Uzou Avọ 126

‘Uzẹme Ọnana họ Ọmọ Ọghẹnẹ’

JESU ọ te jọ ehru ure na kri hi nọ, evaọ udevie uvo, ehru o ro bi euwa esa. Onana o rọnikọ otọ nọ u muebi gheghe he, keme otọ u re muebi evaọ etoke ọvẹre ọkpokpọ, yọ oke onana ọvẹre o ghelie no evaọ oke Ọnyavrẹ na. Ofariẹ, otọ u te muebi u re kri te iminiti kakao jọ ọvo. Fikiere Ọghẹnẹ họ ọnọ ọ wha ebi ọnana ze! Ẹsejọhọ re o ruru unu ahwo nọ i bi se Jesu ẹkoko na.

Otẹrọnọ oware urirẹ onana o via taure orumuomu na ọ tẹ te whọku ọrivẹ riẹ jẹ yare Jesu nnọ ọ kareghẹhọ iẹe, o sae jọ nọ onana u w’obọ kpahe ekurẹriẹ riẹ. Ẹsejọhọ oke ebi na eyae ene na, oni Jesu gbe oniọvo riẹ Salomi, Meri Magdalini, gbe Meri oni Jemis Ọsese na, a rọ bẹbẹ ziọ akotọ ure oja na. Jọn, ukọ oyoyou Jesu, ọ rọ kugbe ai evaọ etẹe.

Ẹvẹ oware onana u ‘duobọ te’ udu oni Jesu te nọ ọ be ruẹ ọmọ nọ ọ k’evie jẹ yọrọ nọ ọ yagha ehru urre avọ akọriọ na! Ghele na, orọnikọ Jesu o bi roro kpahe edada riẹ hẹ rekọ kpahe ewoma oni riẹ. Avọ omodawọ ulogbo, o te fiuzou rri Jọn ọ tẹ ta kẹ oni riẹ nọ: “Aye, ri ọmọ ra!” O te fiuzou rri Meri, ọ tẹ ta kẹ Jọn nọ: “Ri oni ra!”

Jesu ọ tẹ rọ enẹ mu oni riẹ, ẹsejọhọ ọnọ o zihe ruọ aye-uku no, họ ukọ riẹ nọ o you gaga obọ. O ru onana keme emọ Meri edekọ a ti fi ẹrọwọ họ iẹe he. Fikiere ọ tẹ kẹ emamọ oriruo, orọnikọ evaọ eruo ẹgwọlọ iwo ọvo ho, rekọ te erọ abọ-ẹzi te.

Enwenọ ughọjọ esa evaọ uvo, Jesu ọ tẹ ta nọ: “Uruame u [bi] kpe omẹ.” Jesu ọ tẹ jọ oma riẹ riẹ nnọ Ọsẹ riẹ o siobọnoi kpobi no re a ruẹse dawo ẹgbakiete riẹ te urere. Fikiere ọ tẹ rọ urru oruarua se nọ: “Ọghẹnẹ mẹ, Ọghẹnẹ mẹ, eme whọ jẹ se omẹ ba?” Nọ a yo onana, ahwo jọ nọ a dikihẹ kẹle a te bo nọ: “Ri, o bi se Elaeja.” Omọvo rai jọ ọ tẹ nwane rehọ uzii nọ o duhọ udi ogho fihọ adada ure, ọ tẹ rehọ iẹe dae. Rekọ amọfa a tẹ ta nọ: “Seba, ma ri sọ Elaeja ọ te tha ti si ei no ze otọ.”

Nọ udi ogho na u te Jesu unu no, o te bo via nọ: “U re no.” Ẹhẹ, o ru eware kpobi nọ Ọsẹ riẹ o vi rie ziọ otọakpọ ti ru no. Ukuhọ riẹ, ọ tẹ ta nọ: “Ọsẹ, mẹ rehọ ẹzi mẹ họ obọ ra!” Fikiere Jesu o te mu ogaga uzuazọ riẹ họ Ọghẹnẹ obọ avọ evaifihọ nnọ Ọghẹnẹ o ti zihe iei kẹe. Ọ tẹ jẹlẹ uzou riẹ o te s’ẹwẹhọ.

Nọ Jesu ọ nwani s’ẹwẹhọ no, otọ u te nuhu gaga, o tẹ bẹre iki rovie. Enuhu na o ga te epanọ iki nọ e rọ otafe Jerusalẹm e rọ bẹre rovie i te gbolo iri no eva rai ze. Ahwo nọ a be nya oyena vrẹ a tẹ ruẹ iri na a tẹ rueva okpẹwho na nya e niyẹrẹ rai.

Ofariẹ, okioke nọ Jesu o ro s’ẹwẹhọ na, ubere ulogbo nọ o hẹriẹ Ọrẹri na no Ọrẹri Erẹri evaọ etẹmpol Ọghẹnẹ na o tẹ bẹre abava, n’ehru duotọ. Ubere uwoma nana u kpehru te imita 18 o tẹ jẹ rọ gbẹgbẹdẹ gaga! Oware igbunu onana orọnikọ u dhesẹ evedha Ọghẹnẹ ọvo mukpahe ahwo nọ i kpe Ọmọ Riẹ hẹ rekọ u dhesẹ nnọ edhere nọ a re ro kpohọ Ọrẹri Erẹri na, odhiwu omariẹ, o rovie no fiki uwhu Jesu.

Whaọ, nọ otọ na u nuhu ahwo a jẹ ruẹ eware nọ e be via, ozọ u te mu ai gaga. Olori isoja nọ o wuzou ikpakpe na ọ tẹ rọ oruaro kẹ Ọghẹnẹ. O te whowho nọ: ‘Uzẹme ọnana họ Ọmọ Ọghẹnẹ.’ Ẹsejọhọ ọ jariẹ nọ a je si ikẹ kpahe sọ ọmọ Ọghẹnẹ ọ rọ evaọ oke ẹdhoguo Jesu evaọ aro Pailet. Yọ enẹna u mu rie ẹro no nnọ Jesu yọ Ọmọ Ọghẹnẹ, ẹhẹ, inọ ghinọ ọye họ ọzae nọ ọ mae rro nọ ọ rria no.

Eware igbunu enana nọ e via na i duobọ te amọfa gaga re, a te muhọ ezihe kpo be tehe igbama rai ro dhesẹ uweri gbe omovuọ rai. Eyae buobu nọ e rọ ilele Jesu nọ eware enana kpobi i duobọ te gaga no a bi rri eware enana kpobi no ugbo ze. Jọn ukọ na ọ jariẹ re. Matiu 27:45-56; Mak 15:33-41; Luk 23:44-49; 2:34, 35; Jọn 19:25-30.

▪ Fikieme o gbẹ sae jọ nọ otọ nọ u re muebi gheghe oye o wha ebi euwa esa na ze he?

▪ Taure ọ tẹ te nwani whu, didi emamọ oriruo Jesu o fihọ otọ kẹ ahwo nọ i wo esẹ gbe ini nọ e kpako no?

▪ Eme ọ urere ene vẹ Jesu ọ ta taure o te ti whu?

▪ Eme otọ-unuhu na u rugba, kọ eme họ otofa ubere etẹmpol na nọ o bẹre abava na?

▪ Ẹvẹ eware igbunu na i kpomahọ olori isoja nọ o wuzou ikpakpe na te?