Uzou Avọ 132

Eva Obọze Ọghẹnẹ

EKUKUO ẹzi ọfuafo na eva Pẹntikọst yọ imuẹro inọ Jesu o te odhiwu no. Eruẹaruẹ nọ a rọ kẹ Stivin olele na kẹle na u te je dhesẹ nọ O te obei no. Taure a tẹ te nwane rọ itho fi ei kpe fiki isẹri-ise ẹrọwọ riẹ, Stivin o te bo nọ: “Riri, mẹ ruẹ ehru nọ o rovie, gbe Ọmọ Ohwo nọ o dikihẹ evaọ obọze Ọghẹnẹ.”

Nọ ọ rọ obọze Ọghẹnẹ na, Jesu ọ be hẹrẹ ujaje nọ u no obọ Ọsẹ riẹ ze na: “Jọ eva evie ewegrẹ ra [su].” Taure oyena u te ti te, taure ọ tẹ te j’owọ mukpahe ewegrẹ riẹ, eme Jesu o bi ru? O bi su ilele riẹ nọ a kẹ ẹzi, be kpọ ae evaọ iruo usiuwoma ota rai be jẹ ruẹrẹ ae họ, ẹkwoma ẹkparomatha, re a jọ ibe ivie kugbei evaọ Uvie Ọsẹ riẹ.

Wọhọ oriruo, Jesu ọ salọ Sọl (ọnọ a mae rehọ odẹ Ahwo Rom riẹ uwhremuna nọ, Pọl) re ọ kobaro iruo aru-ilele na evaọ ekuotọ efa. Sọl o wo ọwhọ kẹ Uzi Ọghẹnẹ, rekọ isu egagọ ahwo Ju a su rie thọ. Fikiere, orọnikọ Sọl ọ whobọhọ ekpe Stivin ọvo ho rekọ ọ ruọ edhere Damaskọs avọ udu no obọ ozerẹ okpehru na ze Kayafas re o mu t’ọzae t’aye kpobi nọ ọ ruẹ nọ ọ rọ olele Jesu ziọ Jerusalẹm. Rekọ, okenọ Sọl ọ rọ edhere na, elo ọnwranwra jọ o te lo wariẹe họ, o te kie fihọ otọ.

Urru jọ nọ a riẹ oria nọ u no ze he o tẹ nọ nọ: “Sọl, Sọl, fikieme whọ jẹ rọ omẹ ekpokpo?” Sọl ọ tẹ nọ nọ: “Whẹ ono, Ọnowo?”

Uyo u te do ze nọ: “Mẹ Jesu ọ nọ whọ rọ ekpokpo.”

Jesu ọ tẹ ta kẹ Sọl, ọnọ elo ogbunu na o tuaro no na, re ọ rueva Damaskọs re ọ jọ obei hẹrẹ ithubro. Jesu ọ tẹ roma via evaọ eruẹaruẹ kẹ Ananias, omọvo ilele riẹ jọ. Kpahe Sọl, Jesu ọ tẹ ta kẹ Ananias nọ: “Ọ rọ oware osanọ mẹ no, re ọ wha odẹ mẹ se ahwo Egedhọ gbe ivie, jegbe emọ Izrẹl.”

Uzẹme, avọ uketha Jesu, Sọl (ọnọ a te riẹ wọhọ Pọl na) gbe etausiuwoma efa a wo obokparọ ulogbo evaọ iruo usiuwoma ota gbe ewuhrẹ rai. Evaọ uzẹme, ole ikpe 25 nọ Jesu ọ roma via kẹe no evaọ edhere Damaskọs, Pọl o te kere nnọ a vuẹ “usiuwoma” na “kẹ enọ a ma kpobi evaọ akpọ na [no].”

Nọ ikpe buobu efa e vrẹ no, Jesu ọ tẹ rehọ eruẹaruẹ buobu rọ kẹ ukọ oyoyou riẹ, Jọn. Ẹkwoma eruẹaruẹ enana nọ Jọn o dhesẹ evaọ obe Eviavia Ebaibol na, ọ tẹ rọ ere rria te epanọ ọ rọ ruẹ eziheze Jesu evaọ ogaga Uvie. Jọn ọ ta nọ ‘evaọ ẹzi’ a kpeze i rie kpohọ oke ‘ẹdẹ Olori na.’ Eme họ “ẹdẹ” ọnana?

A tẹ roma totọ wuhrẹ eruẹaruẹ Ebaibol na, kugbe eruẹaruẹ Jesu kpahe edẹ urere na, i re dhesẹ nnọ ‘ẹdẹ Olori na’ o muhọ evaọ ukpe ikuigbe 1914 na! Fikiere evaọ 1914 Jesu o ro zihe ze nọ a rẹ ruẹ hẹ, ababọ oma-udhesẹ kẹ ẹgbede rekọ avọ idibo ẹrọwọ riẹ ọvo nọ a riẹ kpahe eziheze riẹ. Evaọ ukpe oyena Jihova ọ kẹ Jesu ujaje re ọ nya i su evaọ udevie ewegrẹ riẹ!

Avọ ẹmeoyo kẹ ujaje Ọsẹ riẹ, Jesu o ru idhiwu fo, le Setan avọ idhivẹri riẹ ziọ otọakpọ. Nọ ọ ruẹ onana nọ o via no evaọ eruẹaruẹ, Jọn o te yo urru odhiwu jọ nọ u whowho nọ: “Enẹna usiwo gbe ogaga, gbe uvie Ọghẹnẹ mai gbe udu ogaga Kristi riẹ, e ze i no re.” Ẹhẹ, evaọ 1914 Kristi o ro muhọ esuo wọhọ Ovie!

Ẹvẹ onana o rọ emamọ usi te rọkẹ egegagọ Jihova evaọ odhiwu! A t’udu họ ai awọ nọ: “Ghọghọ whai ihru gbe enọ e riẹ eva kpobi.” Rekọ eme họ uyero ahwo nọ e rọ otọakpọ? Urru nọ u no obọ odhiwu ze na o ta haro nọ: “[Uye u te] owhai, o akpọ gbe abade, keme ukumuomu na ọ rehọ ofu ọgaga bru owhai ze, keme ọ riẹ nọ oke riẹ o re kpẹkpẹre.”

Oke okpẹkpẹe na ma rọ obọnana. Enẹna ahwo a bi dhesẹ sọ a te kẹ ẹruọ akpọ ọkpokpọ Ọghẹnẹ hayo a te ruẹ uye ọraha. Uzẹme na họ, oghẹrẹ uyo nọ whọ kẹ enẹna kẹ usiuwoma Uvie Ọghẹnẹ nọ a rọ otọakpọ kpobi ta evaọ otọ ọkpọvio Kristi na họ oware nọ u ti dhesẹ obaro ra.

Jesu Kristi ọ te jọ umuo oyena jọ Ohwo-Ẹro Ọghẹnẹ nọ o ti ro si eyero-akpọ Setan kpobi no otọakpọ na jegbe ahwo nọ a be thae uke. Jesu o re ti si emuemu kpobi no ẹkwoma ẹmo nọ a jọ Ebaibol na se Amagẹdọn. Oyena o tẹ vrẹ no, Jesu, Ohwo nọ ọ mae rro kpobi evaọ ehrugbakpọ u te no Jihova Ọghẹnẹ omariẹ no, o ve ti kru Setan avọ idhivẹri riẹ, ọ vẹ gbae fihọ ‘ọgọdọ odidi’ odu ikpe, koyehọ, oria ababọ iruo. Iruẹru 7:55-60; 8:1-3; 9:1-19; 16:6-10; Olezi 110:1, 2; Ahwo Hibru 10:12, 13; 1 Pita 3:22; Luk 22:28-30; Ahwo Kọlọsi 1:13, 23; Eviavia 1:1, 10; 12:7-12; 16:14-16; 20:1-3; Matiu 24:14.

▪ Nọ Jesu o kpohọ odhiwu no, diẹse a fi rie họ, kọ eme ọ jẹ hẹrẹ?

▪ Nọ Jesu o kpohọ odhiwu no, amono o je su, kọ ẹvẹ esuo riẹ o ro dhesẹ oma via?

▪ Okevẹ ‘ẹdẹ Olori na’ o ro muhọ, kọ eme ọ via evaọ emuhọ riẹ?

▪ Ẹvẹ iruo usiuwoma ota nọ o r’otọ nẹnẹ na u bi ro kpomahọ omai omomọvo?

▪ Okenọ iruo usiuwoma ota na u te kuhọ no, eme o ti lele iei?