Idhivẹri na Yọ Ijihẹ!
Setan avọ idhivẹri riẹ a re yoyoma ẹsikpobi a tẹ jẹ kpahe ẹta. Eva oke nọ ukpemu Setan o kpe uthuru erao gbe idibo Job ohwo ẹrọwọ na. Kẹsena o te je kpe emọ ikpe riẹ nọ ọ rehọ “ofou ologbo” rọ raha uwou nọ a jọ eva riẹ. Nọ oyena o vrẹ no Setan ọ tẹ rehọ ẹyao tehe Job “ẹyao ela ipepehe ro no obọ evawọ rite obọ oko uzou riẹ.”—Job 1:7-19; 2:7.
Eva ọ edẹ Jesu, idhivẹri na a ru ahwo jọ dienu je tuaro. (Matiu 9:32, 33; 12:22) A kẹ ọzae jọ uye a te je rue rehọ itho bru oma riẹ. (Mak 5:5) A tẹ jẹ hae liẹliẹ ọmọzae jọ họ oviẹ, tue fihọ otọ, a ve je “rue i kie ewawa gaga.”—Luk 9:42.
Evaọ oke nọ ukpemu, idhivẹri na a fou ahwo jọ họ ẹyao a te je ru amọfa kie ewawa
Nẹnẹ na, kẹsena Setan avọ idhivẹri na a gbẹ ruabọhọ ikpakpe. Uzẹme, iruo imuomu rai i bu gaga no anwọ oke nọ a gele ae no obọ odhiwu. Iyẹrẹ nọ i bi no akpọ na soso ze i dhesẹ epanọ emuemu rai ọga te. A rehọ uye ẹyao kẹ otu jọ. Eva aso, a re kpokpo amọfa jẹ whahe ai owezẹ hayo ru ai wezẹ ewezẹ igbunu. A rẹ rehọ ọfariẹ raha amọfa. Efa kọ enọ a re fou họ oruẹ, ijihẹ, hayo ethuru whu.
Idhivẹri inẹnẹ a fou ahwo jọ họ ozighi; amọfa kọ ekpokpo eva aso, fou rai họ ewezẹ igbunu
Lintina, nọ ọ be ria obọ Suriname, ọ ta kpahe idhivẹri hayo izi iyoma inọ, a kpe ahwo 16 eva uviuwou riẹ a tẹ jẹ kẹ e uye ikpe 18. Eva orọsosuọ nọ ovia kẹ e ze, ọ tẹ ta nnọ idhivẹri na “eva e rẹ were ai nọ a tẹ be lahiẹ ọnọ o kie ruọ ẹta rai bẹsenọ o re whuẹ.”
Rekọ Jihova ọ rẹ sae thọ idibo riẹ uke no ohọre Setan.—Itẹ 18:10.