Getsemane na re a jẹ t’ẹme. Rekọ, enẹna, ẹsejọhọ avọ Jesu nọ irre olivi na i ruru no evaọ ebi na, ẹvẹ isoja na a ti ro vuhu iei? Ẹsejọhọ a te rue riẹ ẹdọvo ho. Fikiere Judas ọ tẹ kẹ ai oka, ta nọ: “Ọnọ mẹ rẹ te viọlọ unu na họ ohwo na; wha mu ei wha su ei vrẹ ẹrera.”

Judas o te su ogbotu obuobu na rueva ọgbọ na, ọ tẹ ruẹ Jesu avọ ikọ riẹ, ọ tẹ nya bru ei ovavo, ta nọ: “Do, Owuhrẹ!” ọ tẹ viọlọ iẹe unu ziezi.

Jesu o te yo zihe kẹe nọ: “Ogbẹnyusu, fikieme whọ rọ nyaze?” (NW ) Ọye ọvo ọ tẹ kuyo onọ obọ riẹ, ta nọ: “Judas, ẹviọlọ who re ro vivie Ọmọ ohwo?” Rekọ o nwano rọkẹ ọnọ o vivie i rie! Jesu ọ tẹ j’owọ haro ziọ elo ituerae gbe ikpẹ nọ i bi lo na ọ tẹ nọ nnọ: “Ono wha re duo?”

A tẹ kuyo nọ: “Jesu Nazarẹt.”

Jesu o te yo nọ: “Mẹ họ ọye,” yọ o dikihẹ aro rai kpobi ududu. Avọ igbunu kẹ aruọwha riẹ yọ a riẹ oware nọ a bi rẹro riẹ hẹ, ezae na a te bioma kpemu a te kie fihọ otọ.

Jesu ọ tẹ runu kpotọ gbẹ ta nọ: “Mẹ ta kẹ owhai no nọ, mẹ họ ọye; otẹrọnọ wha be guọlọ omẹ, [ru] re ahwo nana a nyavrẹ.” Okenọ a gbẹ jọ ubrukpẹ obọ ehru na, Jesu ọ ta kẹ Ọsẹ riẹ evaọ olẹ nnọ ọ sẹro ikọ ẹrọwọ riẹ no gbe nnọ ọvuọvo rai o vru hu “ajokpa ọmọ ọraha na.” Fikiere, re eme riẹ e ruẹse i rugba, ọ tẹ yare nnọ a siobọ no ilele riẹ vrẹ.

Nọ isoja na a wariẹ kpomamu no, dikihẹ, je mu Jesu họ ẹgba, ikọ na a te vuhu oware nọ o be te via na mu. A tẹ nọ nọ: “Olori, ma rehọ [ọgbọdọ] nyawo?” Taure Jesu ọ tẹ te kẹ uyo, Pita, nọ o bi veghe ọgbọdọ jọ evaọ usu ivẹ nọ ikọ na a wha ze na, ọ tẹ họrọ mu Malkọs, ọrigbo ozerẹ okpehru na. Ọgbọdọ Pita o te kie uzou ọrigbo na thọ ọ tẹ fia ozọ obọze riẹ no.

Jesu ọ tẹ ta via nọ: “Wha se utiona ba!” Nọ ọ kaobọ te ozọ Malkọs, o te siwi omola na. O te wuhrẹ obọdẹ uwuhrẹ jọ, ta kẹ Pita nọ: “Zihe ọgbọdọ ra fihọ ẹta riẹ, keme enọ e tọlọ ọgbọdọ kpobi a re ti whuwhu ọgbọdọ. Hayo manikọ wha roro nọ mẹ rẹ sae lẹ Ọsẹ mẹ re o vi enjẹle eko ikpegbivẹ se omẹ hẹ?”—NW.

Jesu o fioma hotọ re a mu ei, wọhọ epanọ ọ ta: “Ẹvẹ ekere na ọ rẹ rọ gba, e nọ e ta nọ, ere o rẹ jọ hrọ?” O te fibae nọ: “Kọ mẹ gbẹ da egho nọ Ọsẹ na ọ komẹ nọ mẹ da?” Ọ rọwo kugbe oreva Ọghẹnẹ kẹe riẹriẹriẹ!

Jesu ọ tẹ t’ẹme rri ogbotu na, nọ: “Wha rehọ elọkọ avọ ekpọ ze ti mu omẹ wọhọ ahwo nọ a bi mu oji? Kẹdẹ kẹdẹ mẹ jẹ keria eva uwou egagọ-ode je he wuhrẹ, wha mu omẹ hẹ. Rekọ enana kpobi e via re ekere eruẹaro na e gba.”

Isoja gbe egbaẹmo gbe iletu ahwo Ju na a te kru Jesu a tẹ gbae. Nọ a ruẹ onana, ikọ na a tẹ dhẹ siọ Jesu ba. Rekọ, ọmoha jọ—ẹsejọhọ Mak olele na—ọ tẹ gbẹ daji udevie ogbotu na. Ẹsejọhọ ọ jọ evaọ uwou nọ Jesu o jo ru Ọnyavrẹ na o te lele ogbotu na no obei ze. Rekọ, enẹna a te vuhu iei, a tẹ gwọlọ nọ a re mu ei. Rekọ o te siobọno ewu riẹ ọ tẹ dhẹ vrẹ. Matiu 26:47-56; Mak 14:43-52; Luk 22:47-53; Jọn 17:12; 18:3-12.

▪ Fikieme u je mu Judas ẹro nnọ ọ te ruẹ Jesu eva ọgbọ Getsemane na?

▪ Ẹvẹ Jesu o ro dhesẹ ọdawẹ kẹ ikọ riẹ?

▪ Eme Pita o ru re ọ thọ Jesu, rekọ eme Jesu ọ ta kẹ Pita kpahiẹe?

▪ Ẹvẹ Jesu o ro dhesẹ nnọ ọ rọwo kugbe oreva Ọghẹnẹ kẹe riẹriẹriẹ?

▪ Nọ ikọ na a dhẹ siọ Jesu ba, ono ọ daji, kọ eme ọ via kẹe?