Uzou Avọ 120

Ẹsiọ Evaọ Etegu Na

NỌ A lele ikọ edekọ na dhẹ siọ Jesu ba no evaọ ọgbọ Getsemane na fiki ozọ, Pita avọ Jọn a te dikihẹ. Ẹsejọhọ a dhẹ mu Jesu okenọ a jẹ rehọ iẹe kpohọ uwou Anas. Okenọ Anas o vi ei bru Kayafas Ozerẹ Okpehru na, Pita avọ Jọn a te je lele iei evaọ ugbo, ababọ avro a riẹ onọ a re ru hu yọ a rọ awae izuazọ obọ rai a te je wo ọdawẹ odidi kpahe oware nọ o te via kẹ Olori rai.

Nọ a te uwou ulogbo Kayafas, Jọn ọ sae rueva ighẹ na, keme ozerẹ okpehru na ọ riẹ riẹ. Rekọ Pita o te dikihẹ otafe evaọ unuẹthẹ na. Rekọ u kri hi Jọn ọ tẹ nyaze ọ tẹ t’ẹme kẹ oriẹthẹ na, odibo-ọmọtẹ, a tẹ kẹ Pita uvẹ re ọ rueva.

Ekpahe i muhọ ekpe no, yọ egbodibo uwou gbe iletu ozerẹ okpehru na a koko erae họ otafe na. Pita o te kuomagbe ai re ọ sasa oma riẹ be hẹrẹ ekuhọ ẹdhoguo Jesu. Etẹe, nọ erae na e be wae na, oriẹthẹ nọ ọ kẹ Pita uvẹ nọ ọ rueva na o te vuhu ei ziezi. O te bo nọ: “Whẹ avọ Jesu, ohwo Galili na a gbẹ jọ re.”

Avọ evedha fikinọ a vuhu i rie mu no, Pita ọ tẹ jọ iraro rai kpobi vro riẹ inọ ọ riẹ Jesu ẹdọvo ho. Ọ ta nọ: “Mẹ riẹ hẹ, hayo mẹ riẹ otọ ẹme nọ whọ ta na ha.”

Pita ọ tẹ kparoma nya kẹle unuẹthẹ na. Evaọ obei, ọmọtẹ ọfa o te vuhu iei ọ tẹ ta kẹ enọ i dikihẹ kẹle nọ: “Ohwo ọnana avọ Jesu obọ Nazarẹt a gbẹ jọ re.” Pita ọ tẹ wariẹ vro riẹ, be bọwo eha nọ: “Mẹ riẹ ohwo na ha.”

Pita ọ tẹ gbẹ jọ etegu na, be daoma kuoma riẹ dhere ziezi. Ẹsejọhọ evaọ oke nana o te guegue nọ ọkpa jọ ọ jọ ugbothabọ bo evaọ ebi irioke na. Whaọ oke nana, ẹdhoguo Jesu ọ gbẹ be nyaharo, ẹsejọhọ ọ rọ ofẹ ukpehru etegu na. Ababọ avro Pita avọ edekọ nọ e be hẹrẹ na a ruẹ isẹri sa-sa nọ a rọ ze ti sisẹi nọ e be nyaze je zihe.

Enwene auwa ọvo ọ vrẹ no nọ a vuhu Pita wọhọ nnọ ọ jọ kugbe Jesu. Whaọ ahwo jọ nọ a dikihẹ kẹle etẹe a tẹ nyaze ta nọ: “Umuẹro, whẹ omọvo rai jọ re, keme ẹvẹrẹ-unu ra odhesẹ owhẹ via.” Omọvo rai jọ yọ omoni Malkọs, ọnọ Pita o bru ozọ riẹ na. Ọ tẹ ta nọ: “Mẹ ruẹ owhẹ avọ iẹe obọ ọgbọ?”

Pita ọ tẹ vro gaga ta nọ: “Mẹ riẹ ohwo na ha.” Evaọ uzẹme, ọ jẹ leka be jẹ bọwo eha re o ru ai riẹ nnọ aikpobi na a bi roro thọ, ọ tẹ be rọ enẹ bọwo omobọ riẹ eha otẹrọnọ ọ be ta uzẹme he.

Nọ Pita ọ nwane vro ọrọ avọ isiasa no, ọkpa o te bo. Idudhe na, Jesu, ọnọ ọ nya ziọ ogebara na no evaọ ehru etegu na, o te kuomarẹriẹ o te rri rie. Idudhe na, Pita ọ tẹ kareghẹhọ inọ Jesu ọ ta euwa jọ nọ e vrẹ no evaọ uwou ukpehru na nọ: “Ọkpa o jeti bo isiava ha, whọ rẹte vro omẹ isiasa.” Fiki oja uzioraha riẹ, Pita ọ tẹ ruọ otafe ọ tẹ viẹ gaga.

Ẹvẹ onana o sae rọ via? Ẹvẹ Pita ọ sae rọ vro Olori riẹ isiasa ususu kpata kpata, yọ ogaga abọ-ẹzi riẹ u mu rie ẹro no? Ababọ avro oware na o ruọ Pita ọza. A be vẹ uzẹme tu, yọ a bi ru Jesu wọhọ ogbulegbu oyoma. A be vẹ oware nọ u woma tu wọhọ uyoma, ọvowa wọhọ ọnọ ọ reabe. Fiki ọ otunyẹ eyero na, Pita ọ gbẹ riẹ oma riẹ hẹ. Idudhe na iroro omarokpotọ riẹ e tẹ tahaku; avọ ọkora kẹe o te kie kẹ ozodhẹ ahwo. Ajọ oyena o via kẹ omai hi! Matiu 26:57, 58, 69-75; Mak 14:30, 53, 54, 66-72; Luk 22:54-62; Jọn 18:15-18, 25-27.

▪ Ẹvẹ Pita avọ Jọn a sae rọ ruọ etegu ozere okpehru na?

▪ Okenọ Pita avọ Jọn a jọ evaọ etegu na, eme ọ jẹ via evaọ uwou na?

▪ Bro ẹse ọkpa o bo, kọ bro ẹse Pita ọ vro nnọ ọ riẹ Kristi hi?

▪ Eme eka nọ Pita ọ la jẹ bọwo ehao na i dhesẹ?

▪ Eme o lẹliẹ Pita vro nnọ ọ riẹ Jesu hu?