Uzou Avọ 125

Ẹrova Evaọ Ehru Ure Na

IGBULEGBU ivẹ e rọ kugbe Jesu nọ a bi su nya i kpe. Kẹle okpẹwho na, a tẹ daji oria nọ a re se Golgota, hayo Oria Ekpeuzou.

A tẹ ba iwu no aimasa oma. A tẹ rehọ udi nọ a rehọ mur gua ze. O wọhọ nọ eyae Jerusalẹm a ruẹrẹ onana kpahe, yọ ahwo Rom a rẹ se he re a rọ udi onana nọ u re kpe oma na rọ kẹ ahwo nọ a be te kare. Rekọ, okenọ Jesu ọ kaunu tei, ọ tẹ siẹe. Fikieme? Ẹsejọhọ ọ gwọlọ nọ iroro riẹ kpobi e rẹ jọ gbagba evaọ etoke odawọ ulogbo ẹrọwọ riẹ nana.

A tẹ rriẹ Jesu họ ehru ure na avọ abọ riẹ nọ a rriẹ kpohọ ehru uzou riẹ. Isoja na a tẹ tehe ibubẹ ilogbo fihọ abọ gbe awọ riẹ. O te bi ghriri oma avọ edada nọ ibubẹ na i bi duwu uwo gbe iriẹ-oma riẹ lafi. Okenọ a rọ ure na dikihẹ no, edada na kọ umuo nọ e rẹ da ba, keme ẹgbẹdẹ oma riẹ o tẹ be bẹre emela ibubẹ na. Ghele na, ukpenọ o re guegue ai, Jesu ọ tẹ lẹ kẹ isoja ahwo Rom na nọ: “Ọsẹ, rehọ vrẹ ae; keme a riẹ epanọ a re ruo ho.”

Pailet o kere fihọ akpala nọ ọ rọ ehru uzou riẹ nọ: “JESU E NAZARẸT OVIE JU.” Ẹsejọhọ, o kere onana orọnikọ fiki adhẹẹ nọ o wo kẹ Jesu ọvo ho rekọ fikinọ o mukpahe izerẹ ahwo Ju na epanọ a gbae họ re o kpe Jesu. Re ahwo kpobi a sai se eme na, Pailet o te kere iei evaọ evẹrẹ esa—evaọ Hibru, evaọ Latin nọ a riẹ na, gbe Grik nọ a riẹ na.

Onana o tẹ dha izerẹ ikpehru na eva, gbe Kayafas avọ Anas. Orro nana nọ a kẹ riẹ na o tẹ raha etoke oghọghọ rai no. Fikiere a te si ikẹ nọ: “Who kere nọ, ‘Ovie Ju hu’, rekọ, ‘Ọ ta nọ, Mẹ họ Ovie Ju.’ ” Avọ evedha nnọ izerẹ na a rehọ e riẹ ru ẹgwọlọ rai no, Pailet ọ tẹ ta avọ ofu nọ: “O nọ me kere, me kere no.”

Izerẹ na, kugbe ogbotu obuobu na, a te koko họ oria ikpakpe na, yọ izerẹ na a bi dhesẹ nnọ eme nọ a kere họ ehru uzou riẹ na erue. A tẹ be wariẹ eme erue nọ a kake ta na evaọ ẹdhoguo Sanhẹdrin na. Fikiere, o rọ oware igbunu hu nọ ahwo nọ a jẹ nya oyena vrẹ a jẹ rọ lae eka, bi nuhu izou rai avọ ẹkoko be ta nọ: “Whẹ nọ ọ rẹ raha uwou egagọ-ode, ọ rehọ edẹ esa bọ e na, si oma ra: jo whẹ Ọmọ Ọghẹnẹ, [no ure oja, NW ] na ze otọ.”

Ilori izerẹ na gbe egba egagọ rai a te fi ẹkẹ rai họ iẹe: “Ọye họ Ovie Izrẹl; jọ ọ ruotọ no ure oja na ze re ma rọwo iẹe. O fi eva họ Ọghẹnẹ; jọ O siwi iei otẹrọnọ Ọ gwọlọ e riẹ, keme ọ ta nọ, ‘Mẹ Ọmọ Ọghẹnẹ.’ ”—NW.

Isoja na oma rai a tẹ ruọ ẹme na bi se Jesu ẹkoko. Avọ ẹkoko a tẹ rehọ udi ogho kẹe, ẹsejọhọ be rehọ iẹe gọniẹe. A tẹ poviẹe nọ: “Jọ whẹ họ Ovie ahwo Ju na, siwi oma ra!” Makọ igbulegbu na dede—enọ a kare fihọ t’ofẹ t’ofẹ Jesu na—a te bi sei ẹkoko. Dai roro iei! Ọzae nọ ọ mae rro nọ ọ rria no, ẹhẹ, ọnọ o lele Jihova Ọghẹnẹ ma eware kpobi, o fioma h’otọ ruẹ uye olahiẹ oyena kpobi!

Isoja na a tẹ rehọ iwu Jesu a tẹ ghale ai kpohọ abane. A te fiedhọ re a riẹ ohwo nọ o re wo ai. Rekọ ewu otọ-oma na o wo uko ho, keme o rẹ ghaghae. Fikiere isoja na a tẹ ta kẹ ohwohwo nọ: “Ma bẹre iẹ [he], rekọ ma rehọ iẹe fiedhọ, re ma riẹ ohwo nọ o re woi.” Fikiere, a tẹ rehọ ogbori ru ikereakere na gba onọ o ta nọ: “A ghale iwu mẹ udevie rai, fiki ewu otọ-oma mẹ a je fiedhọ.”

U kri hi, omọvo igbulegbu na o te ti vuhumu nnọ Jesu ghinọ ovie. Fikiere, be whọku ọrivẹ riẹ, ọ tẹ ta nọ: “Kọ whọ gbẹ dhẹ ozọ Ọghẹnẹ gbe he, nọ whọ rọ udevie obrukpe-uwhu ọvo na? Whaọ omai na ukiete; keme osa iruo mai ma be rehọ na; rekọ ohwo ọnana o ru oware ovo thọ họ.” Ọ tẹ lẹ Jesu nọ: “Roro omẹ, okenọ whọ ze ogaga uvie ra.”

Jesu ọ tẹ kuyo nọ: “Uzẹme mẹ ta kẹ owhẹ nẹnẹ na, Who re ti lele omẹ jọ evaọ Aparadase.” (NW ) Eyaa nana i ti rugba okenọ Jesu o te muhọ e su no wọhọ Ovie evaọ obọ odhiwu ọ vẹ te kpare orumuomu ọnana nọ o kurẹriẹ na ziọ uzuazọ evaọ otọakpọ evaọ Aparadase nọ ahwo nọ a zọ no Amagẹdọn gbe egbẹnyusu rai a te ruẹrẹ. Matiu 27:33-44; Mak 15:22-32; Luk 23:27, 32-43; Jọn 19:17-24.

▪ Fikieme Jesu ọ gbẹ rọ da udi nọ a rehọ mur gua na ha?

▪ Ẹsejọhọ, fikieme a je fi akpala nọ a kere eme họ ure Jesu, kọ didi ẹwhọ o wha ziọ udevie Pailet gbe ilori izerẹ na?

▪ Olahiẹ efa vẹ i te Jesu evaọ ehru ure na, kọ ẹsejọhọ eme ọ wha onana ze?

▪ Ẹvẹ oware nọ a rọ iwu Jesu ru u ro ru eruẹaruẹ gba?

▪ Didi enwene omọvo igbulegbu na o ru, kọ ẹvẹ Jesu o ti ro ru ayare riẹ gba?