Uzou Avọ 128

Jesu Ọ rọ Uzuazọ!

OKENỌ eyae na a ruẹ nọ uki Jesu o rọ ufofe, Meri Magdalini ọ tẹ dhẹ nya e vuẹ Pita avọ Jọn. Rekọ, o wọhọ nọ eyae edekọ na a kiọkọ uki na. U kri hi, enjẹle jọ ọ tẹ roma via o te zizie ai rueva.

Eyae na a tẹ jọ etẹe ruẹ ẹnjẹle ọfa, enjẹle na jọ ọ tẹ ta kẹ eyae na nọ: “Ozọ u mu owhai hi: keme na mẹ riẹ nọ Jesu ọ nọ a kare veghe na ọye wha rọ ẹguọlọ. Ọ rọ etenẹ hẹ: keme ọ kparoma no iwhuowhu no wọhọ epanọ ọ ta vẹre. Wha nyaze, re wha ti ri oria nọ o kiẹzẹ vẹre. Wha kpo vẹrẹ eta kẹ ilele riẹ nọ, ọ kparoma no iwhuowhu no.” Fikiere avọ ozọ gbe oghọghọ ulogbo, eyae enana a tẹ dhẹ vrẹ.

Oke onana, Meri ọ ruẹ Pita avọ Jọn no, ọ tẹ ta kẹ ai nọ: “A rehọ Olori no evaọ uki no, ma riẹ o bo nọ a fi riei họ họ.” Idudhe na ikọ ivẹ na a tẹ dhẹ ohrẹ vrẹ. Jọn ọ mae dhẹ siawọ—keme o wọhọ nọ ọye ọ mae maha—ọ tẹ kaki te uki na. Oke onana eyae na a nya vrẹ no, yọ ohwo ọvo ọ rọ etẹe he. Nọ o ruwẹ, Jọn o te bi no uki na riwi ọ tẹ ruẹ emehọ na, rekọ ọ rueva ha.

Nọ Pita ọ nyaze, o du raha oke he rekọ ọ tẹ họrọ rueva. Ọ ruẹ emehọ na nọ e rọ otọ gbe ohọ nọ a rọ variẹ uzou Jesu. U kpiri fihọ oria ovo. Jọn ọ tẹ rueva uki na re, ọ tẹ rọwo ẹme Meri. Rekọ te Pita hayo Jọn a wo otoriẹ nnọ Jesu ọ kparoma no ho, dede nọ Ọ ta kẹ ai no vẹre ẹsibuobu inọ Ọ te kparoma. Avọ idhọvẹ, aimava na a te zihe kpo, rekọ Meri, ọnọ o zihe ziọ uki na no na, ọ tẹ daji.

Oke onana kpobi, eyae edekọ na a bi siawọ re a nya e ta kẹ ilele na nnọ Jesu ọ kparoma no, wọhọ epanọ enjẹle na ọ ta kẹ ai nọ a ru. Nọ a be dhẹ vrẹ na, Jesu o te zere ai ọ tẹ ta nọ: “Wha do.” Nọ a kie fihọ aro riẹ, a te digwẹ kẹe. Jesu ọ tẹ ta kẹ ai nọ: “Wha dhẹozọ họ: wha kpo eta kẹ imoni mẹ re a kpo obọ Galili, etẹe a jẹ te ruẹ omẹ.”

Vẹre, nọ otọ u nuhu nọ enjẹle na e roma via, idudu i te mu isoja na a tẹ fọ kpoko wọhọ ahwo owhuowhu. Nọ aro rai ọ hiẹ no, a tẹ dhẹ ruọ okpẹwho na vẹrẹvẹrẹ nya e vuẹ ilori izerẹ na oware nọ o via. Nọ a siuzou koko kugbe ‘ekpako’ ahwo Ju na no, a tẹ j’udi kẹ isoja na re a ruru ẹme na. A tẹ ta kẹ ai nọ: “Wha nya e ta nọ, ‘Ilele riẹ a nyaze aso ti tho i vrẹ nọ [ma] jọ owezẹ.’ ”

Nọ o rọnọ a rẹ sai kpe isoja Rom ọnọ o kie ruọ owezẹ evaọ oke iroiro riẹ na, izerẹ na a tẹ yaa nọ: “Ẹme ọnana [ọrọ owezẹ rai na] o te do te ọba na oma, ma rẹ ruẹrẹ iẹe họ, re uye o siọ owhai oma ba ete.” Nọ ugho udioriọ na o rọ ruaro na, isoja na a te ru epanọ a ta kẹ ai. Fikiere, iyẹrẹ erue kpahe etho oma Jesu o tẹ vaha kẹkẹre evaọ udevie ahwo Ju.

Meri Magdalini, ọnọ ọ daji uki na, o bi weri gaga. Kọ diẹse Jesu ọ rọ? Nọ o ruwẹ re o rri eva uki na, ọ tẹ ruẹ enjẹle ivẹ nọ e wha iwu efuafo, nọ e wariẹ roma via no! Ọvo jọ ọ keria ofẹ uzou, ọdekọ ọ tẹ keria awọ oria nọ oma Jesu o jọ vẹre. A tẹ nọ nọ: “Aye, eme whọ jẹ be viẹ?”

Meri ọ tẹ kuyo nọ: “Epanọ a rehọ Olori mẹ vrẹ, mẹ riẹ o ria nọ a fi riei họ họ.” O te kuomarẹriẹ ọ tẹ ruẹ ohwo jọ ọnọ ọ wariẹ onọ na: “Aye, eme whọ jẹ be viẹ?” Ohwo ọnana ọ tẹ jẹ nọ nọ: “O no whọ rẹ guọlọ?”

Bi roro nnọ ohwo ọnana họ ọnọ ọ be rẹro te ọgbọ nọ uki na o rọ na, ọ tẹ ta kẹe nọ: “[Ọga], jọ owhẹ ọ wha riẹe vrẹ, dhesẹ oria nọ who fi riei họ kẹ omẹ, mẹ rẹ rehọ iẹ vrẹ.”

Ohwo na ọ tẹ ta nọ: “Meri.” Idudhe na o te vuhumu, evaọ edhere nọ ọ rẹ rọ t’ẹme kẹe vẹre, inọ Jesu ọna. “Rabonai!” (onọ otofa riẹ o rọ “Owuhrẹ!”) ere o bo. Yọ avọ oghọghọ ulogbo, ọ tẹ gbae. Rekọ Jesu ọ tẹ ta nọ: “Whọ rọ obọ te omẹ hẹ, keme enẹna me ri kpo bru Ọsẹ na ha; rekọ nya bru imoni mẹ whọ ta kẹ ae nọ me bi kpo bru Ọsẹ mẹ Ọsẹ rai, Ọghẹnẹ mẹ Ọghẹnẹ rai.”

Meri ọ tẹ dhẹ kpohọ oria nọ ikọ gbe ilele edekọ na a kokohọ. Ọ tẹ ta ẹkẹ unu riẹ kugbe iyẹrẹ nọ eyae edekọ na a kẹ no kpahe ẹruẹ Jesu nọ ọ kparoma ze no. Ghele na, o wọhọ nọ ezae eyena, enọ e rọwo eyae ọsosuọ na ha na, a rọwo Meri gbe he. Matiu 28:3-15; Mak 16:5-8; Luk 24:4-12; Jọn 20:2-18.

▪ Nọ a ruẹ uki na ufofe no, eme Meri Magdalini o ru, kọ eme eyae edekọ na a ruẹ?

▪ Ẹvẹ Pita avọ Jọn a ru nọ a ruẹ uki na ufofe?

▪ Eme eyae edekọ na a nyaku nọ a jọ edhere be nya e vuẹ ilele na kpahe ẹkparomatha Jesu?

▪ Eme ọ via kẹ isoja iroroke na, kọ ẹvẹ izerẹ na a ru kpahe iyẹrẹ rai?

▪ Eme ọ via nọ Meri Magdalini ọvo ọ jọ uki na, kọ ẹvẹ ilele na a rehọ iyẹrẹ eyae na?